كەشە حالىقارالىق وليمپيالىق كوميتەتتى (حوك) ون ەكى جىل باسقارعان نەمىس توماس باح رەسمي تۇردە ءوز ورنىن بوساتىپ، ۇيىم جەتەكشىسى بولىپ زيمبابۆە ەلىنىڭ وكىلى كيرستي كوۆەنتري سايلاندى.

سۋرەت: sport.kg

– دۇنيەجۇزىلىك وليمپيادا سارايىنىڭ كىلتىن مەن اسا زور قۋانىشپەن جانە ريزاشىلىقپەن كيرستي كوۆەنتري حانىمنىڭ قولىنا تابىستايمىن. ول – حوك-تىڭ ونىنشى پرەزيدەنتى عانا ەمەس، سونىمەن قاتار وسى ءبىر ايتۋلى ۇيىمدى باسقارۋشى تۇڭعىش ايەل جانە دە وسىنداي دارەجەگە جەتكەن افريكانىڭ دا ءبىرىنشى وكىلى. ول – وليمپيادا قۇندىلىقتارىن جاستايىنان بويىنا ءسىىڭىرىپ وسكەن جان، ءوزى دە ايگىلى سپورتشى. ونىڭ جۇمىسىنا ساتتىلىك تىلەيمىن! – دەدى توماس باح قوشتاسۋ سوزىندە.

نەمىس سپورت فۋنكتسيونەرى وليمپيادا قوزعالىسىن دامىتۋ باعىتىنا قوسقان ەلەۋلى ۇلەسى ءۇشىن، جالپى سپورت سالاسىنداعى جەمىستى ەڭبەگى ءۇشىن «وليمپيادا وردەنىنە» يە بولدى. ول سونداي-اق حوك-تىڭ قۇرمەتتى پرەزيدەنتى رەتىندە دە قاجەت كەزدە جاڭا جەتەكشىگە باعىت بەرىپ، اقىل-كەڭەسىن ايامايتىنىن مالىمدەدى.

ال حوك-تىڭ جاڭا پرەزيدەنتى تۋرالى ءبىز نە بىلەمىز؟

سۋرەت: sportbox.ru

كيرستي كوۆەنتري – افريكانىڭ وڭتۇستىگىندەگى زيمبابۆە ەلىنىڭ وكىلى. 1983 جىلدىڭ 16 قىركۇيەگىندە ول كەزىندە وسى ەلدى وتارلاۋعا قاتىسقان اعىلشىن كولونيستەرىنىڭ ۇرپاعى – روب جانە لينن كوۆەنتريلەردىڭ وتباسىندا دۇنيەگە كەلدى. كيرستيدىڭ اتا-اناسى زيمبابۆە استاناسى حارارەدەگى حيميا كومپانياسىنا جەتەكشىلىك ەتەتىن. ولاردىڭ ۇيلەرىنىڭ الدىندا ۇلكەن حاۋىز (باسسەين) بار ەدى. كىشكەنتاي كيرستي سول حاۋىزدا سۋعا ءجۇزۋدى ۇيرەندى.

بىراق ول ءجۇزۋ سپورتىنا دەگەن وسى بالالىق قىزىعۋشىلىعىنىڭ بولاشاقتا ءومىرىن كۇرت وزگەرتەتىنىن بىلگەن جوق. سپورتتىڭ وسى تۇرىنە دەگەن ىنتا-ىقىلاسىنىڭ، اتا-اناسىنىڭ قولداۋىنىڭ ارقاسىندا كيرستي زيمبابۆە ەلىنىڭ اتىن الەمگە تانىتتى.

سۋرەت: olympics.com

2004 جىلعى افينا وليمپياداسىندا 21 جاستاعى كيرستي كوۆەنتري ءجۇزۋ سپورتىنان التىن مەدال جەڭىپ الىپ، وليمپيادا چەمپيونى اتاندى. بۇعان دەيىن زيمبابۆە وليمپيالىق ويىندار تاريحىندا ءبىر عانا التىن جۇلدە العان بولاتىن، ول – 1980 جىلعى ماسكەۋ وليمپياداسىندا كوگالداعى حوككەي جارىسىنان توپ جارعان زيمبابۆەلىك قىزدار كومانداسى ەدى. بىراق بۇل كوماندا قۇرامىندا جەرگىلىكتى افريكالىق ارۋلار مۇلدە جوق ەدى، حوككەيشىلەردىڭ ءبارى دەرلىك باياعى وتارشىلار ۇرپاقتارى – اقجۇزدى قىزدار بولاتىن. كوپ ۇزاماي ولاردىڭ كوپشىلىگى تاريحي وتاندارى – ۇلىبريتانياعا كوشىپ كەتتى دە، زيمبابۆە سپورت جانكۇيەرلەرى ەكىۇداي سەزىمدە قالدى.

قارشادايىنان قارا ءتۇستى سپورتشىلارمەن تىزە قوسا جارىستارعا قاتىسقان، ءوزىن «ناعىز زيمبابۆەلىكپىن» دەپ ەسەپتەيتىن كيرستي كوۆەنتريدىڭ كوزاقاراسى باسقاشا بولدى. تەرىسى اق بولا تۇرا ول «مەن افريكالىقپەن» دەگەن ۇستانىمىنان ەش اينىعان جوق. سوندىقتان ونىڭ افيناداعى تەڭدەسسىز تابىسى زيمبابۆە سپورتىنىڭ تاريحىنا التىن ارىپپەن جازىلارداي جەتىستىك ەدى. اتالمىش افريكا ەلىنىڭ سپورت اۋەسقويلارى دا كريستي كوۆەنتريدى باياعى كوگالداعى حوككەيشىلەر سەكىلدى «جارتجۇرتتىق دەگيونەرلەر» سيپاتىندا ەمەس، «ءوز جۇلدىزىمىز»، «ءوز ماقتانىشىمىز» دەپ قابىلدادى.

ك.كوۆەنتري تەك بۇل تابىسپەن عانا شەكتەلىپ قالعان جوق. ول 2008 جىلى بەيجىڭدە وتكەن جازعى وليمپيادادا دا توپ جاردى – زيمبابۆە سپورتى تاريحىندا وليمپيالىق ويىنداردىڭ قوس التىنىن قانجىعاعا بوكتەرەر سايىپقىران ەندى قاي ۋاقىتتا شىعار ەكەن؟! بۇدان بولەك ول وليمپيادانىڭ ءتورت دۇركىن كۇمىس جۇلدەسىنە، ءبىر مارتە قولا مەدالىنە دە يە بولعان. ءۇش رەت الەم چەمپيونى اتانعان. ياعني زيمبابۆە سپورتىن الەمگە تانىتۋ ءۇشىن ەلەۋلى ەڭبەك سىڭىرگەنى انىق.

بىرنەشە جىل زيمبابۆە ەلىنىڭ سپورت ءمينيسترى، سوسىن ۇلتتىق وليمپيادا كوميتەتىنىڭ ءتورايىمى بولعان كيرستي كوۆەنتري حانىمنىڭ ەندىگى مىندەتى – الەمدەگى وليمپيادا قوزعالىسىنىڭ جۇمىسىن جۇيەلەۋ، وسىعان دەيىنگى تابىستاردى ەسەلەۋمەن قاتار كەمشىلىكتەر مەن قيىندىقتاردى ەڭسەرۋ. سپورتتاعى دوپينگ ماسەلەسى، ايەلدەر جارىستارىنداعى ينتەرسەكس داۋى، تورەشىلەردىڭ كاسىبي دايىندىعى مەن ولاردىڭ قارا قىلدى قاق جارار ءادىل ۇستانىمنان اينىماس ادالدىعىن قامتاماسىز ەتۋ سەكىلدى سان-ساپالاق جۇمىستار شاش-ەتەكتەن. بۇعان قوسا وليمپيادا جارىستارىنا اسەر ەتپەي قويمايتىن ساياسي شيەلەنىستەر دە ءورشىپ تۇر. رەسەي-ۋكراينا داۋى از بولعانداي، بىلتىردان بەرى يزرايل-پالەستينا، ەندى، مىنە، يزرايل-يران جانجالى دا ۋايىمعا ۋايىم قوسا تۇسكەنى ءمالىم.

«مەن بالا كۇنىمنەن بەرى كىلەڭ ەرىك-جىگەرى مىقتى، كۇشتى ادامداردىڭ ورتاسىندا ءوستىم، – دەيدى كيرستي كوۆەنتري. – اجەم مارقۇم باستاعان ءىسىن مىندەتتى تۇردە سوڭىنا دەيىن جەتكىزەتىن ماقساتكەر ادام بولدى. انام ءتىپتى سپورتپەن دە اينالىستى. باپكەرلەرىم دە كىل جىگەرلى ادامدار-تىن. سولاردىڭ ءتالىمىن العان مەن دە العان بەتتەن قايتپايتىن، قيىندىققا ەش مويىمايتىن جانمىن. دەمەك، قاي جۇمىسقا دا بەل شەشە كىرىسىپ، بەلسەنە اتقارۋعا دايىنمىن».

ءبىر قىزىعى، ك.كوۆەنتري حانىمدى زيمبابۆە حالقى «مانگۆەنيا» دەپ اتايدى ەكەن. جەرگىلىكتى شونا حالقىنىڭ تىلىندە بۇل ءسوز «قولتىراۋىن» دەگەن ماعىنا بەرەدى. حوك-تىڭ جاڭا باسشىسىنىڭ بولمىسى دا وسى ءبىر وتە ساق، الايدا شەشۋشى ساتتە شاپشاڭ دا باتىل قيمىلدايتىن جىرتقىشتىڭ مىنەزىنە ۇقسايدى دەسەدى.

ساكەن سىبانباي

Abai.kz