قازاقستاننىڭ ۇلتتىق قۇراماسى دانيادا وتكەن IX ەۋروپالىق كاسىبي شەبەرلىك چەمپيوناتىندا – EuroSkills Herning 2025 جارىسىندا بۇرىن-سوڭدى بولماعان جەتىستىككە قول جەتكىزدى. قازاقستاندىق ستۋدەنتتەر بىردەن 7 «ۇزدىك مەدالون» يەلەندى، دەپ حابارلايدى قر وقۋ-اعارتۋ مينيسترلىگىنىڭ ءباسپاسوز قىزمەتى.

چەمپيوناتقا 32 ەلدەن 25 جاسقا دەيىنگى 600 ۇزدىك جاس مامان قاتىستى. قازاقستاندىق كوللەدج ستۋدەنتتەرى 25 قۇزىرەت بويىنشا باق سىنادى. ولاردىڭ قاتارىندا ۆەب-تەحنولوگيالار، مەحاترونيكا، CAD ينجەنەرلىك گرافيكاسى، جەلىلىك اكىمشىلەندىرۋ، گرافيكالىق ديزاين، دانەكەرلەۋ تەحنولوگياسى، مەيرامحانا سەرۆيسى، كونديتەرلىك ءىس، اۆتومەحانيكا جانە باسقا دا باعىتتار بار.

سۋرەت: قر وقۋ-اعارتۋ مينيسترلىگىنىڭ facebook ارناسىنان الىندى.

جارىس قورىتىندىسى بويىنشا ۇلتتىق قۇراما تومەندەگى قۇزىرەتتەر بويىنشا جوعارى ناتيجە كورسەتتى:

ۆەب-تەحنولوگيالار – مۇحامەتجان اعىباي (استانا ق.، ASTANA POLYTECHNIC جوعارى كوللەدجى). سونىمەن قاتار قازاقستاننىڭ Best of Nation – «ۇزدىك وكىلى» اتاندى.

مەحاترونيكا (توپتىق جۇمىس) – ارتەم موچينسكي (شقو، وسكەمەن جوعارى پوليتەحنيكالىق كوللەدجى) جانە دانيل تۋراپين (استانا ق.، جوعارى پوليتەحنيكالىق كوللەدج).

گرافيكالىق ديزاين – باعىجان قويشىباەۆ (اقتوبە ق.، جوعارى پوليتەحنيكالىق كوللەدج).

جەلىلىك جانە جۇيەلىك اكىمشىلەندىرۋ (توپتىق جۇمىس) – دانيل لاپەنكو (استانا ق.، جوعارى پوليتەحنيكالىق كوللەدج تۇلەگى) جانە گلەب ساۋلەنكو (قوستاناي وبل.، اۆتوموبيل كولىگى كوللەدجىنىڭ تۇلەگى).

CAD ينجەنەرلىك ديزاين – باقداۋلەت قۋانىش (اتىراۋ وبل.، س. مۇقاشەۆ اتىنداعى پوليتەحنيكالىق جوعارى كوللەدج).

ۇلتتىق قۇرامانى وقۋ-اعارتۋ ءمينيسترى عاني بەيسەمباەۆ جەڭىسىمەن قۇتتىقتادى.

سۋرەت: قر وقۋ-اعارتۋ مينيسترلىگىنىڭ facebook ارناسىنان الىندى.

«بۇل جەتىستىك تەحنيكالىق جانە كاسىپتىك ءبىلىم بەرۋ جۇيەسىنىڭ جاڭا دەڭگەيگە كوتەرىلگەنىن ايعاقتايدى. جۇمىسشى ماماندىقتار جىلى ءبىز قازاقستاندىق كوللەدجدەردىڭ زاماناۋي كادر دايارلاۋ ورتالىقتارىنا اينالىپ كەلە جاتقانىن، ال ستۋدەنتتەرىمىزدىڭ حالىقارالىق ارەنادا باكەگە قابىلەتتى ەكەنىن كورىپ وتىرمىز. ستۋدەنتتەردى، پەداگوگتەردى، ساراپشىلار مەن تالىمگەرلەردى تاريحي جەڭىسپەن قۇتتىقتايمىن»، - دەدى مينيستر.

انىقتاما ءۇشىن:

EuroSkills – WorldSkills قوزعالىسى اياسىندا وتكىزىلەتىن ەۋروپاداعى ەڭ ءىرى جاس ماماندار چەمپيوناتى. ونىڭ باستى ماقساتى – كادرلاردى دايارلاۋ سالاسىنداعى زاماناۋي ستاندارتتار مەن جەتىستىكتەردى كورسەتۋ. ەستەرىڭىزگە سالا كەتەيىك، 2023 جىلى قازاقستان 2 مەدالون جەڭىپ الدى.بيىلعى چەمپيونات سولتۇستىك ەۋروپاداعى ەڭ ءىرى كورمە ورتالىقتارىنىڭ ءبىرى MCH Messecenter Herning الاڭىندا ءوتتى.

سۋرەت: قر وقۋ-اعارتۋ مينيسترلىگىنىڭ facebook ارناسىنان الىندى.

Abai.kz