مەملەكەت باسشىسىنىڭ ەلىمىزدىڭ كولىك-لوگيستيكالىق الەۋەتىن دامىتۋ جونىندەگى تاپسىرمالارىن ورىنداۋ شەڭبەرىندە قازاقستاندا «قتج» ۇك» اق-نىڭ تولىققاندى ترانسۇلتتىق مۋلتيمودالدى كومپانيا رەتىندە قالىپتاسۋىنا باعىتتالعان جوبالار جۇزەگە اسىرىلۋدا. بۇل تۋرالى ۇكىمەت وتىرىسىندا «سامۇرىق-قازىنا» اق باسقارما توراعاسى نۇرلان جاقىپوۆ مالىمدەدى.

ونىڭ ايتۋىنشا، بۇگىنگى تاڭدا شانحايدان روتتەردامعا تەڭىز ارقىلى جۇك جەتكىزۋگە سۋەتس كانالى اشىق بولعان جاعدايدا شامامەن 60 كۇن قاجەت. ال قازاقستان ارقىلى جۇك جەتكىزۋ مەرزىمى 16 كۇننەن اسپايدى.

«جالپى "قىتاي – ەۋروپالىق وداق – قىتاي" باعىتى بويىنشا ەلىمىزدىڭ اۋماعى ارقىلى جۇك اعىنىنىڭ 85%-ى وتەدى»، — دەپ اتاپ ءوتتى نۇرلان جاقىپوۆ.

ءترانزيتتى ارتتىرۋ ماقساتىندا سىرتقى جانە ىشكى ينفراقۇرىلىمداردىڭ قۇرىلىسى جۇرۋدە. سونىڭ ىشىندە حالىقارالىق تەرمينالدار جەلىسى سالىنۋدا. قىتايدىڭ ليانيۋنگان جانە سيان پورتتارىندا قولدانىستاعى تەرمينالدارعا ەندى چەندۋ قالاسىنداعى قۋات كوزدەرىن قوسۋ جوسپارلانعان.

ودان بولەك رەسەي (سەلياتينو ست.), بەلارۋس (سۆيسلوچ ست.), ازەربايجان (اليات پورتى), ماجارستان (بۋداپەشت ق.) ەلدەرىندە جوبالار جۇزەگە اسىرىلىپ جاتىر. بولاشاقتا گرۋزيا، رۋمىنيا جانە بولعاريا پورتتارىن قامتىپ كەتۋ جوسپاردا بار.

«وسىلاردىڭ بارىنە قوسىمشا، ترانزيتتىك جۇك اعىنىن ۇلعايتۋ ماقساتىندا قىتايمەن ءۇشىنشى شەكارالىق وتكەل – "باقتى-اياگوز" تەمىرجول جەلىسىنىڭ قۇرىلىسى باستالدى. تەڭىز تاسىمالى قىزمەتتەرىن كەڭەيتۋ ماقساتىندا كونتەينەر تاسيتىن كەمەلەر ساتىپ الىنادى. سونداي-اق كاسپي تەڭىزى پورت ايلاعىنىڭ ءتۇبىن تەرەڭدەتۋ جۇمىستارى جۇرگىزىلۋدە. اۋەمەن جەتكىزۋ قىزمەتى دە دامۋدا. مىسالى، جۇك تاسىمالدايتىن اۆياكومپانيا اشۋ كوزدەلگەن»، — دەپ اتاپ ءوتتى نۇرلان جاقىپوۆ.

Abai.kz