قىرعىزستان بيلىگى ەلەكتر ەنەرگياسىنىڭ جەتىسپەۋشىلىگىنەن تۋعان داعدارىسقا بايلانىستى «تۇنگى تىنىشتىق» رەجيمىنە كوشتى. بۇل تۋرالى «Usbanov ARNASY» تەلەگرام ارناسى جازدى.

ەل ۇكىمەتى ارنايى زاڭ ازىرلەپ، بەكىتتى. ول بويىنشا: ەلدەگى بارلىق ويىن-ساۋىق نىساندارى، كلۋبتار، مەيرامحانالار، اسحانالار، سپورتتىق نىساندار، بوۋلينگ، بيليارد ت.ب. كوممەرتسيالىق نىساندار جۇمىسىن 22:00-دە توقتاتۋى ءتيىس. ال 22:10-دا بارلىق جارىق ءسوندىرىلۋى كەرەك. سونداي-اق، 22:00-دەن كەيىن توي تويلاۋعا دا تىيىم سالىندى.

قىرعىز ۇقق باسشىسى قامشىبەك تاشيەۆ بارلىق جەرگىلىكتى اكىمياتتارعا قاتاڭ تاپسىرما بەرىپ، 22:00 مەن 07:00 ارالىعىنداعى تىنىشتىق رەجيمىنىڭ ساقتالۋىن باقىلاۋدى تاپسىردى. قازىردىڭ وزىندە قىرعىزدىڭ شاعىن جانە ورتا بيزنەسى بۇل قاتاڭ شارالارعا نارازىلىقتارىن بىلدىرۋدە.

Abai.kz