قازاقستاندا ەسكىرگەن تۇرمىستىق گاز باللوندارىن پايدالانۋ ماسەلەسى وزەكتى بولىپ وتىر. بۇل تۋرالى ۇكىمەت وتىرىسىندا توتەنشە جاعدايلار ءمينيسترى شىڭعىس ءارىنوۆ مالىمدەدى.

ونىڭ ايتۋىنشا، وڭىرلەردە گاز باللون جارىلۋ وقيعالارىنىڭ ورىن الۋى جيىلەگەن.

«بيىل قىزمەتكەرلەر ءورت ورنىنان شامامەن 1,5 مىڭ گاز باللونىن شىعارىپ، ادام ولىمىنە جول بەرمەدى. بىلتىر ەسكىرگەن تۇرمىستىق گاز باللوندارىن پايدالانۋ مەن ولاردى تاڭبالاۋ ماسەلەسىن كوتەرگەن بولاتىنمىن. قازىر ەكى قالادا – ششۋچينسك جانە ستەپنوگورسكتە ولاردى قولدانىلۋدى باقىلاۋدىڭ بىرىڭعاي ەسەبىن جۇرگىزۋگە مۇمكىندىك بەرەتىن گاز باللونداردى تاڭبالاۋ جونىندەگى پيلوتتىق جوبا ىسكە قوسىلدى. الايدا قازاقستاندىق گاز باللوندار ءوندىرۋ جانە توزىعى جەتكەندەرىن جويۋ ماسەلەلەرى شەشىلمەگەن كۇيىندە قالىپ وتىر», - دەپ اتاپ ءوتتى ۆەدومستۆو باسشىسى.

سونىمەن قاتار مينيستر گاز باللونداردىڭ قولدانىلۋىن باقىلاۋ ەنەرگەتيكا مينيسترلىگىندە، ءوندىرۋ ماسەلەسى – ونەركاسىپ جانە ۇلتتىق ەكونوميكا مينيسترلىكتەرىندە ەكەنىن العا تارتتى.

«وسىعان بايلانىستى، اكىمدىكتەردىڭ جانىنداعى تۇرعىن ءۇي كوميسسيالارى گاز تۇتىنۋ جۇيەلەرى مەن جابدىقتارىن قاۋىپسىز پايدالانۋ تالاپتارىنىڭ ساقتالۋىنا باقىلاۋدى كۇشەيتۋى قاجەت. جىلىتۋ ماۋسىمى ايرىقشا باقىلاۋىمىزدا تۇرعانىن اتاپ وتكىم كەلەدى», - دەپ جالعادى شىڭعىس ءارىنوۆ.

Abai.kz