سەمەيدە اباي قۇنانبايۇلىنىڭ 180 جىلدىعىنا ارنالعان مەرەيتويلىق ونكۇندىك اياسىندا ەرەكشە ماڭىزدى الەۋمەتتىك-مادەني نىسان – كورۋ قابىلەتى شەكتەۋلى ازاماتتارعا ارنالعان ارنايى كىتاپحانانىڭ جاڭا عيماراتى پايدالانۋعا بەرىلدى.

ينكليۋزيۆتى كەڭىستىك «سامۇرىق-قازىنا» قورىنىڭ دەمەۋشىلىگىمەن 410 ميلليون تەڭگەگە سالىندى. جالپى اۋماعى 852 شارشى مەتردى قۇرايتىن ەكى قاباتتى عيمارات زاماناۋي ستاندارتتارعا ساي جابدىقتالىپ، ەرەكشە قاجەتتىلىكتەرى بار ازاماتتاردىڭ بارلىق سۇرانىسىنا بەيىمدەلگەن.

جاڭا كىتاپحانا برايل قارپىندەگى ادەبيەتتەر، دىبىستىق كىتاپتار مەن ارنايى تيفلوتەحنولوگيا كابينەتى، كوۆوركينگ زالدارى، وقۋ كەڭىستىكتەرى جانە ەلەكتروندى كاتالوگ جۇيەسىمەن قامتىلعان. قازىرگى تاڭدا، كىتاپحانا قورى 41 مىڭنان استام كىتاپتى قۇرايدى.

شارانىڭ اشىلۋ راسىمىنە اباي وبلىسىنىڭ اكىمى بەرىك ءۋالي، «سامۇرىق-قازىنا» اق باسقارۋشى ديرەكتورى عيبرات اۋعانوۆ، مەملەكەتتىك مەكەمە جانە قوعامدىق ۇيىم وكىلدەرى، سونداي-اق «اۋىل» پارتياسىنىڭ اباي وبلىسى بويىنشا وڭىرلىك فيليالىنىڭ وكىلى ەرىك قايراتبەكۇلى قاتىستى.

وبلىس اكىمى ءوز سوزىندە بۇل جوبانىڭ ماڭىزىنا توقتالىپ، ونى ينكليۋزيۆتى قوعام قۇرۋ جولىنداعى ناقتى ءارى ىلكىمدى قادام رەتىندە اتاپ ءوتتى.

كىتاپحانا ديرەكتورى گۇلنارا سۇلتانقىزى: «بۇل — تەك كىتاپحانا ەمەس، قوعامداعى ەرەكشە جانداردىڭ شىعارماشىلىعىن، بىلىمگە دەگەن قۇشتارلىعىن دامىتۋعا ارنالعان تولىققاندى ورتا. مۇندا زاعيپ جانە ناشار كورەتىن ازاماتتار ءوزىن ەركىن سەزىنىپ، رۋحاني تۇرعىدا باي الادى»، – دەدى.

«شامشىراق» كلۋبىنىڭ مەڭگەرۋشىسى مارات الياسقاروۆ: «زاماناۋي ينفراقۇرىلىمى بار مۇنداي نىسان – كوزبەن ەمەس، جۇرەكپەن كورەتىندەر ءۇشىن شىن مانىندەگى ۇلكەن مۇمكىندىك. بۇل — قوعامنىڭ ءبىزدى ەستىگەنى مەن قولداعانىنىڭ ايعاعى»، – دەدى.

«اۋىل» پارتياسى اباي وبلىسى بويىنشا وڭىرلىك فيليال وكىلى ەرىك قايراتبەكۇلى: «ينكليۋزيۆتى باستامالاردى قولداۋ – ءبىزدىڭ پارتيانىڭ باستى قاعيداتتارىنىڭ ءبىرى. بۇل كىتاپحانا – مۇمكىندىگى شەكتەۋلى ازاماتتارعا كورسەتىلگەن شىنايى قامقورلىق پەن تەڭ مۇمكىندىكتەر جولىنداعى ناقتى ىستەردىڭ كورىنىسى»، – دەپ ءوز وي - پىكىرىن ورتاعا سالدى.

ايتا كەتەيىك، پارتيا وكىلى ەرىك قايراتبەكۇلى باق-نا سۇحبات بەرىپ، پارتيا اتىنان قۇتتىقتاۋ لەبىزىن تانىتىپ، اتالعان رۋحاني-مادەني شارانىڭ ماڭىزىنا توقتالىپ، «كىتاپقا ەكىنشى ءومىر سىيلا!» جوباسى جايىن تىلگە تيەك ەتتى.

كىتاپحانا ماڭايى تولىق اباتتاندىرىلىپ، كىرەبەرىس جولدارعا اسفالت توسەلىپ، جاسىل جەلەكتەر وتىرعىزىلدى.

مۇنىڭ بارلىعى – ەرەكشە جانداردىڭ قوعامدا بەلسەندى ءومىر سۇرۋىنە جاسالعان يگى جاعداي.

وسىنداي يگى باستامالار ارى قارايدا ءوز جالعاسىن تاپپاق.

Abai.kz