قىرعىزستان بيىل قازاقستاننان اكەلەتىن كەيبىر تاۋارلاردىڭ كولەمىن ايتارلىقتاي ارتتىردى.  

قاڭتار-قىركۇيەك ايلارىندا قىرعىزستان مەن قازاقستان اراسىنداعى سىرتقى ساۋدا اينالىمى 1 ملرد 222,4 ملن دوللاردى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا 17,3% ارتىق، دەپ جازادى inbusiness.kz سايتى.

ساۋدا ءوسىمى نەگىزىنەن يمپورتتىڭ ارتۋىنا بايلانىستى – قىرعىزستاننىڭ قازاقستاننان اكەلگەن تاۋارى 29,8% ءوسىپ، 912 ملن دوللارعا جەتكەن. ال قىرعىزستاننىڭ قازاقستانعا ەكسپورتى كەرىسىنشە 8,4% تومەندەپ، 310,3 ملن دوللاردى قۇرادى.

ەاەو-نىڭ قالعان ەلدەرىمەن قىرعىزستاننىڭ ساۋداسى قۇلدىراۋدا:

• رەسەي – مينۋس 13,4%، 2,5 ملرد دوللار;
• بەلارۋس –  مينۋس 2,8%، 91,9 ملن دوللار;
• ارمەنيا – مينۋس 2,6%، 1,89 ملن دوللار.

ەسەپتىك كەزەڭدە قىرعىزستاننىڭ ەاەو ەلدەرىمەن جالپى ساۋدا اينالىمى 3,85 ملرد دوللار بولدى. بۇل وتكەن جىلدان 5,3% تومەن. سوعان قاراماستان، قىرعىزستاننىڭ ەاەو ەلدەرىمەن ساۋداسىنىڭ 66%-ى رەسەيگە تيەسىلى بولىپ وتىر.

باۋىرلاس ەلدەر اراسىنداعى ساۋدادا ەڭ كوپ ءوسىم جانارماي ونىمدەرىندە بايقالدى: جانارماي، گازويل، مازۋت جانە موتور مايلارىنىڭ ەكسپورتى 1,6 ەسە ارتىپ، 224 مىڭ توننا بولدى.

سونىمەن بىرگە قىرعىز نارىعىندا ءتاتتى سۋسىندارعا (248,9 ملن ليتر، +14,4%), قۇس ەتىنە (10,7 مىڭ توننا، +24,2%), موروجەنوعا (3 مىڭ توننا، +1,6 ەسە), ۇنعا (140,7 مىڭ توننا، +3,7 ەسە) جانە بيدايعا (205,1 مىڭ توننا، +21,5 ەسە) سۇرانىس وسكەن.

ال سمارتفوندار مەن تەلەفوندار ەكسپورتى 4,6 ەسە ازايىپ، 53 مىڭ داناعا تۇسكەن. التىن ەكسپورتى 8 پايىزعا (2,3 توننا), سيگارەت ساتۋ 1,6 پايىزعا تومەندەگەن.

يمپورت كولەمى دە ارتتى. قازاقستان قىرعىزستاننان 614,8 مىڭ توننا تاۋار اكەلدى، قۇنى 406,4 ملن دوللار (+9,4%).

يمپورت ىشىندە بيتۋم (3,8 ەسە ءوسىم، 202,7 مىڭ توننا), كەروسين (2 ەسە ءوسىم، 51,1 مىڭ توننا), تراكتورلار (3,4 ەسە ءوسىم، 298 دانا), پلاستيك تارا (3,7 ەسە ءوسىم، 53,5 مىڭ توننا) جانە ماكۋلاتۋرا (2,9 ەسە ءوسىم، 10 مىڭ توننا) ەرەكشە كوزگە تۇسەدى.

Abai.kz