جەتىسۋ وبلىسىندا جاڭا جىلدا 25 ورىندى شاعىن ورتالىعى بار 120 ورىندىق جاڭا مەكتەپ ىسكە قوسىلدى. اقسۋ اۋدانى كولتابان اۋىلىنداعى بۇل ءبىلىم وشاعى بەيىمدەلگەن مەكتەپتىڭ ورنىنا سالىندى. بۇرىنعى عيماراتتا اسحانا، سپورت زال مەن  ماجىلىس زالى بولماعان. سونىمەن قاتار بۇعان دەيىن مەكتەپتە وقۋشىلار 9 سىنىپقا دەيىن ءبىلىم السا، ال 10-11 سىنىپ وقۋشىلارى باسقا ەلدى مەكەندەردەگى مەكتەپتەرگە تاسىمالدانعان بولاتىن، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى. 

سۋرەت: gov.kz سايتىنان الىندى.

مەكتەپتىڭ اشىلۋىمەن اۋىل تۇرعىندارىن وبلىس اكىمىنىڭ اتىنان ءوڭىر باسشىسىنىڭ ورىنباسارى دياس ەسداۋلەتوۆ قۇتتىقتادى.

- پرەزيدەنتتىڭ تاپسىرماسىنا سايكەس وىڭىردە قالا مەن اۋىل مەكتەپتەرىندەگى وقىتۋ دەڭگەيىن تەڭەستىرۋ جۇمىستارى جۇرگىزىلىپ كەلەدى. مەكتەپ عيماراتتارىن جاڭارتۋ، ماتەريالدىق-تەحنيكالىق بازالارىن نىعايتۋ كەزەڭ-كەزەڭىمەن اتقارىلۋدا. ماسەلەن، وسى كولتابان اۋىلىنداعى مەكتەپتە بالالار ۇزاق جىلدان بەرى بەيىمدەلگەن عيماراتتا وقىپ كەلگەن بولاتىن. بۇگىن، مىنە، اۋىلدا 120 ورىندىق زاماناۋي مەكتەپ پايدالانۋعا بەرىلىپ، جايلى ءارى قاۋىپسىز ءبىلىم الۋعا مۇمكىندىك جاسالىپ وتىر، عيمارات زاماناۋي تالاپقا ساي جابدىقتالعان: ءپان كابينەتتەرى، ءىت سىنىپتار، سپورت جانە اكت زالدارى، كىتاپحانا مەن زەرتحانالار قاراستىرىلعان. ءبىز ءبىلىم بەرۋ سالاسىنا قولداۋ شارالارىن بۇدان بىلاي دا جالعاستىرامىز. جاڭا مەكتەپ ۇستازدارىنىڭ باستامالارى باياندى، ەڭبەكتەرى جەمىستى بولسىن. ال وقۋشىلارعا ايتارىم، وسى مەكتەپتەن ساپالى ءبىلىم الىپ، ەلىمىزدىڭ دامۋىنا ۇلەس قوساتىن ادال ازامات بولىپ وسۋلەرىڭىزگە تىلەكتەسپىن، - دەگەن دياس ەسداۋلەتوۆ جاڭا موديفيكاتسياداعى حيميا كابينەتىنىڭ جابدىقتارىن ساتىپ الۋعا ارنالعان سەرتيفيكات تابىستادى.

سۋرەت: gov.kz سايتىنان الىندى.

سول سياقتى كولتابان اۋىلى تۇرعىندارىنىڭ اتىنان ارداگەر مۇرات راحىموۆ العىسىن جەتكىزدى.

مۇنان سوڭ مەكتەپتىڭ قۇرىلىسىن جۇرگىزگەن مەردىگەر ۇيىم — «سپ NEFT» جشس ديرەكتورى نۇرلان قادىرباەۆ جاڭا مەكتەپتىڭ سيمۆوليكالىق كىلتىن ءبىلىم بەرۋ مەكەمەسىنىڭ ديرەكتورى جامبى بىرجانوۆاعا تابىستادى. عيماراتتىڭ لەنتاسى قيىلىپ، مەكتەپ سالتاناتتى تۇردە اشىلعاننان كەيىن قوناقتار ءبىلىم وشاعىنىڭ ءىشىن ارالاپ كوردى.

سۋرەت: gov.kz سايتىنان الىندى.

اتاپ وتسەك، ءۇش قاباتتى جاڭا مەكتەپ عيماراتىندا 11 پاندىك كابينەت، 2 شەبەرحانا، كىتاپحانا، سپورت جانە اكت زالدارى، اسحانا، سول سياقتى 25 بالاعا ارنالعان مەكتەپكە دەيىنگى شاعىن ورتالىق بار. بۇعان دەيىن بۇل ورتالىق تەك تۇسكە دەيىن عانا جۇمىس ىستەسە، قازىر بارلىق مۇمكىندىك جاسالعاندىقتان تولىق جۇمىس كۇنىنە كوشكەن.

سۋرەت: gov.kz سايتىنان الىندى.

جەرگىلىكتى تۇرعىندار جاعىمدى جاڭالىققا قاتىستى پىكىر ءبولىستى. ولاردىڭ قاتارىندا اتا-انالار، مۇعالىمدەر مەن وقۋشىلار دا بار.

– ەڭ الدىمەن، ءبىز ءۇشىن ەڭ ۇلكەن قۋانىش – ەندى بالالارىمىز وزدەرىنىڭ تۋعان اۋىلىنان كورشىلەس ەلدى مەكەندەرگە قاتىناپ وقىمايتىن بولدى. مەكتەپتە وقۋشىلاردىڭ ساپالى ءبىلىم الۋىنا، ال ءبىز ءۇشىن جايلى جۇمىس ىستەۋگە بارلىق جاعداي جاسالعان. قاجەتتى قۇرال-جابدىقتارمەن تولىق قامتىلعان زاماناۋي پاندىك كابينەتتەرىمىز بار. اتاپ ايتقاندا، زەرتحاناسى بار فيزيكا كابينەتى، لينگافون كابينەتى، ينفورماتيكا كابينەتى جابدىقتالعان، بارلىعىندا پانەلدى تاقتالار ورناتىلعان. مۇنىڭ ءبارى ءپاندى تەرەڭ ءارى جان-جاقتى تۇسىنۋگە، سونداي-اق عىلىمي-زەرتتەۋ جۇمىستارىمەن اينالىسۋعا مۇمكىندىك بەرەدى، – دەدى قازاق ءتىلى مەن ادەبيەتى ءپانىنىڭ مۇعالىمى ەرجان ءبىرجانوۆ.

سۋرەت: gov.kz سايتىنان الىندى.

بۇل پىكىرگە اۋىل تۇرعىنى باقىت لەباەۆا دا قوسىلدى:

– بۇرىنعى مەكتەبىمىز ەسكى بولاتىن. ەندى اۋىل شاعىن بولسا دا، بالالارىمىز بەن نەمەرەلەرىمىز ءۇشىن كەڭ، جارىق، زاماناۋي مەكتەپ سالىنىپ وتىر. سونىمەن قاتار مەكتەپتە كىشكەنتاي بالالارعا ارنالعان جاڭا ورتالىق تا بار. بۇل – ۇلكەن قۋانىش. وسى ىسكە ۇلەس قوسقان بارشا ازاماتتارعا شىنايى العىسىمدى بىلدىرەمىن، - دەدى ول.

سۋرەت: gov.kz سايتىنان الىندى.

11-سىنىپ وقۋشىسى جاڭىل تۇركىستان دا قۋانىشىن جاسىرمادى:

– 9-سىنىپقا دەيىن وسى اۋىلداعى مەكتەپتە وقىدىم. الايدا مۇندا جوعارى سىنىپتار بولماعاندىقتان، تالدىقورعان قالاسىنا بارىپ، №19 مەكتەپتە 10-سىنىپتى اياقتادىم. جاڭا مەكتەپ سالىنعانىنا قاتتى قۋانىپ، ۇلكەن ىقىلاسپەن ءوز اۋىلىما قايتىپ كەلدىم. مەكتەپ ماعان وتە ۇنادى، قالا مەكتەپتەرىنەن ەشبىر ايىرماشىلىعى جوق — ءبارى ادەمى، جايلى ءارى زامانعا لايىق، – دەدى وقۋشى.

سۋرەت: gov.kz سايتىنان الىندى.

جەتىسۋ وبلىسى اكىمىنىڭ ءباسپاسوز قىزمەتى.

فوتوگرافتار: دميتري ەروفەەۆ، جۇماباي مۇسابەكوۆ

Abai.kz