الماتى اكىمى دارحان ساتىبالدى بوستاندىق اۋدانىنا جاساعان جۇمىس ساپارى بارىسىندا «ساكۋرا» تۇرعىن ءۇي كەشەنىنە بارىپ، تۇرعىندارمەن جانە باسقارۋشى كومپانيامەن كەزدەستى. تۇرعىنداردىڭ نەگىزگى ءوتىنىشى — جىلۋمەن ۇزدىكسىز قامتۋ جانە كەشەننىڭ ينجەنەرلىك جۇيەلەرىنىڭ تۇراقتى جۇمىسى بولدى.

كەزدەسۋ بارىسىندا تۇرعىندار جىلۋ مەن سۋمەن جابدىقتاۋدىڭ تۇراقتىلىعى جانە قازاندىق جابدىقتارىنىڭ جاعدايىنا قاتىستى ماسەلە كوتەردى. قۇرىلىس كومپانياسى مەن قالانىڭ ءتيىستى قىزمەتى اتقارىلعان جۇمىس تۋرالى باياندادى. قازىرگى تاڭدا ءۇش قازاندىق تولىق جۇمىس ىستەپ تۇر. سونداي-اق، تۇرعىن ءۇي كەشەنى ورتالىق سۋ جۇيەسىنە قوسىلعان، اپاتتى جاعداي تۋىنداعاندا قولدانىلاتىن قوسالقى جەلى دە قامتاماسىز ەتىلگەن.

بۇدان بولەك، قۇرىلىس كومپانياسى گاز بويىنشا بەرەشەكتىڭ ءبىر بولىگىن وتەدى، باسقارۋشى كومپانيانىڭ قارجىلىق مىندەتتەمەلەرىن رەتتەۋ بويىنشا جۇمىس جالعاسۋدا. بەرەشەكتى ءوندىرىپ الۋ تۋرالى سوت شەشىمى ورىندالدى، جاعداي قالا تاراپىنان باقىلاۋدا تۇر.

(سۋرەت:ۇيىمداستىرۋشىلاردان الدىندى )

قالا اكىمى تۇرعىن ءۇي قورى نىساندارىن ۋاقىتىلى قىزمەت كورسەتۋمەن قامتاماسىز ەتۋ جانە تۇرعىندار الدىنداعى مىندەتتەمەلەردى ساقتاۋ ماڭىزدى ەكەنىن اتاپ ءوتتى. ءتيىستى باسقارمالارعا ينجەنەرلىك جۇيەلەردى تۇراقتى مونيتورينگتەن وتكىزىپ، وتىنىشتەرگە جەدەل جاۋاپ بەرۋدى جانە مۇنداي جاعدايلاردىڭ قايتالانباۋىن قامتاماسىز ەتۋدى تاپسىردى.

تۇرعىندار قالالىق قىزمەتتەردىڭ جەدەل ارالاسقانى جانە جىلۋمەن قامتۋدىڭ قالپىنا كەلتىرىلگەنى ءۇشىن العىس ءبىلدىرىپ، جۇيەنىڭ تۇراقتانۋى وڭ ناتيجە بەرىپ جاتقانىن اتاپ ءوتتى.

Abai.kz