قىرعىزستاندا جوگوركۋ كەڭەش دەپۋتاتتارى ءوزىن-ءوزى تاراتۋ تۋرالى شەشىم قابىلدادى.

ءوزىن-ءوزى تاراتۋ تۋرالى زاڭ جوباسىن 84 دەپۋتات قولدادى، ەشكىم قارسى بولمادى. وتىرىسقا 90 دەپۋتاتتىڭ 89-ى قاتىستى.

بۇعان دەيىن پارلامەنت سپيكەرى نۇرلانباي تۇرعىنبەكۇلى وزىنە جوگوركۋ كەڭەشتى تاراتۋ تۋرالى 32 دەپۋتاتتىڭ قولى قويىلعان ءوتىنىش كەلىپ تۇسكەنىن ايتقان.

جوگوركۋ كەڭەشتى تاراتۋدى ۇسىنعان دەپۋتاتتاردىڭ باستاما توبى سپيكەرگە حاتىندا كەزەكتى پارلامەنت سايلاۋى 2026 جىلى قاراشادا وتەتىنىن، ال پرەزيدەنت سايلاۋى 2027 جىلى قاڭتاردا بولاتىنىن ايتىپ، ورتالىق سايلاۋ كوميسسياسى ەكى ساياسي شارانى قىسقا مەرزىمدە وتكىزە المايتىنىن ايتقان.

سپيكەر بۇل باستامانى قولدايتىنىن ايتىپ، قاتارىنان ەكى سايلاۋ وتكىزۋ ساياسي جانە ەكونوميكالىق قيىندىقتار تۋعىزاتىنىن دا جەتكىزدى.

زاڭعا سايكەس، پارلامەنت ءوزىن تاراتۋ تۋرالى شەشىم قابىلداعاننان كەيىن پرەزيدەنت بەس كۇن ىشىندە كەزەكتەن سايلاۋدى تاعايىنداۋى كەرەك. سايلاۋ 2025 جىلدىڭ 30 قاراشاسىندا وتەدى دەگەن بولجام ايتىلادى.

كەزەكتەن تىس سايلاۋ جاڭا جۇيە بويىنشا وتەدى- 30 كوپمانداتتى وكرۋگتان 90 دەپۋتات سايلانادى. جاڭا زاڭناما گەندەرلىك كۆوتانى دا قاراستىرادى.

جوگوركۋ كەڭەشتىڭ 7-شاقىرىلىمى 2021 جىلى سايلاندى. ونىڭ قۇرامى 90 دەپۋتاتتان تۇرادى، وندا «اتا جۇرت-قىرعىزستان»، «سەنىم»، «ىنتىماق»، «اليانس»، «ءبۇتىن قىرعىزستان»، «يمان نۇرى» پارتيالارى مەن ءبىرمانداتتى وكرۋگتان سايلانعان دەپۋتاتتار بار.

Abai.kz