الەمدىك جانە ءداستۇرلى دىندەر كوشباسشىلارىنىڭ VIII سەزى اياسىندا 2025 جىلدىڭ 1 تامىزىندا بەيبىتشىلىك جانە كەلىسىم سارايىندا«تۋرين كەبىنى» جانە «قاسيەتتى كىتاپتار» اتتى ەكى حالىقارالىق رۋحاني-مادەني كورمە ءوز جۇمىسىن باستادى.

قوس كورمەنىڭ باستى ماقساتى – ءتۇرلى ءدىني كونفەسسيالاردىڭ تاريحي جانە رۋحاني مۇراسىن كەڭىنەن تانىتۋ ارقىلى قوعامدا دىنارالىق تۇسىنىستىك پەن ءوزارا قۇرمەتتى نىعايتۋ، سونداي-اق كورمەگە كەلۋشىلەردىڭ رۋحاني-تانىمدىق كوكجيەگىن كەڭەيتۋ.

ءىس-شارا بارىسىندا قر مادەنيەت جانە اقپارات ءمينيسترى ايدا بالاەۆا كورمەدە ۇسىنىلعان ارتەفاكتتەر جاي عانا تاريحي جادىگەر ەمەس، ادامزاتتىڭ رۋحاني جانە مادەني مۇراسىن جەتكىزۋشى، ۇلى وقيعالاردىڭ كۋاسى ەكەنىن اتاپ ءوتتى. الدا وتەتىن الەمدىك جانە ءداستۇرلى دىندەر كوشباسشىلارىنىڭ سەزى – قازاقستاننىڭ بەيبىتشىلىك، كەلىسىم مەن گۋمانيزم قۇندىلىقتارىن بەرىك ۇستاناتىنىن كورسەتەتىن ماڭىزدى حالىقارالىق وقيعالاردىڭ ءبىرى.

«مۇنداي بىرەگەي تاريحي مۇرالاردى ساقتاپ، ولاردى تەرەڭ زەردەلەي وتىرىپ، ءبىز ءوزارا تۇسىنىستىككە، رۋحاني بىرلىككە جانە مادەني ديالوگقا نەگىزدەلگەن بەرىك بولاشاقتىڭ ىرگەتاسىن قالاي الامىز»، – دەدى ايدا بالاەۆا.

مينيستر قاسىم-جومارت توقاەۆتىڭ ءدىن تۋرالى ايتقان پايىمىن ەسكە الدى. پرەزيدەنت حالىققا جولداۋىندا ءدىن ارقاشان ءبىلىم بەرۋ قىزمەتىن اتقارعانىن جانە قۇران، ءىنجىل، ءتاۋرات جانە باسقا دا كوپتەگەن رۋحاني كىتاپتار ارقاشان گۋمانيزم مەن بەيبىتشىلىك يدەيالارىنا قانىق بولعانىن اتاپ ءوتتى.

كونفەسسيا وكىلدەرى قازاقستاننىڭ بەيبىتشىلىك پەن كەلىسىمدى ساقتاۋ ىسىندەگى ەرەكشە رولىنە توقتالدى.

«بۇل كورمەنىڭ قازاقستاندا، دىنارالىق كەلىسىمگە، بەيبىتشىلىكتى ناسيحاتتاۋعا قۇرمەتپەن قارايتىن ەلدە ۇيىمداستىرىلعانى وتە ورىندى. وسىعان بايلانىستى قاسيەتتى تاقتىڭ اتىنان قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا قولداۋى ءۇشىن زور ريزاشىلىعىمدى بىلدىرەمىن»، – دەدى قازاقستانداعى اپوستول ءنۋنتسيى، ارحيەپيسكوپ گەورگ پانامتحۋنديلا.

«كيەلى جادىگەرلەر كورمەسىنىڭ ەل استاناسىندا جانە ەلىمىزدىڭ وزگە دە ءىرى قالالارىندا ۇسىنىلۋى – قازاقستاندا ءدىني بوستاندىق بار ەكەنىن، ءتۇرلى دىندەر اراسىندا جەمىستى ىنتىماقتاستىق قالىپتاسقانىن، حالقىمىزدىڭ بىرلىگىن نىعايتۋعا دەگەن ۇمتىلىستىڭ بارىن كورسەتەدى. كورمەنىڭ ءساتتى ءوتۋى – قازاقستان حالقىنىڭ رۋحانياتىنا ۇلەس قوسىپ، ماڭگىلىك قۇندىلىقتارعا نەگىزدەلگەن بەيبىت دامۋ جولىن تاڭداعان ەلىمىزگە قۇدايدىڭ بەرەكەسى بولعاي»،– دەپ تولىقتىردى استاناداعى اۋليە ماريا ريم-كاتوليك ارحيەپارحياسىنىڭ ارحيەپيسكوپ-مەتروپوليتى توماش بەرنارد پەتا.

«تۋرين كەبىنى» كورمەسى كوپشىلىكتى وسى اتاقتى ارحەولوگيالىق جادىگەردىڭ تاريحى مەن عىلىمي زەرتتەۋلەرىمەن تانىستىرادى. بۇل بىرەگەي جادىگەر كونە زاماننان بۇگىنگە دەيىن عىلىمي قاۋىمداستىق پەن قاجىلاردىڭ نازارىن اۋدارىپ كەلەدى»، – دەدى قازاقستان پراۆوسلاۆ شىركەۋىنىڭ باسشىسى، استانا جانە قازاقستان ءميتروپوليتى الەكساندر.

«تۋرين كەبىنىن كوبىنە «بەسىنشى ءىنجىل» دەپ تە اتايدى جانە حريستيان الەمىندەگى ەڭ قىمبات جادىگەرلەردىڭ ءبىرى سانالادى. سونىمەن قاتار، بۇل – قازىرگى ۋاقىتتا ەڭ كوپ زەرتتەلگەن وبەكتىلەردىڭ ءبىرى. قازاقستاندا اتالمىش كورمەنىڭ وتۋىنە ۇلەس قوسۋ – ءبىز ءۇشىن ۇلكەن مارتەبە»، – دەپ اتاپ ءوتتى «Kirche in Not» قورىنىڭ اتقارۋشى پرەزيدەنتى رەدجينا لينچ.

«تۋرين كەبىنى» كورمەسى –حريستيان الەمىندەگى ەڭ باعالى جادىگەرلەردىڭ ءبىرى. اڭىز بويىنشا، شامامەن 2000 جىل بۇرىن شەگەلەنىپ تۇرعان يسا ءماسىحتى ءتۇسىرىپ الىپ، دەنەسىن وسى ماتامەن وراعان.

ايتا كەتەيىك، بۇل ەكسپوزيتسيا قازاقستاندا العاش رەت كورسەتىلدى. كورمەدە كەبىننىڭ دالمە-ءدال كوشىرمەسى مەن 27 تاقىرىپتىق اقپاراتتىق پانەل، سونداي-اق تاريحي ارتەفاكتىلەر، بەينەماتەريالدار مەن يلليۋستراتسيالىق بروشيۋرالار ۇسىنىلدى.

«قاسيەتتى كىتاپتار» كورمەسى الەمدىك دىندەردىڭ قاسيەتتى جازبالارى ارقىلى ءارتۇرلى ءدىني داستۇرلەردىڭ رۋحاني نەگىزدەرىن كورسەتۋگە باعىتتالدى. ەكسپوزيتسيادا قاسيەتتى جازبالاردىڭ جانە ءتۇرلى دىندەر مەن تاريحي داۋىرلەرگە قاتىستى سيرەك كەزدەسەتىن قولجازبالاردىڭ 50 داناسى ۇسىنىلدى.

ەكسپوناتتاردىڭ ىشىندە VII عاسىرداعى قۇران قولجازباسى، XIX عاسىرداعى سيرەك كەزدەسەتىن ءىنجىل نۇسقالارى، كەنەسارى حاننىڭ قۇران كىتابى، تالمۋد، تورا جانە باسقا دا كيەلى كىتاپتار بار.

كورمەلەر 2025 جىلدىڭ 25 قىركۇيەگىنە دەيىن جالعاسادى. كوپشىلىك ءتۇرلى دىندەردىڭ رۋحاني مۇرالارىمەن تەرەڭىرەك تانىسىپ، ادامزات تاريحىنداعى ءدىني جازبالاردىڭ مادەني، تاريحي جانە رۋحاني مانىنە ءۇڭىلۋ مۇمكىندىگىنە يە بولدى.