ناتو-نىڭ باس حاتشىلارىنىڭ قاي-قايسى دا مىنەزدى بوپ كەلەدى. الەمدەگى ەڭ ءىرى، ەڭ قۋاتتى اسكەري اليانس سانالادى. قارۋ-جاراعى دا، اسكەري بيۋدجەتى دە، اسكەر سانى دا، تەحنيكاسى دا تۇگەل اليانس. ونى باسقاراتىن ادام دا وسال بولماۋى زاڭدىلىق.

قازىر ناتو تىزگىنى مارك ريۋتتەنىڭ قولىندا. وسى ريۋتتە رەسەيدى جان-تانىمەن جەك كورەتىن ادام. ول ناتو-نى تىزگىندەمەي تۇرىپ-اق، رەسەيگە قارسى وتكىر سىندار ايتىپ، ۋكرايناعا كوپتەپ قارۋ-جاراق بەرۋ باستاماسىن قولداعان.

ال ناتو-نى باسقارعالى-بەرى رەسەيدىڭ ءتۇرلى لاۋازىمداعى ساياساتكەرلەرى مەن اسكەري تۇلعالارىن اشىق مازاقتاپ، الەم الدىندا ءاجۋالاپ ءجۇر. سولاردىڭ ءبىرسىپىراسىن قاراڭىزدار:

رەسەيلىك ۇشقىشتار مەن كاپيداندار – ەبەدەيسىز!

وتكەندە رەسەيدىڭ «نوۆوروسسيسكى» دەگەن سۋڭگۋىر كەمەسى ەۋروپا مەن ناتو اۋماعىن بارلاۋعا شىعىپ، ورتا جولدا بۇزىلىپ، اقىرى فرانتسيا جاعالاۋىنان بىراق-شىققان. سوڭىندا ونى ناتو كەمەلەرىنىڭ باقىلاۋىمەن، سۇيرەپ اكەتكەن.

سوندا ريۋتتە: «توم كلەنسيدىڭ «قىزىل قازانعا اڭشىلىق» اتتى 1984 جىلعى رومانىمەن بۇل جايتتى سالىستىرۋعا كەلمەس. قازىر بۇل كورىنىس جاقىن جەردەگى مەحانيككە اڭشىلىققا كوبىرەك ۇقسايدى»، - دەدى ريۋتتە.

كلەنسيدىڭ رومانىندا كەڭەس اسكەرىنە تيەسىلى سۇڭگۋىر قايىقتىڭ كومانديرى اقش-قا قاشۋدى ويلايدى. رومان سۇڭگۋىر قايىققا قاتىستى جازىلعان ەدى.

ال ريۋتتە قازىرگى رەسەيلىك سۇڭگۋىر قايىقتىڭ كەيپىن مىسقىلداپ: «ول سىنعان كۇيى، ۇيىنە ارەڭ قايتىپ بارادى. جالپى رەسەي اسكەرىن اسىرە باعالاۋدىڭ كەرەگى جوق. رەسەيلىك ۇشقىشتار ۇشاقتى دۇرىس باسقارا المايدى. ال كەمەلەرى دۇرىستاپ زاكىر تاستاي المايدى»، - دەپ مازاقتادى.

مەدينسكي مەن لاۆروۆتى مازاقتاۋ

تۇركيادا بيىل وتكەن ۋكراينا-رەسەي كەلىسسوزدەرىنە ماسكەۋ باس كەلىسسوزشى ەتىپ ۆلاديمير مەدينسكي دەگەن ورتاڭقول تاريحشىنى جىبەرگەن. ول كەلىپ، ءبالدۋ-ءبالدۋ بىلشىلىن ايتىپ كەتكەن.

سوندا ريۋتتە: «رەسەي الەم كوز تىككەن ەڭ ماڭىزدى كەزدەسۋگە قايداعى-ءبىر تاريحشىسىماقتى جىبەرىپتى. ول كەلىپ ءوزى 1250 جىلعى بىردەڭەلەردى ايتىپ ءجۇر»، - دەپ كۇلكى ەتكەن.

ريۋتتەنىڭ كەلەمەجىنە اينالعانداردىڭ ءبىرى رەسەيدىڭ ءسىم باسشىسى سەرگەي لاۆروۆ. ءبىر جولى ريۋتتە: «لاۆروۆ دەگەن – يسا ءماسىحتىڭ كەزىنەن بەرى رەسەيدىڭ سىرتقى ىستەر ءمينيسترى بولىپ كەلەدى. سودان بەرى ونىڭ اۋزىنان دەنى دۇرىس ءسوز شىققان جوق»، - دەدى.

تاعى بىردە: «لاۆروۆتىڭ سوزدەرىنە كوپ نازار اۋدارا بەرمەگەن ءجون. ول ناتو كۇيرەيدى دەپ سويلەگەن. كەرىسىنشە، ناتو قازىر كەڭەيىپ، قورعانىس بيۋدجەتىن ەسەلەپ جاتىر. سوندىقتان، ونىكى ءبوسسوز»، - دەگەن.

تاعى بىردە: «مەن لاۆروۆتى ب.ز.د. دينوزاۆرلار كەزىنەن كەلە جاتقانىن ساياساتكەر ەكەنىن بىلەمىن»، - دەپ كۇلدى.

قازىرگە ەسكە تۇسكەندەرى وسى.

Abai.kz