بۇگىن تاڭەرتەڭ The Washington Post باسىلىمىندا «قازاقستاننىڭ «يبراھيم كەلىسىمى جولىنداعى قىزىقتى ساياحاتى» اتتى ءىرى ماقالا جاريالاندى.

ماتەريالدا ەلدىڭ كەلىسىمگە قوسىلۋعا باعىتتالعان شەشىمى قالاي قالىپتاسقانى، قانداي سىرتقى-ساياسي ماقسات كوزدەلگەنى تەرەڭ تالدانىپ، جالپى ماتىندە قازاقستاننىڭ قادامى ەڭ الدىمەن ويلاستىرىلعان، پراگماتيكالىق جانە مۇقيات ەسەپتەلگەن دەپ باعالانعان.

ماقالانىڭ باسىندا باستاپقىدا ۆاشينگتونداعى كوپتەگەن تاراپتار الدىندا قازاقستاننىڭ بۇل قادامى تاڭقالارلىق بولىپ كورىنگەنى، كەلىسىمگە قوسىلۋ موتيۆاتسياسىنا قاتىستى سۇراقتار تۋىنداعانى اتاپ وتىلگەن. كەي تۇستا بۇل قادام «پرەزيدەنت ترامپقا ارنالعان بەلگى سەكىلدى كورىنەدى» دەپ جازىلعان. الايدا ماقالادا قازاقستاننىڭ قاندايدا ءبىر ماقساتتى كوزدەيتىنى دە مويىندالىپ، ەلدىڭ جاعدايىن ەسكەرە وتىرىپ، بۇل ارەكەتتى تابيعي ءارى ورىندى دەپ باعالاعان.

ماتەريالدا كەلەسى جايتتار ەرەكشە كورسەتىلگەن:

قازاقستاننىڭ «يبراھيم كەلىسىمىنە» قاتىسۋى ءارى قاسىم‑جومارت توقاەۆتىڭ C5+1 فورماتىندا اقش-تا وتەتىن كەزدەسۋلەر الدىنداعى سۇحباتى ارقىلى جارىققا شىققان.

امەريكاداعى ساراپشىلاردىڭ پىكىرىنە سۇيەنسەك، بۇل شەشىم «تومەن شىعىنمەن، بىراق جوعارى اسەرلى دابىل» رەتىندە باعالانعان; ونىڭ باستى ماقساتى – رەسەي مەن قىتايعا تاۋەلدىلىكتى ازايتۋ ارقىلى گەوساياسي ارىپتەستىكتى ءارتاراپتاندىرۋ.

اقش تاراپىنان بۇل قادام قازاقستاننىڭ باتىسقا اشىلۋىن، ۆاشينگتونمەن ىنتىماقتاستىقتى تەرەڭدەتۋگە نيەتتىلىگىن كورسەتەتىن كورىنەدى; اتاپ ايتقاندا، ترامپتىڭ قىتايدىڭ ۇستەمدىگىنەن شىعۋعا باعىتتالعان ماڭىزدى مينەرالدار جەلىسىن قۇرۋعا ءمان بەرىپ جاتقانى تىلگە تيەك ەتىلگەن.

ماقالانىڭ قورىتىندىسىندا: «يبراھيم كەلىسىمدەرىنە قوسىلۋ – اقش-تىڭ ءپوزيتيۆتى نازارىن تارتۋعا باعىتتالعان اقىلدى ءارى پراگماتيكالىق قادام» دەپ ايتىلعان.

قازاقستان ءۇشىن بۇل قادام، جالپى العاندا، سىرتقى ساياساتتا تاۋەلسىزدىگىن كورسەتىپ، ماسكەۋ مەن پەكيننەن الشاقتاپ، جاڭا باعىتتار ارقىلى حالىقارالىق ارەنادا ورنىقتى بولۋعا باعىتتالعان ستراتەگيا رەتىندە كورىنەدى.

Abai.kz