رەسەيدىڭ باس پروپاگانداشىسى ۆلاديمير سولوۆەۆ ءوزىنىڭ «سولوۆەۆ LIVE» باعدارلاماسىنىڭ ەفيرىندە ورتالىق ازيانى «رەسەيدىڭ ىقپال ەتۋ ايماعى» دەپ اتاپ، وا-دا «ارنايى اسكەري وپەراتسيا» جۇرگىزۋ كەرەكتىگىن ايتتى.

سولوۆەۆ سوزبە-ءسوز بۇيدەدى:

«بىزگە سيريا مەن ۆەنەسۋەلاداعى جاعدايلار ماڭىزدى ەمسە. قازىر ارمەنيادا بولىپ جاتقان وقيعالار ءبىز ءۇشىن ۆەنەسۋەلادا بولىپ جاتقان وقيعالاردان الدەقايدا ماڭىزدى. ارمەنيانى جوعالتۋىمىز – ءبىز ءۇشىن ەڭ ۇلكەن پروبلەما.ءبىز قازىر ءوزىمىزدىڭ ىقپال ەتۋ ايماعىمىز سانالاتىن «ءبىزدىڭ ازيانى» - ورتالىق ازيانى، ورتا ازيانى جوعالتىپ الماۋىمىز كەرەك. بۇل ايماقتى جوعالتۋىمىز – ءبىز ءۇشىن ەڭ اۋىر پروبلەما بولماق. ءبىز ءوزىمىزدىڭ ماقساتتتارىمىزدى ناقتى ايقىنداۋىمىز كەرەك!

ءبىز ولارعا ويىننىڭ اياقتالعانىن ءتۇسىندىرۋىمىز كەرەك. حالىقارالىق ءتارتىپ پەن قۇقىققا تۇكىرگەنىمىز بار. بىزگە ءوزىمىزدىڭ ۇلتتىق قاۋىپسىزدىگىمىز ماڭىزدى. سول ءۇشىن دە ۋكراينا اۋماعىندا «ارنايى اسكەري وپەراتسيا» باستاۋىمىزعا تۋرا كەلدى عوي. ەندەشە ءدال وسىنداي ماقسات-مۇددەگە نەگىزدەپ، ءبىزدىڭ وزگە دە ىقپال ەتۋ ايماقتارىمىزدا «ارنايى اسكەري وپەراتسيا» باستاماسقا؟ بالكىم، بىزگە ۇلتتىق دوكترينامىزدى ناقتىلاۋ كەرەك شىعار؟ ءبىزدىڭ ىقپال ەتۋ ايماقتارىمىزدى ناقتى انىقتاۋ كەرەك. سوندا ءبارى تۇسىنىكتى بولادى»، - دەيدى.

بۇل سولوۆەۆ – كرەملدىڭ ءھام تۇتاس رەسەيدىڭ يدەولوگيالىق ناسيحاتشىسى، باس پروپاگانداشىسى، سوعىس جارشىسى. سۇمىراي سولوۆەۆ الەمنىڭ كوپتەگەن ەلدەرىندە بۇرىننان نون گراتا ادام.

ءوزى ەۆرەي بولا تۇرا، «مى رۋسسكيە! س نامي بوگ!» دەپ كىتاپ جازىپ، ءوزىن پايعامبارعا تەڭەدى. سويتكەن، سولوۆەۆ قازاقستاندى سان مارتە تىلدەدى. بۇل – سولوۆەۆتىڭ ورتالىق ازيا گەوگرافيالىق ايماعىنا قاراتا العاشقى اشىق قوقان-لوقىسى ەمەس. ول قازاقستان، وزبەكستان، ءازىربايجان، ارمەنيا سەكىلدى ەسكى وداقتىڭ قۇرامىنان ءوز تاۋەلسىزدىكتەرىن الىپ شىعىپ، دەربەس سىرتقى جانە ىشكى ساياسات ۇستانىپ كەلە جاتقان ەلدەر تۋرالى ورىس تەلەەفيرىنەن نەبىر سۇمدىقتى ايتتى ءام ايتقىزدى.

ەندىگىسى مىنە، بۇعان قازاقستاننىڭ سىرتقى ىستەر مينيسترلىگى نە دەپ ءۇن قاتپاق؟ رەسەي ءسىم-ىنە نارازىلىق نوتاسىن جولداي ما؟ ادىلەتتىسى – جولداۋى كەرەك! ويتكەنى، رەسەيدىڭ سوعىسقۇمار ءجۋرناليسى ورتالىق ازيا ەلدەرىنە اشىقتان-اشىق سوعىس اشۋدى ناسيحاتتاپ وتىر. سوندىقتان، قر سىرتقى ىستەر مينيسترلىگى مۇنداي يدەولوگيالىق تاۋەكەلدەر مەن اقپاراتتىق شابۋىلدارعا، ىقتيمال قاۋىپكە قارسى تۇرىپ، مەملەكەتتىك يممۋنيتەتىمىزدى كورسەتۋى كەرەك!

Abai.kz