ورتا سالماقتا WBO جانە IBF تۇجىرىمدارى بويىنشا الەم چەمپيونى بولىپ تۇرعان جانىبەك ءالىمحانۇلى (17-0, 12 KO) مەن WBA چەمپيونى ەريسلاندي لارا (31-3-3, 19 KO) اراسىنداعى جىلدىڭ باستى جەكپە-جەگى رەسمي تۇردە وتپەيتىنى بەلگىلى بولدى.

بۇل تۋرالى قر بوكس فەدەراتسياسى دا رەسمي اقپارات تاراتتى.

- 6 جەلتوقسانعا جوسپارلانعان ايقاسقا ءۇش كۇن قالعاندا، جانىبەك ءالىمحانۇلىنىڭ تەستىنەن مەلدوني انىقتالعانى بەلگىلى بولدى. جانىبەكتىڭ ەڭ ماڭىزدى جەكپە-جەگى توقتاتىلدى، — دەلىنگەن حابارلامادا.

ايتا كەتەيىك، بۇل تۋرالى اقپاراتتى العاش بولىپ The Ring ءجۋرناليسى مايك كوپپينگەر جازدى. ءدال سول ساتتە ماسەلانىڭ قانشالىقتى كۇردەلى ەكەنى بەلگىسىز ەدى. بىراق 20 مينۋت وتپەي جاتىپ ESPN ءتىلشىسى دەن رافاەل جاعدايدىڭ وتە اۋىر ەكەنىن راستادى.

ول VADA ۇيىمىنىڭ رەسمي حاتىن جاريالاپ، وندا جانىبەكتىڭ تىيىم سالىنعان زاتقا «ەكىنشى ۇلگىدە» (قايتا تاپسىرعان تەستتە) وڭ ناتيجە كورسەتكەنى ايتىلادى.

كەيىن جانىبەكتىڭ ءوزى دوپينگ قولدانعانىن جوققا شىعارىپ، «مەن ارقاشان تازا سپورت ءۇشىن كۇرەسكەنمىن، ءبارىڭىز بۇنى جاقسى بىلەسىزدەر. جاڭالىقتى وقىعاندا قاتتى تاڭعالدىم. VADA العاشقى تەستتىڭ تازا ەكەنىن ايتتى. مەن ەشقانداي دارۋمەن قابىلداۋ ءتارتىبىن وزگەرتپەدىم. ەكىنشى تەستتە نە بولعانىن بىلمەيمىن، سوندىقتان تولىق قايتا تەكسەرۋدى تالاپ ەتتىم»، — دەپ جازدى ول وزىنىڭ ح پاراقشاسىندا.

ال قازىر ۇيىمداستىرۋشىلار لاراعا باسقا قارسىلاس تاۋىپ ۇلگەرگەن. جەكپە-جەك توقتاتىلعان سوڭ، لاراعا شۇعىل تۇردە جاڭا قارسىلاس بەلگىلەندى. ونىڭ ورنىنا ۆەنەسۋەلالىق يوحان گونسالەس (36-4, 34 KO) شىعاتىن بولدى.

ول بيىل 1 ناۋرىزدا ءبىرىنشى ورتا سالماقتا بۇرىنعى الەم چەمپيونى دجاررەتت حەردتى جەڭىپ، سەنساتسيا جاساعان ەدى. ال حەرد كەزىندە ەريسلاندي لارانى ۇتقان.

ەستەرىڭىزگە سالا كەتسەك، جانىبەكتىڭ دوپينگ سىناماسىنان قانداي تىيىم سالىنعان زات تابىلعانى بەلگىلى بولدى.

دوپينگ داۋىنا بايلانىستى WBO ىشكى تەرگەۋ پروتسەسىن باستايدى.

Abai.kz