رەسەي گروزنىي اسپانىندا ازەربايجاننىڭ جولاۋشىلار ۇشاعىن اتىپ تۇسىرگەنى ءۇشىن كەشىرىم سۇراۋدان باس تارتقاننان كەيىن شيەلەنىسىپ كەتكەن باكۋ مەن ماسكەۋدىڭ اراسى كەيىنگى اپتالاردا ودان ءارى ۋشىعا ءتۇستى. بۇعان 8 تامىز كۇنى ودەسسا وبلىسىنداعى ازەربايجان مەملەكەتتىك SOCAR كومپانياسىنا تيەسىلى مۇناي بازاسى مەن ۋكراينانى ازەربايجان گازىمەن قامتاماسىز ەتەتىن سول جەردەگى كومپرەسسور ستانتسياسىن رەسەي كۇشتەرىنىڭ اتقىلاۋى سەبەپ بولدى.

ازەربايجان پرەزيدەنتى يلحام اليەۆ بۇل شابۋىل ادەيى جاسالعان دەپ كرەملدى ايىپتادى. ازەربايجاندىق بىرنەشە باق ەندى اليەۆ كيەۆكە قارۋ-جاراق جەتكىزۋگە قويىلعان تىيىمدى الىپ تاستاۋى مۇمكىن دەپ جارىسا جازدى.

10 تامىزدا يلحام اليەۆ پەن ۋكراينا پرەزيدەنتى ۆلاديمير زەلەنسكي تەلەفونمەن سويلەسكەن ەدى. اڭگىمە بارىسىندا ەكى تاراپ تا رەسەيدىڭ ۋكراينا اۋماعىنداعى ازەربايجان نىساندارىنا جاساعان اۋە شابۋىلدارىن ايىپتادى. زەلەنسكي اليەۆپەن سويلەسكەننەن كەيىن بۇل شابۋىلداردى ء"بىزدىڭ جانە ەۋروپالىق باسقا ەلدەردىڭ ەنەرگەتيكالىق تاۋەلسىزدىگىن قامتاماسىز ەتەتىن ەنەرگيا جولدارىن قيۋدى كوزدەگەن رەسەيدىڭ قاساقانا ارەكەتى" دەپ باعالادى.

وسى شابۋىلدار جاسالعانعا دەيىن، شىلدە ايىنىڭ اياعىندا، ازەربايجان گازى ۋكرايناعا العاش رەت بولگاريا مەن رۋمىنيا ارقىلى ترانسبالقان دالىزىمەن جەتكىزىلگەن ەدى.

ماسكەۋ مۇناي بازاسى مەن كومپرەسسور ستانتسياسىنا جاسالعان شابۋىلدارعا رەسمي تۇسىنىكتەمە بەرگەن جوق. تەك رەسەيدىڭ قورعانىس مينيسترلىگى 2-8 تامىز ارالىعىندا بىرنەشە نىساناعا، سونىڭ ىشىندە "ۋكراينانىڭ اسكەري-ونەركاسىپ كەشەنى جۇمىسىن قامتاماسىز ەتەتىن گاز تاسىمالداۋ جۇيەسى نىساندارىنا" دا شابۋىل جاسالعانىن حابارلادى.

رەسەي ۋكرايناعا كەڭ اۋقىمدى باسقىنشىلىق سوعىس باستاعان سوڭ ازەربايجان اۋەلدە بەيتاراپ ۇستانىمدا بولدى: ول رەسەيدى اگرەسسياسى ءۇشىن ايىپتاعان جوق، سوعىسىپ جاتقان ەكى تاراپقا دا قارۋ-جاراق بەرمەدى، بىراق ۋكرايناعا گۋمانيتارلىق كومەك كورسەتتى.

وسىنداي ساياسات رەسەي گروزنىي ماڭىندا درون شابۋىلىن تويتارۋ كەزىندە ازەربايجاننىڭ جولاۋشىلار ۇشاعىن اتىپ ءتۇسىرىپ، ول ءۇشىن تىكەلەي ءارى ايقىن كەشىرىم سۇراۋدان باس تارتقانعا دەيىن جالعاستى. ۇشاق اپاتىنان 38 ادام قازا تاپتى.

ازەربايجان – ۋكرايناعا كورسەتىلگەن گۋمانيتارلىق كومەك كولەمى بويىنشا تمد ەلدەرى ىشىندە ءبىرىنشى ورىندا. قازىرگى ۋاقىتتا ونىڭ جالپى كولەمى 42 ميلليون دوللارعا جەتكەن.

زەلەنسكيمەن سويلەسكەننەن كەيىن كوپ ۇزاماي ازەربايجان پرەزيدەنتى ۋكرايناعا گۋمانيتارلىق كومەك كورسەتۋ ءۇشىن ەلدىڭ ەنەرگەتيكا مينيسترلىگىنە 2 ميلليون دوللار ءبولۋ تۋرالى وكىمگە قول قويدى. بۇدان بولەك، Caliber باسىلىمى دەرەككوزدەرگە سۇيەنىپ، ەگەر "رەسەي ازەربايجان مۇددەلەرىنە قارسى اگرەسسيۆتى ساياساتىن جالعاستىراتىن بولسا، باكۋ ۋكرايناعا قارۋ بەرۋگە قويىلعان تىيىمدى الىپ تاستاۋى مۇمكىن" دەپ جازدى. Caliber – ازەربايجان بيلىگىنە جاقىن باسىلىمداردىڭ ءبىرى سانالادى.

Abai.kz