شىمكەنتتەگى قاندى توبەلەس: ءۇش قىلمىستىق ءىس قوزعالدى
ىشكى ىستەر ءمينيسترىنىڭ ورىنباسارى سانجار ءادىلوۆ سەناتتا وتكەن بريفينگتە شىمكەنتتە بولعان جول-كولىك وقيعاسىنىڭ ءمان-جايى تۋرالى ايتتى.
سپيكەردىڭ ايتۋىنشا، بۇل دەرەك بويىنشا قازىرگى تاڭدا ءۇش قىلمىستىق ءىس قوزعالعان:
- ادام ولتىرۋگە وقتالۋ جانە كىسى ءولتىرۋ فاكتىسى بويىنشا;
- ادام ۇرلاۋ فاكتىسى بويىنشا;
- قارۋ قولدانۋ ارقىلى جاسالعان بۇزاقىلىق فاكتىسى بويىنشا.
بىرنەشە كۇدىكتى قاماۋعا الىندى. وقيعانىڭ سەبەپتەرى مەن جاعدايلارىن انىقتاۋ، سونداي-اق كۇندىزگى ۋاقىتتا مۇنداي قىلمىستىڭ جاسالۋىنا جول بەرىلگەن جايتتارعا بايلانىستى قىزمەتتىك تەكسەرۋ جۇرگىزۋ جانە پوليتسيا كۇشتەرىنىڭ جۇمىسىن كەشەندى باعالاۋ ءۇشىن شىمكەنتكە ورتالىق اپپاراتتىڭ باسشىلارى – كريمينالدىق پوليتسيا دەپارتامەنتىنىڭ، تەرگەۋ دەپارتامەنتىنىڭ جانە ىشكى قاۋىپسىزدىك دەپارتامەنتىنىڭ جەتەكشىلەرى جىبەرىلدى. بۇل ءىس بويىنشا ءالى ۇستالا قويماعان فيگۋرانتتار دا بار، الايدا پوليتسيا بارلىق قاتىسى بار ادامداردى انىقتاپ، ۇستاۋ ءۇشىن بارلىق قاجەتتى شارانى قابىلداپ جاتىر. قوسىمشا اقپارات كەيىنىرەك بەرىلەدى، – دەدى سانجار ءادىلوۆ.
ۆيتسە-ءمينيستردىڭ مالىمدەۋىنشە، ەشكىم قىلمىستىق جاۋاپكەرشىلىكتەن قۇتىلىپ كەتپەيدى جانە الداعى ۋاقىتتا بارلىق كىنالى تۇلعا قىلمىستىق زاڭناماعا سايكەس جازاسىن الادى.
ەسكە سالساق، جول اپاتى 20 قاڭتار كۇنى ەرىمبەتوۆ پەن رىسقۇلوۆ كوشەلەرىنىڭ قيىلىسىندا تىركەلگەن. اپاتتان كەيىن جۇرگىزۋشىلەر اراسىندا جانجال تۋىنداپ، وعان ءۇشىنشى كولىكپەن كەلگەن ادامدار دا قوسىلعان.
قاقتىعىس بارىسىندا بىرنەشە ادام پىشاق جاراقاتىن العان. سونىڭ سالدارىنان 40 جاستاعى ەر ادام وقيعا ورنىنان كەيىن كوز جۇمدى، تاعى ءبىر ازامات اۋىر حالدە اۋرۋحاناعا جەتكىزىلدى.
Abai.kz
