سوعىس دەگەن ءسوزدىڭ ءوزى قاسىرەت پەن قايعى ارقالاعان اۋىر ءسوز عوي. سول سوعىس مارينكادا 2014 جىلدان باستالعان.

مارينكا دەگەن دونەتسكىنىڭ ءدال تۇبىندە، شامامەن 30 شاقىرىم جەردە ورنالاسقان الاقانداي عانا كەنت. سوعىسقا دەيىن مۇندا ۇزىن-ىرعاسى 10 مىڭنان اسا ادام ءومىر سۇرگەن. حالىقتىڭ 85 پايىزى ۋكرايندەر بولعان. مۇندا قىز-قىز قايناعان تىرشىلىك، تەاتر دا، ساياباق تا، مادەني وشاقتار دا، الەۋمەتتىك نىساندار دا ت.ب. ءبارى بولعان. ويتپەي قايتسىن، كۇرە جولدىڭ بويىندا (ن15 تراسساسى) ورنالاسقان قالاشىق. دونەتسكىگە زاپوروج جاقتان كىرەتىن ءبىر قاقپا وسى مارينكا بولعان.

بالىنەڭ ءبارى «ورىس الەمىن» اڭساۋشىلار مەن ورىس اسكەرى قولتىقتارىنا سۋ بۇرككەن بۇلىكشىلەردەن باستالدى...

«ورىس الەمىنىڭ» كەلۋى. العاشقى شايقاس...

2014 جىلدىڭ جازىندا (شىلدە-تامىز اراسى) ماسكەۋدەن «اتىلعان» وق مارينكاعا جەتتى. قيان-كەسكى، جان الىسىپ، جان بەرىسكەن شايقاستار بولدى. قالاشىق بىردە ۋكراينانىڭ، بىردە جاۋدىڭ قولىنا كەزەك-كەزەك ءوتىپ، قىز-قىز قايناعان تىرشىلىك شاتىر-شۇتىر جانعان توزاق وتىنا اينالدى. قوس تاراپ ايانىپ قالعان جوق. ادام شىعىنى دا از بولعان جوق. ولاردىڭ اراسىندا قارۋسىز حالىق قىرىلىپ جاتتى. اۋىر تەحنيكالاردىڭ تارسىل-گۇرسىلى ءبار ءسات توقتاعان جوق.

2015-ءتىڭ قان-جاۋىندى جازى...

ال 2015 جىلدىڭ جازىندا (ماۋسىمى) ەڭ اۋقىمدى ۇرىستاردىڭ ءبىرى بولدى. بەتپە-بەت ۇرىس ماۋسىمنىڭ ءۇشىنشى تاڭى اتار-اتپاس (تاڭعى ساعات 3-4 اراسىندا) باستالدى. مارينكا-كۋراحوۆو باعىتى، مارينكانىڭ اينالاسى، دونەتسكىگە دەيىنگى ارالىق قىزىل قانعا بويالدى. بۇل شايقاستىڭ سوڭىندا تاراپتار اۋەلگى پوزيتسيالارىنا شەگىنگەنىمەن، سوعىس توقتاعان جوق. تاراپتار قولدا بار قارۋلاردىڭ ءبارىن قولداندى. سودان بەرى مارينكادا تىرشىلىك توقتاپ، قالاشىق ۇرىس دالاسىنا اينالدى. ءدال وسى شايقاستا رەسەي ەداۋىر كوپ اسكەرىن جوعالتتى. ارينە، سانىن بىزگە ەشكىم اشىپ ايتپايدى. بىراق، سولاي بولعانى فاكت.

سۋرەت: tass.ru سايتىنان الىندى.

مارينكانىڭ تىرشىلىگىن ءبىرجولا توقتاتقان شايقاس

سول 2014-2015-تە باستالعان سوعىس توقتاۋسىز جالعاسىپ، 2022 جىلعا دەيىن جەتتى. مارينكا ءۇشىن شەشۋشى شايقاستاردىڭ ءبىرى 2022 جىلدىڭ كوكتەمىندە (ناۋرىزدا) بولدى. بۇل مارينكانىڭ تىرشىلىك تىنىسىن ءبىرجولا ۇزگەن شايقاس ەدى.

رەسەي بۇل جولى مارينكانى دا، ونداعى ادامداردى دا اياعان جوق. رەسەي وسى جولى حيميالىق قارۋ تۇرلەرىنە جاتقىزۋعا بولاتىن اق فوسفورلى سناريادتاردى قولداندى.

2023 جىلدىڭ ناۋرىزىندا ماريكادا بىردە-ءبىر بۇگىن عيمارات قالعان جوق قالاشىق تۇتاستاي ءۇيىندى-قيراندىعا اينالدى. 2023 جىلدىڭ جەلتوقسانىندا قالا رەسەي باقىلاۋىنا ءوتتى.

قازىر: قازىر سول ەلەس قالاداعى ءۇيىندى-قيراندىلاردىڭ اراسىندا جالعىز باقىتسىز ايەل تۇرادى. ونىڭ اتى – گالينا. ونىڭ ءوزى «ورىس الەمىن» اڭساۋشى ەكەن. رەسەي اسكەرى گالينانىڭ «ارمانىن» ورىنداعانىمەن، تۇتاس قالانى جەر بەتىنەن جويىپ تىندى...

Abai.kz