ءماجىلىس وتىرىسىندا دەپۋتات ەرلان سايروۆ اۋىلعا گازەت تاراتۋ باعاسى مەن “قازپوشتا” قىزمەتكەرلەرىنىڭ ماتەريالدىق جاعدايىنا قاتىستى ماسەلە كوتەردى.

جاقىندا عانا ارىپتەستەرىمىزبەن بىرگە باتىس قازاقستاننىڭ شەكارالىق اۋداندارىنا بارىپ كەلدىك. كەشە مەن شىعىستان كەلدىم. قازىر اۋىلدا گۋ-گۋ اڭگىمە. “قازپوشتا” اۋىلعا گازەت تاراتۋ باعاسىن 140 پايىزعا كوتەرىپ جىبەرگەن. ەگەر وسىعان دەيىن ءبىر گازەتتى اكەلۋ 17 تەڭگە بولسا، قازىر 42 تەڭگەدەن، - دەدى سايروۆ.

دەپۋتات شەكارالىق اۋداندا تۇراتىن 3,5 ملن حالىقتىڭ كەلەسى جىلى “ەگەمەن قازاقستان”، “جاس الاش”، “ايقىن” سياقتى گازەتتەردى وقۋعا ماتەريالدىق شاماسى جەتپەي قالاتىنىنا الاڭداۋلى.

بۇل جەردە “قازپوشتانىڭ” وزىنە كومەكتەسۋ كەرەك. ويتكەنى بۇگىنگى تاڭدا وسى الىس اۋىلدارعا اقپارات پەن تولەمدەردى اپارىپ وتىرعان تەك قانا “قازپوشتا”. وسى “قازپوشتاعا” گازەتتەردى اپارۋعا كومەكتەسۋ ءۇشىن سىزدەر قانداي شارا جاساپ جاتسىزدار؟ سول “قازپوشتانىڭ” اۋىلداعى ەڭبەككەرلەرىنىڭ ماتەريالدىق جاعدايىن تۇزەۋ ءۇشىن ناقتى قانداي شارالار جاساپ جاتسىزدار؟ – دەپ سۇراق جولدادى ءماجىلىس دەپۋتاتى.

جاساندى ينتەللەكت جانە تسيفرلىق دامۋ ۆيتسە-ءمينيسترى دوسجان مۇساليەۆ گازەتتى تاراتۋ باعاسىنىڭ كوتەرىلۋى ينفلياتسياعا بايلانىستى ەكەنىن ايتتى.

شىنىمەن دە، گازەتتى تاراتۋ باعاسى وسى جىلى كوتەرىلدى. بۇل تاريف 2017 جىلى بەكىتىلگەن. سول كەزدەن بەرى 17 تەڭگە بۇگىنگە دەيىن كوتەرىلمەگەن. ينفلياتسيانى ەسكەرىپ وسى باعانى 36 تەڭگەگە كوتەردىك. بۇل ينفلياتسياعا بايلانىستى، - دەدى ول.

ەرلان سايروۆتىڭ سۇراعىنا جاۋاپ بەرۋ بارىسىندا ماسەلەنىڭ وزەكتىلىگىن مادەنيەت جانە اقپارات ءمينيسترىنىڭ ورىنباسارى ەۆگەني كوچەتوۆ تا اتاپ ءوتتى.

قازىر بۇل ماسەلەنى “قازپوشتامەن” بىرگە تالقىلاپ جاتىرمىز. تاريفتەر بويىنشا كەلىسسوز جۇرگىزۋدەمىز. جاقىن ۋاقىتتا شەشىم تابىلادى دەگەن ويدامىن، - دەدى ول.

Abai.kz