بۇگىن رەسپۋبليكا كۇنى جانە ەگەمەندىك تۋرالى دەكلاراتسيانىڭ 35 جىلدىعىنا وراي تالدىقورعانداعى «جاستار» ساياباعىندا مەملەكەتتىك تۋ كوتەرۋ ءراسىمى ءوتتى.

وعان وبلىس اكىمى بەيبىت يساباەۆ، ارداگەلەر، زيالى قاۋىم وكىلدەرى، مەملەكەتتىك قىزمەتشىلەر، دەپۋتاتتار، جاستار جانە باسقا دا ءتۇرلى سالا قىزمەتكەرلەرى، جالپى سانى مىڭ شاقتى ادام قاتىستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

فوتوتىلشىلەر: جۇماباي مۇسابەكوۆ، دميتري ەروفەەۆ

الدىمەن جەتىسۋ وبلىستىق فيلارمونياسىنىڭ،«تالدىقورعان اۋەندەرى» فولكلورلى-ەتنوگرافيالىق ءانسامبلىنىڭ ونەرپازدارىمەن جانە جوعارى سىنىپ وقۋشىلارىنىڭ حورىمەن بىرگە اكتسياعا قاتىسۋشى بارشا جۇرتشىلىق مەملەكەتتىك گيمندى ورىندادى. وسى مەزەتتە ەلىمىزدىڭ مەملەكەتتىك تۋى كوككە كوتەرىلەدى. اتاپ وتسەك، تۋ تۇعىرىنىڭ بيىكتىگى 92 مەتر،تۋدىڭ ۇزىندىعى – 25 مەتر، ەنى – 12,5 مەتر.

فوتوتىلشىلەر: جۇماباي مۇسابەكوۆ، دميتري ەروفەەۆ

مۇنان سوڭ جەرگىلىكتى ونەر ۇجىمدارى مەن ارتىستەرى پاتريوتتىق مازمۇنداعى اندەردى شىرقادى.

بۇگىنگى شاراعا قالا تۇرعىنى ليديا مارينينا ەكى كىشكەنتاي ۇلىن ەرتىپ كەلگەن.

- بالالارىم ازىرگە مەكتەپ جاسىنا جەتكەن جوق، بىراق وسىنداي كىشكەنتاي كەزىنەن بويلارىنا پاتريوتتىق سەزىمدى ءسىڭىرۋ كەرەك دەپ ەسەپتەيمىن. بۇگىن سول ءۇشىن ولاردى ساياباققا ەرتىپ كەلدىم. رەسپۋبليكا كۇنىنە ارنالعان سالتاناتتى كورىپ، كوپشىلىكپەن بىرگە مەرەكەنى اتاپ وتتىك، - دەيدى ول.

فوتوتىلشىلەر: جۇماباي مۇسابەكوۆ، دميتري ەروفەەۆ

ال زەينەتكەر ءماريا وماروۆا وسىنداي ءىس-شارا وتەتىنىن الەۋمەتتىك جەلىدەن وقىپ-بىلگەن.

- «جاستار» ساياباعىنا مەملەكەتتىك ءانۇرانىمىزدى شىرقاۋعا، تۋىمىزدىڭ كوككە كوتەرىلگەنىن كورۋگە كەلدىم. وسىندا كەلگەن ەلجاندى جاستاردى كورىپ، كوڭىلىم قۋاندى. ەڭسەلى ەلىم بار بولعانىنا، جايقالىپ ءوسىپ كەلە جاتقان ۇرپاقتارىمىزدىڭ بار ەكەنىنە ريزا سەزىمدە بولدىم، - دەدى ول.

ەسكە سالساق، وسى كۇنى مۇنداي پاتريوتتىق اكتسيالار ءبىر مەزگىلدە ءوڭىردىڭ بارلىق اۋدان-قالالارىندا وتكىزىلدى.

Abai.kz