قازاقستان پرەزيدەنتى قاسىم-جومارت توقاەۆتىڭ امەريكان يستيبليشمەنتىمەن كەزدەسۋى وسىلاي باعالاندى. ونى مەن ەمەس، اقش باسشىسى دونالد ترامپ ايتىپ وتىر. الەمدەگى ءىرى، كاپيتاليزاتسياسى توپ 500 كومپانيالار قازاقستانعا قاتىستى ءۇنسىز قالماي، جوسپارلارى مەن جوبالارىن ناقتى كونتراكتقا اينالدىرۋدا.

مىسالى، Amazon قازاقستاندى سپۋتنيكتىك بايلانىستىڭ وڭىرلىك حابىن قالىپتاستىرۋعا بولاتىن الاڭ رەتىندە قاراستىرادى. بۇل تۋرالى توقاەۆقا Amazon كومپانياسىنىڭ اعا ۆيتسە-پرەزيدەنتى دەۆيد زاپولسكي حابارلادى. جانە سول ساپاردا بىردەن "قازاقتەلەكوم" جانە Amazon Kuiper كومپانيالارى Kuiper سپۋتنيك جەلىسىنىڭ قىزمەت كورسەتۋىنە قاتىستى ديستريبيۋتورلىق كەلىسىمگە قول قويدى. Amazon Kuiper كومپانياسى الماتى، اقكول جانە اقتاۋ قالالارىندا ءوزىنىڭ جەردەگى ينفراقۇرىلىمىن جاساقتاۋدى كوزدەيدى. بۇل جوباعا 200 ميلليون دوللارعا جۋىق ينۆەستيتسيا سالۋ جوسپارلانعان.

ەڭ ءىرى كونتراكتتى Wabtec الپاۋىتىنان الدىق. قازاقستان اقش ساۋدا ءمينيسترى گوۆارد ليۋتنيكتىڭ قاتىسۋىمەن وتكەن كەزدەسۋدە Wabtec كومپانياسىمەن جالپى سوماسى 4,2 ميلليارد دوللارعا جۋىق كەلىسىمگە قول قويدى. ەندى بىزدە تەحنيكالىق تۇرعىدان جەتىلدىرىلگەن 300 لوكوموتيۆ شىعارۋ جانە وعان سەرۆيستىك قىزمەت كورسەتۋ قاراستىرىلعان. 2009 جىلدان بەرى استانادا Wabtec Kazakhstan لوكوموتيۆ قۇراستىرۋ زاۋىتى تابىستى جۇمىس ىستەپ كەلەدى. وسى ارالىقتا كومپانيا وندىرىسكە 230 ميلليون دوللاردان استام ينۆەستيتسيا قۇيدى. كاسىپورىن بۇگىنگە دەيىن "قازاقستان تەمىر جولىنا" جانە ەكسپورتقا ارنالعان 600-دەن استام لوكوموتيۆ قۇراستىردى. ءوندىرىستىڭ لوكاليزاتسيا دەڭگەيى 45 پايىزعا جەتتى. ال بىلتىر شىلدە ايىندا Wabtec كومپانياسى ەلىمىزدە يننوۆاتسيالاردى ەنگىزىپ، كادر دايارلاۋعا ۇلەس قوساتىن تەحنولوگيالىق جانە ينجەنەرلىك ورتالىعىن اشتى.

دوستىق-مويىنتى تورابىن اشىپ، ەندى قىتايدان 5 ەسە كوپ جۇك تاسي الاتىن ەلىمىز ءۇشىن لوكوموتيۆتەر مەن جۇك ۆاگوندارى، پلاتفورمالار اۋاداي قاجەت بولىپ تۇر. وسى كونتراكت وتە دەر كەزىندە جاسالىپ وتىر.

شەۆرون. بۇل ءبىر تاريحي كەزدەسۋ بولدى. شەۆرون ارينە تشو-دا باستى اكتسيونەر بولىپ قالعىسى كەلەدى. قانشاما ينۆەستيتسيا جاسالدى. بىراق 2028 جىلدان بەرى ناقتى تالقىلانا باستايتىن، ال 2032 جىلى قايتا جاسالاتىن جاڭا عاسىر كەلىسىمىندە قازاقستاننىڭ تەڭىز جاۋھارىنداعى ۇلەسى بۇگىنگىدەن كوبىرەك بولۋى ءتيىس. وسى ماسەلەلەر بويىنشا ويلار ايتىلعان سياقتى.

امەريكان الپاۋىتتارىمەن كەزدەسۋ تۋرنەسىنىڭ نۇكتەسىن ترامپپەن جۇزدەسۋ قويدى. ارتىنان ترامپ توقاەۆتى تاريحتاعى ءىرى كەلىسىمگە قول جەتكىزۋىمەن قۇتتىقتادى. وسىلايشا ءبىزدىڭ پرەزيدەنت ءبىراز شارۋانى جايعاپ، بىرىككەن ۇلتتار ۇيىمىنداعى دەباتقا جاقسى كوڭىل-كۇيمەن اتتانعان ەدى.

ايبار ولجاەۆتىڭ جەلىدەگى پاراقشاسىنان الىندى.

Abai.kz