الماتى قالالىق سوتى ارمان جۇماگەلديەۆكە (ديكي ارمان) قاتىستى اپەللياتسيالىق شاعىمداردى قاراپ، العاشقى سوتتىڭ ۇكىمىن كۇشىندە قالدىردى.

سوتتىڭ مالىمەتىنشە، شەشىم اپەللياتسيالىق القادا قارالعاننان كەيىن قابىلدانعان. وسىلايشا، جۇماگەلديەۆكە شىعارىلعان 20 جىل باس بوستاندىعىنان ايىرۋ جازاسى وزگەرىسسىز قالدى.

ارمان جۇماگەلديەۆ 2022 جىلدىڭ 7 قاڭتارىندا الماتىدا وزىمەن بىرگە بولعان تاعى بەس اداممەن بىرگە ۇستالعان. باس پروكۋراتۋرانىڭ دەرەگىنشە، ول قاڭتار وقيعالارى كەزىندە ادامداردى ۇرلاۋ جانە زاڭسىز ارەكەتتەرگە قاتىسى بار دەگەن كۇدىككە ىلىنگەن.

اتالعان قىلمىستىق ءىس بويىنشا بارلىعى 45 ادام سوت الدىندا جاۋاپ بەردى. ولارعا ۇيىمداسقان قىلمىستىق توپ قۇرۋ جانە باسقارۋ، توناۋ، زاڭسىز بوستاندىقتان ايىرۋ، قىزمەت وكىلەتىن اسىرا پايدالانۋ، جاپپاي تارتىپسىزدىككە قاتىسۋ جانە بانديتيزم باپتارى بويىنشا ايىپ تاعىلعان.

Abai.kz