قازاقستاندا پارلامەنتتى تسيفرلىق مودەلگە اۋىستىرۋ جۇمىستارى باستالدى. بۇل تۋرالى پارلامەنتاريزم ينستيتۋتى نەگىزى قالانۋىنىڭ بەس جىلدىعىنا ارنالعان ەۋرازيالىق فورۋمدا ءسوز سويلەگەن ءماجىلىس توراعاسىنىڭ ورىنباسارى دانيا ەسپاەۆا مالىمدەدى. 

دانيا ەسپاەۆا پرەزيدەنتتىڭ قازاقستاندى ءۇش جىل ىشىندە تولىققاندى تسيفرلىق ەلگە اينالدىرۋ تۋرالى قويعان ماقساتىن ەسكە سالدى.

- پارلامەنت دەپۋتاتتارى وسى سەسسيادا «جاساندى ينتەللەكت تۋرالى» زاڭ مەن تسيفرلىق كودەكستى باستاماشىلىق ەتىپ، قابىلداپ، بۇل اۋقىمدى شەشىمدى زاڭنامالىق تۇرعىدان قولدادى. بۇل قۇقىقتىق اكتىلەر تسيفرلىق تەحنولوگيالار مەن جاساندى ينتەللەكتكە نەگىزدەلگەن جاڭا الەۋمەتتىك قاتىناستاردىڭ نەگىزىن قالايدى، - دەدى ۆيتسە-سپيكەر.

ول پارلامەنت دەپۋتاتتارىنا زاڭ شىعارۋ جۇمىسىنىڭ تيىمدىلىگىن ارتتىرۋ ءۇشىن تسيفرلىق شەشىمدەردى پايدالانۋىنىڭ ماڭىزدىلىعىن اتاپ ءوتتى.

- ءبىز پارلامەنتتىڭ تسيفرلىق مودەلىنە كوشۋ بويىنشا جۇمىستى باستادىق. «ە-Parlament» بىرىڭعاي اقپاراتتىق جۇيەسى ازىرلەنىپ جاتىر. بۇل كەشەندى تسيفرلىق جۇيە پارلامەنتتىك زاڭ شىعارۋ پروتسەستەرىن اۆتوماتتاندىرۋعا ارنالعان. ءبىز «e-Parlament»-ءتىڭ باستاپقى كەزەڭىندەمىز، بىراق ارتىقشىلىقتارى ايقىن: ىشكى پارلامەنتتىك بارلىق پروتسەستەر وڭتايلاندىرىلادى، - دەپ اتاپ ءوتتى ەسپاەۆا.

ول سونداي-اق جۇيەنىڭ ەلەكتروندى ۇكىمەت پلاتفورمالارىمەن بىرىكتىرىلەتىنىن قوسىپ ءوتتى.

Abai.kz