قاراعاندى وبلىسىندا تسيفرلىق شەشىمدەر كولىك، تۇرعىن ءۇي-كوممۋنالدىق شارۋاشىلىعى جانە باسقا دا سالالارعا ەنگىزىلۋدە. الەۋمەتتىك سالادا نەيروندىق جەلىنى قولداناتىن «ازىق-تۇلىك باعاسىن مونيتورينگتەۋ» جوباسى ىسكە قوسىلدى.

بۇل تۋرالى «جاساندى ينتەللەكت داۋىرىندەگى قازاقستان: وزەكتى مىندەتتەر جانە ولاردى تسيفرلىق ترانسفورماتسيا ارقىلى شەشۋ» تاقىرىبىنداعى جولداۋدى تالقىلاۋ جيىنىندا ايتىلدى.

– مەملەكەت باسشىسى ءوز جولداۋىندا جاساندى ينتەللەكتتى ەكونوميكانىڭ بارلىق سالاسىنا ەنگىزۋ جانە جاپپاي تسيفرلاندىرۋ مىندەتىن قويدى. وسى ماقساتتا وڭىردە حالىقتىڭ ءومىر ءسۇرۋ دەڭگەيىن ارتتىرۋعا جانە الەۋمەتتىك تۇراقتىلىقتى قامتاماسىز ەتۋگە باعىتتالعان بىرقاتار ماڭىزدى جوبالار جۇزەگە اسىرىلىپ جاتىر، – دەدى اقپاراتتاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى كونستانتين يلنيتسكي.

ول الەۋمەتتىك ماڭىزى بار ازىق-تۇلىك تاۋارلارىنىڭ باعاسىن اۆتوماتتى تۇردە جيناۋ جانە تالداۋ جۇيەسىنىڭ قالاي جۇمىس ىستەيتىنىن ءتۇسىندىردى. نەيروندىق جەلى دەرەكتەردى نەگىزىنەن وڭىرلىك ساۋدا جەلىلەرىنىڭ سايتتارىنان جينايدى. الىنعان اقپارات جەدەل شولۋلار مەن تالدامالىق ەسەپتەر تۇرىندە ۇسىنىلادى، بۇل باعا وزگەرىستەرىنە جەدەل ارەكەت ەتۋگە جانە تۇتىنۋ نارىعىنداعى جاعدايدى تەرەڭ تالداۋعا مۇمكىندىك بەرەدى.

– بۇگىندە جانار-جاعارماي باعاسىن اۆتوماتتى جيناۋ، باقىلاۋعا الىناتىن تاۋارلار ءتىزىمىن كەڭەيتۋ، سونداي-اق بارلىق ساۋدا نۇكتەلەرى مەن تاۋار تۇرلەرىن قامتۋعا مۇمكىندىك بەرەتىن كاسسالىق چەكتەر دەرەكتەرىن ينتەگراتسيالاۋ جۇمىسى جۇرگىزىلۋدە. بۇل ناقتى ورتاشا تۇتىنۋشىلىق سەبەتتى قالىپتاستىرۋعا جول اشادى، – دەپ تولىقتىردى كونستانتين يلنيتسكي.

سپيكەردىڭ ايتۋىنشا، كولىك سالاسىندا دا پيلوتتىق رەجيمدە جولداردىڭ جاعدايىن اۆتوماتتى باقىلاۋ جۇيەسى – JoLScan ىسكە قوسىلعان. كومپيۋتەرلىك كورۋ اۆتوموبيلدەردەگى بەينەتىركەگىشتەردىڭ ۆيدەوجازبالارىن تالداپ، جول توسەمىندەگى اقاۋلاردى انىقتايدى جانە ولاردى ۆەكتورلىق بەلگىلەر ارقىلى سالىستىرا وتىرىپ، تاريحىن قاداعالايدى. سونىمەن قاتار گەولوكاتسيا ارقىلى ولقىلىقتار كارتاعا تۇسىرىلەدى

جۇيەنىڭ كومەگىمەن جەدەل ارالاسۋدى قاجەت ەتەتىن بەس سىندارلى ايماق انىقتالدى.

تاعى ءبىر تسيفرلىق شەشىم كولىك كەپتەلىستەرىمەن كۇرەسكە باعىتتالعان. ينتەللەكتۋالدى پلاتفورما باعدارشامداردىڭ جۇمىسىن باقىلاپ، رەتتەپ وتىرادى. بۇل اسىرەسە تاڭەرتەڭگى جانە كەشكى قاربالاس ۋاقىتتا ماڭىزدى.

سونىمەن قاتار «تازا قازاقستان» ۇلتتىق جوباسى اياسىندا جاسىل ەكپەلەردى تۇگەندەۋگە ارنالعان ءموبيلدى قوسىمشا ازىرلەندى. جۇيە نىسانداردىڭ كوورديناتتارىن، سيپاتتاماسىن جانە فوتوسۋرەتتەرىن تىركەيدى، ال بۇل دەرەكتەر كومپيۋتەرلىك كورۋ جانە جاساندى ينتەللەكت تەحنولوگيالارى ارقىلى وڭدەلەدى.

وبلىس اكىمى ەرماعانبەت بولەكپاەۆ وسى جۇمىستى جالعاستىرىپ، ءوڭىردىڭ بارلىق سالاسىندا تسيفرلاندىرۋ مەن جاساندى ينتەللەكتتى ەنگىزۋدى قامتاماسىز ەتۋدى تاپسىردى.

ەسكە سالا كەتسەك، مەملەكەت باسشىسى جولداۋىندا تسيفرلاندىرۋ مەن جاساندى ينتەللەكتتى دامىتۋعا ارنالعان بىرىڭعاي تۇجىرىمدامالىق قۇجات – Digital Qazaqstan ازىرلەۋدى تاپسىرعان بولاتىن.

Abai.kz