مولدوۆا ۇكىمەتى رەسەيمەن مادەني ورتالىقتار تۋرالى كەلىسىمدى جارامسىز دەپ تانۋ تۋرالى زاڭ جوباسىن ماقۇلدادى، - دەپ حابارلايدى ازاتتىق راديوسى.

وعان سايكەس، كيشينەۆتەگى «ورىس ءۇيى» جابىلادى. قۇجات پارلامەنتتىڭ قاراۋىنا جىبەرىلەدى دەپ حابارلادى Radio Moldova.

مادەنيەت ءمينيسترى كريستيان دجاردان ورتالىقتىڭ 1998 جىلعى كەلىسىم بويىنشا اشىلعانىن، ونىڭ مەرزىمى 2026 جىلى اياقتالاتىنىن جانە ۇزارتىلمايتىنىن ايتتى. شەنەۋنىكتەر كيشينەۆتەگى «ورىس ءۇيىن» «كرەملدىڭ ىقپال ەتۋىنىڭ گيبريدتىك قۇرالى» دەپ سانايدى. مولدوۆانىڭ رەسەيدە مۇنداي مادەني ورتالىعى جوق.

كرەملدىڭ وكىلى دميتري پەسكوۆ مولدوۆا بيلىگى «رەسەيگە قاتىستىنىڭ ءبارىن جوققا شىعارىپ جاتىر» دەپ مالىمدەدى. ال «روسسوترۋدنيچەستۆو" ۇيىمى ازىرگە «ورىس ءۇيى» قالىپتى جۇمىس ىستەپ جاتقانىن حابارلادى.

بۇعان دەيىن مولدوۆا بيلىگى رەسەيدى سايلاۋعا ارالاسىپ، ەلدى تۇراقسىزداندىرۋعا تىرىستى دەپ ايىپتاعان ەدى.

Abai.kz