ونەركاسىپ جانە قۇرىلىس ءمينيسترى ەرسايىن ناعاسپاەۆ «قازتسينك» جانە «قازاقمىس» كومپانيالارىنىڭ يەسى اۋىساتىنى تۋرالى مالىمەتتەرگە پىكىر ءبىلدىردى. 

— شۆەيتساريانىڭ Glencore Plc كومپانياسىنا تيەسىلى «قازتسينك» اكتسيالارىنىڭ 70 پايىزىن قازاقستاندىق قۇرىلىس ماگناتى شاحمۇرات ءمۇتالىپ ساتىپ العىسى كەلەدى دەگەن اقپارات تارادى. سونداي-اق، Qazaq Stroy كومپانياسىنىڭ يەسى نۇرلان ارتىقباەۆ تا «قازاقمىستى» ساتىپ الۋ ءۇشىن كەلىسسوز جۇرگىزىپ جاتقانى ايتىلدى. وسىدان حابارىڭىز بار ما، ۆەدومستۆوعا ءوتىنىش ءتۇستى مە، — دەپ سۇرادى جۋرناليست.

مينيستر رەسمي ءوتىنىش تۇسپەگەندىكتەن ناقتى اقپارات بەرە المايتىنىن ايتتى.

— مەن ول اقپاراتتى تەلەگرامم-ارنالاردىڭ بىرىنەن كوردىم. بىزدە رەگلامەنت بار. سول رەگلامەنت بويىنشا كومپانيا اكتسيالارىن اۋىستىرۋ ءۇشىن مينيسترلىكتىڭ ارنايى رۇقساتى قاجەت. بىزدە ۆەدومستۆوارالىق كوميسسيا جۇمىس ىستەيدى. 1 جەلتوقسانداعى جاعداي بويىنشا بىزگە اشقانداي ءوتىنىش تۇسكەن جوق. «قازتسينك» تۋرالى دا، «قازاقمىس» تۋرالى دا ەشقانداي ءوتىنىش تۇسكەن جوق. بىراق ءوتىنىش تۇسسە وزدەرىڭىزگە قوسىمشا اقپارات بەرەمىز. ازىرگە ونداي اقپارات جوق، — دەدى ەرسايىن ناعاسپاەۆ.

Abai.kz