كەلەر جىلدان باستاپ قازاقستاندا تاۋارلاردىڭ ۇلتتىق كاتالوگىن تاۋار اينالىمىنىڭ بارلىق قاتىسۋشىسى پايدالانۋعا مىندەتتى بولادى. ورتالىقتاندىرىلعان جۇيەدە كەز كەلگەن ونىمگە NTIN كودى بەرىلەدى، ياعني ءار تاۋاردىڭ «جسن» دەسەك تە بولادى. وسى رەتتە ۇلتتىق كاتالوگتا ءوز ونىمدەرىن كىمدەر جانە قالاي تىركەيتىنىن ايتا كەتكەندى ورىندى دەپ سانايمىز.

تاۋارلاردىڭ ۇلتتىق كاتالوگىنا كىمدەر قوسىلۋ كەرەك؟

قازاقستان اۋماعىندا تاۋارلار اينالىمىنا قاتىسى بار بارلىق كاسىپكەرلىك سۋبەكتىسى تۇك قوسىلۋعا مىندەتتى. بۇل – وندىرۋشىلەر، يمپورتتاۋشىلار، كوتەرمە كومپانيالار مەن ديستريبيۋتورلار، بولشەك ساۋدا دۇكەندەرى مەن ساۋدا جەلىلەرى، ونلاين الاڭدار مەن ماركەتپلەيستەر.

ءار قاتىسۋشى ءبىرتۇتاس بازانى ءوز قىزمەتى اياسىندا پايدالانادى – تاۋاردى تىركەۋدەن باستاپ ساتۋ كەزىندە ونىڭ مالىمەتتەرىن دۇرىس ۇسىنۋعا دەيىن. بۇل ورايدا تاۋار كارتاسى تەگىن جاسالاتىنىن ايتا كەتەيىك. سوندىقتان تۇك ەنگىزۋ باعانىڭ وسىمىنە اسەر ەتپەۋى ءتيىس.

ۇلتتىق كاتالوگتا تاۋار كارتالارىن كىمدەر تىركەۋى كەرەك؟

تىڭ تەتىكتە تاۋار كارتالارىن ءونىم وندىرۋشىلەرى نەمەسە ونى ەلگە اكەلەتىندەر تىركەۋگە مىندەتتى. ەگەر دە 2026 جىلدىڭ 1 قاڭتارىندا تۇك-دا تىركەلمەگەن تاۋارىڭىز ساتىلىمدا تۇرسا، مەيلى ءوندىرۋشى نەمەسە يمپورتتاۋشى بولماساڭىز دا وعان NTIN كودىن بەلگىلەۋ كەرەك. تاۋار كارتاسىنىڭ بار-جوعىن تەكسەرۋ ءۇشىن، سونداي-اق جاڭاسىن جاساپ، وزگەرىستەر ەنگىزۋ ءۇشىن nct.kz سايتىندا تىركەلۋ قاجەت.

جاڭا كارتانى تولتىرعان كەزدە تاۋاردىڭ اتاۋى، برەندى، سيپاتتاماسى، قۇرامى جانە قاي ەلدە جاسالعانى تۋرالى اقپاراتتى قوسۋ قاجەت. كارتانى جاساماس بۇرىن ءونىمنىڭ كاتالوگتا بار-جوعىن تەكسەرگەن ءجون. جۇيەدە قازىر 15 ملن استام كارتا بار. ەگەر دە ءبىر تاۋاردى ءتۇرلى يمپورتتاۋشى جەتكىزۋمەن اينالىسسا، دەمەك ونىڭ كارتاسى بۇرىننان جاسالعان بولۋى مۇمكىن. مۇنداي جاعدايدا تاۋاردى قايتا تىركەۋدىڭ قاجەتى جوق.

باقىلاۋ-كاسسالىق ماشينالاردى جاڭارتۋ: كىمگە نە ىستەۋ كەرەك؟

تۇك ەنگىزىلگەننەن كەيىن بارلىق باقىلاۋ-كاسسالىق ماشيناسى NTIN كودتارىن بەرە الاتىن 2.0.3 حاتتاماسى بويىنشا جۇمىس ىستەۋى كەرەك. بۇل جۇمىستى بكم تەحنيكالىق قىزمەتى فيسكالدى دەرەكتەر وپەراتورىمەن بىرلەسىپ دەربەس جۇزەگە اسىراتىنىن اتاپ وتكەن ابزال. بيزنەسكە تەك ءبىرتۇتاس كاتالوگتا تىركەلگەن NTIN كودى بار ءونىمدى پايدالانۋ مەن ونى ساتۋ كەزىندە سكانەرلەۋ قاجەت.

بۇل رەتتە قازاقستان اۋماعىندا ساۋدا قىزمەتىندە كاسسالىق ماشينالاردى قولدانۋ زاڭدا بەلگىلەنگەن تالاپ بولىپ سانالاتىنىن ايتا كەتۋ كەرەك. بازارلار مەن اۋىلدى جەرلەردەگى ساۋداگەرلەر ءۇشىن جەڭىلدەتىلگەن سحەمالار قاراستىرىلادى. بىراق جۇيەگە قوسىلۋدان اينالىپ وتۋگە جول بەرىلمەيتىنىن ەسكەرۋ قاجەت.

ەگەر دە قانداي دا ءبىر ءونىمنىڭ NTIN ۇلتتىق كودى بولماسا، وندا ساۋدانى بۇعاتتاماۋ ءۇشىن وعان ۋاقىتشا كود بەرىلەدى. بۇدان كەيىن كاسىپكەر تۇك-دا قاجەتتى مالىمەتتەردى ەنگىزىپ، تۇراقتى كودتى الۋى ءتيىس.

Abai.kz