قازاقستان ەنەرگەتيكا مينيسترلىگى كتك توقتاعاننان كەيىن مۇناي ءوندىرىسىنىڭ ازايۋ سەبەبىن ءتۇسىندىردى...

قازاقستاننىڭ ەنەرگەتيكا مينيسترلىگى مۇناي ءوندىرۋ كولەمىنىڭ ۋاقىتشا تومەندەۋى كاسپي قۇبىر كونسورتسيۋمى (كتك) جۇيەسىنە شيكىزات قابىلداۋداعى شەكتەۋلەرگە بايلانىستى ەكەنىن جانە ونىڭ تەحنولوگيالىق سيپاتتا بولاتىنىن مالىمدەدى، دەپ حابارلايدى اگەنتتىك ءتىلشىسى.

«تۇتىك قۇبىرى جۇيەسىنە مۇناي قابىلداۋعا قويىلعان شەكتەۋلەرگە بايلانىستى جانە رەزەرۆۋارلار پاركىنىڭ لىق تولىپ كەتۋىنىڭ الدىن الۋ ماقساتىندا مۇناي ءوندىرۋشى كومپانيالار تاۋلىكتىك ءوندىرۋ دەڭگەيىن باقىلاۋدا ۇستاپ، تۇزەتۋ ەنگىزدى. بۇل مۇناي ءوندىرۋ كولەمىنىڭ ۋاقىتشا تومەندەۋىنە الىپ كەلدى. بۇل شارا تەحنولوگيالىق سيپاتتا جانە وندىرىستىك پروتسەستەردىڭ تۇراقتىلىعىن قامتاماسىز ەتۋگە باعىتتالعان»، — دەپ حابارلايدى ەنەرگەتيكا مينيسترلىگىنىڭ ءباسپاسوز قىزمەتى.

ۆەدومستۆونىڭ مالىمدەۋىنشە، كتك تەڭىز تەرمينالىندا مۇناي تيەۋ قارا تەڭىز اكۆاتورياسىنداعى جاعدايعا بايلانىستى قاۋىپسىزدىك شارالارىنا وراي ۋاقىتشا توقتاتىلعان. سونىمەن بىرگە ەنەرگەتيكا مينيسترلىگى كونسورتسيۋمنىڭ وندىرىستىك ءارى تەحنيكالىق نىساندارى شتاتتىق رەجيمدە جۇمىس ىستەپ تۇرعانىن جانە جاعداي رەتتەلگەن بويدا مۇناي تاسىمالىن قايتا باستاۋعا دايىن ەكەنىن اتاپ ءوتتى.

«قازاقستان رەسپۋبليكاسىنىڭ ەنەرگەتيكا مينيسترلىگى كتك باسشىلىعىمەن، ءىرى جۇك جونەلتۋشىلەرمەن، كەمە يەلەرىمەن جانە بەيىندى مەملەكەتتىك ورگاندارمەن تۇراقتى بايلانىستا. قازىرگى ۋاقىتتا قاۋىپسىز كەمە قاتىناسى جاعدايلارىن قامتاماسىز ەتۋگە جانە قازاقستاندىق مۇنايدىڭ الەمدىك نارىقتارعا تۇراقتى ەكسپورتىن تەزىرەك قايتا باستاۋعا باعىتتالعان شەشىمدەردى ازىرلەۋ بويىنشا ۇزدىكسىز كونسۋلتاتسيالار جۇرگىزىلىپ جاتىر»، — دەپ تۇيىندەدى مينيسترلىك.

Abai.kz