بۇگىن پارلامەنت ءماجىلىسى ەكىنشى وقىلىمدا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قابىلدادى. بۇل تۋرالى ءماجىلىس دەپۋتاتى ەرلان ستامبەكوۆ حابارلاپ، اۆتورلىق قۇقىقتى قورعاۋ سالاسىندا قابىلدانىپ جاتقان ماڭىزدى قادامدار جايلى ءسوز ەتتى.

ەرلان ستامبەكوۆ:

– ەندى قازاقستاندا اۆتورلىق قۇقىقتى قورعاۋ سالاسىندا ماڭىزدى قادام جاسالدى دەپ سەنىممەن ايتۋعا بولادى. بۇگىن پارلامەنت ءماجىلىسى ەكىنشى وقىلىمدا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قابىلدادى.

وسى ءبىر قۇرعاق سوزدەردىڭ استارىندا ءبىزدىڭ، ءماجىلىس جانە سەنات دەپۋتاتتارىنىڭ، ادىلەت مينيسترلىگىنىڭ، سونداي-اق شىعارماشىلىق زيالى قاۋىم وكىلدەرىنىڭ، اۆتورلاردىڭ، جانە اۆتورلىق قوعامداردىڭ اۋقىمدى جۇمىسى تۇر.

بۇل وزگەرىستەردىڭ قابىلدانۋىنىڭ ارقاسىندا ەلىمىزدە بىرىڭعاي تسيفرلىق پلاتفورما قۇرىلاتىن بولادى، ول ءبىزدىڭ ويىمىزشا، بارلىق اۆتورلىق قۇقىق وبەكتىلەرىن پايدالانۋدىڭ تولىق اشىقتىعىن قامتاماسىز ەتۋگە، پروتسەسسكە قاتىسۋشىلاردىڭ بارلىعىنىڭ – قۇقىق يەلەنۋشىلەردىڭ (اۆتورلاردىڭ), پايدالانۋشىلاردىڭ جانە، ارينە، ەلىمىزدىڭ اۋماعىندا اۆتورلار مەن قۇقىق يەلەنۋشىلەردىڭ مۇلىكتىك قۇقىقتارىن قامتاماسىز ەتۋدىڭ كەپىلى رەتىندەگى مەملەكەتتىڭ ءوزارا قارىم-قاتىناستارىنا ءتارتىپ ورناتۋى ءتيىس.

سونداي-اق، زاڭدا اۆتورلىق قوعامدار مەن اۆتورلار اراسىنداعى گونورارلاردى ءبولۋ پروپورتسياسى بويىنشا نورما بەكىتىلدى.

ەندى ول: اۆتورلىق قوعامدارعا 20% جانە اۆتورلارعا 80% قۇرايتىن بولادى.

بۇعان دەيىن ول 30/70 بولعان.

بۇل زاڭ جوباسىن ىلگەرىلەتۋ كەزىندە ءبىز وسى وزگەرىستەردى قالامايتىن، ەسكى ادىسپەن، «جاسىرىن»، اۆتورلارىمىزدىڭ قۇقىقتارىن بۇزا وتىرىپ جۇمىس ىستەۋدى ءجون كورەتىن كۇشتى قارسىلىقتارعا تاپ بولدىق.

بىراق بۇل ءالى دە قۇقىق قورعاۋ ورگاندارىنىڭ بەيتاراپ تەكسەرۋىن كۇتىپ تۇرعان بولەك اڭگىمە.

ادىلدىك ءۇشىن ايتا كەتۋ كەرەك، زاڭداعى وزگەرىستەر اۆتورلىق قوعامدارداعى اۆتورلىق گونورارلاردى ءبولۋدىڭ تامىر جايعان اشىقتىعى مەن ادىلەتسىزدىگىنە قاتىستى اۆتورلاردىڭ، پايدالانۋشىلاردىڭ كوپتەگەن وتىنىشتەرىنە جاۋاپ رەتىندە دە بولدى.

بۇگىندە پارلامەنت ءماجىلىسى قابىرعاسىندا «كرەاتيۆتى يندۋستريالار تۋرالى» زاڭ جوباسى دا بار، ونىڭ بىرلەسكەن اۆتورلارىنىڭ ءبىرى مەن دە بولامىن.

نەگىزىندە، ونىمەن جۇمىس ىستەۋ دە اۆتورلىق قۇقىق تۋرالى زاڭعا وزگەرىستەر ەنگىزۋگە كاتاليزاتور بولدى.

ويتكەنى، اۆتورلىق قۇقىق – ەلىمىز ءۇشىن دامۋدىڭ جاڭا قوزعاۋشى كۇشىنە اينالۋى ءتيىس كرەاتيۆتى يندۋستريالار نەگىزدەلەتىن فۋندامەنت بولىپ تابىلادى.

بۇل تۋرالى ءبىزدىڭ پرەزيدەنتىمىز دە بىرنەشە رەت ايتقان جانە ايتىپ كەلەدى.

ارينە، الدا ادىلەت مينيسترلىگى مەن زياتكەرلىك مەنشىك ۇلتتىق ينستيتۋتىنىڭ الدىندا ەلىمىزدە بىرىڭعاي تسيفرلىق پلاتفورمانى ەنگىزۋ بويىنشا ۇلكەن مىندەتتەر تۇر.

وسى مۇمكىندىكتى پايدالانا وتىرىپ، اۆتورلىق قۇقىق سالاسىنداعى اشىقتىق باعىتىن قولدايتىن بارلىق اۆتورلاردى، پايدالانۋشىلاردى وسى پروتسەسكە بەلسەندى قاتىسۋعا شاقىرامىن.

بىرگە ءبىز وسى وتە ماڭىزدى ىسكە ناعىز ءتارتىپ ورناتا الامىز.

جۇمىس ەندى عانا باستالدى!

Abai.kz