كرەملدىڭ ءباسپاسوز حاتشىسى دميتري پەسكوۆ: «رەسەي پرەزيدەنتى ۆلاديمير پۋتين يادرولىق سىناقتارعا دايىندىق باستاۋعا بۇيرىق بەرگەن جوق»، - دەپ مالىمدەدى.

پەسكوۆتىڭ سوزىنشە، ەگەر اقش ونداي سىناق وتكىزسە، رەسەي دە سولاي ىستەۋگە ءماجبۇر بولادى.

9 قاراشادا رەسەيدىڭ مەملەكەتتىك ۆگترك تەلەارناسىنىڭ ءتىلشىسى پاۆەل زارۋبينگە بەرگەن سۇحباتىندا پەسكوۆ: «الدىمەن بىزگە ولاي ىستەۋ قاجەت پە، جوق پا ەكەنىن ءتۇسىنۋ كەرەك. بۇل وتە ماڭىزدى، نەگىزدەلگەن جانە سالماقتى شەشىم بولۋى ءتيىس. قازىر ءبىزدىڭ ماماندار وسىمەن اينالىسىپ جاتىر»، -دەدى.

بۇعان قوسا پەسكوۆ اقش پرەزيدەنتى وزگە ەلدەر يادرولىق سىناقتار جۇرگىزىپ جاتىر دەپ ايتقاندا نەنى مەڭزەگەنى ماسكەۋگە تۇسىنىكسىز قالىپ وتىرعانىن جەتكىزدى.

وتكەن اپتادا ۆلاديمير پۋتين قاۋىپسىزدىك كەڭەسىنىڭ وتىرىسىندا يادرولىق سىناقتار تاقىرىبىن تالقىلاعان. قورعانىس ءمينيسترى اندرەي بەلوۋسوۆ اقش پرەزيدەنتى دونالد ترامپتىڭ الەمدە وزگە ەلدەر يادرولىق سىناقتار وتكىزىپ جاتقاندىقتان، اقش تا يادرولىق سىناقتاردى قايتا باستايتىنىن ايتقان سوزىنە سىلتەپ، رەسەي دە جاڭا جەر ارالىندا يادرولىق سىناق وتكىزۋگە دايىندىقتى دەرەۋ باستاعانى ءجون دەگەن ۇسىنىس جاساعان. رەسەي فەدەرالدىق قاۋىپسىزدىك قىزمەتىنىڭ (فسب) ديرەكتورى الەكساندر بورتنيكوۆ ترامپتىڭ نەنى مەڭزەگەنى تۇسىنىكسىز ەكەنىن ايتقان. جيىن قورىتىندىسىندا پۋتين رەسەيدىڭ سىرتقى ىستەر مينيسترلىگىنە، قورعانىس مينيسترلىگىنە، ارنايى قىزمەتتەرى مەن ازاماتتىق مەكەمەلەرىنە يادرولىق سىناقتارعا دايىندىق مۇمكىندىگى جونىندە ۇسىنىستار دايىنداۋدى تاپسىرعان، بىراق تىكەلەي بۇيرىق بەرمەگەن.

دەرەككوزى: ازاتتىق راديوسى

Abai.kz