جەتىسۋ وبلىسى قۇرىلعاننان بەرى كەربۇلاق اۋدانىنداعى جۇيەلى ينفراقۇرىلىمدىق ماسەلەلەردى شەشۋ باعىتىندا جۇيەلى شارالار قابىلداندى.

اتاپ ايتقاندا، بۇل - گازداندىرۋ، ساپالى اۋىز سۋمەن ۇزدىكسىز قامتاماسىز ەتۋ، جول جوندەۋگە قاتىستى. بۇل تۋرالى كەربۇلاق اۋدانىنىڭ اكتيۆىمەن وتكەن كەزدەسۋدە وبلىس اكىمى بەيبىت يساباەۆ كەڭىنەن ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

- سوڭعى ءۇش جىلدا كەربۇلاق اۋدانىندا اۋقىمدى جۇمىستار اتقارىلدى، وزەكتى ينفراقۇرىلىمدىق ماسەلەلەر شەشىلدى. ماڭىزدى جوبالاردى ىسكە اسىرۋ مەن الەۋمەتتىك نىسانداردى سالۋعا بيۋدجەتتەن قوماقتى قارجى ءبولىندى. «سارىوزەك-كوكتال» رەسپۋبليكالىق ماڭىزى بار اۆتوموبيل جولىن جوندەۋ جۇمىستارى بىلتىر تولىق اياقتالدى، «سارىوزەك اۋىلىن اينالىپ ءوتۋ» جولى بيىل پايدالانۋعا بەرىلەدى. وسى جولدار بۇزىلماس ءۇشىن «الاتسەم» تسەنەمەت زاۋىتى تەحنيكالىق جول سالدى. سارىوزەكتى اۋىز سۋمەن تولىق قامتاماسىز ەتۋ جوباسى اياقتالۋدا، ەندى سۋ جۇيەسىن تەكسەرۋ مەن سىناقتان وتكىزۋ، اباتتاندىرۋ جۇمىستارى قالدى، - دەدى ب. يساباەۆ.

سونداي-اق سوڭعى ءۇش جىلدا اۋدانداعى جەرگىلىكتى ماڭىزى بار 67,3 شاقىرىم جولعا اعىمداعى جانە ورتاشا جوندەۋ جۇمىستارى جاسالدى، سونىڭ ىشىندە اۋىلدىڭ ىشكى جولدارى، ەلدى مەكەنگە كىرمە جولداردىڭ جوندەۋى، كوپىر قۇرىلىستارى دا بار.

جولدا ءجيى جۇرەتىن كولىك يەلەرى بۇل يگى وزگەرىستەرگە ريزاشىلىق ءبىلدىردى.

- قازىر اۋدانداعى جولداردىڭ ساپاسى ەداۋىر جاقساردى. ءوزىم سارىبۇلاق اۋىلىنان سارىوزەككە كۇندەلىكتى بارىپ-كەلىپ جۇمىس ىستەيمىن. سوندىقتان كۇن سايىن جول جۇرەمىن دەسەم ارتىق ايتقاندىق ەمەس. بۇرىن ويلى-شۇقىر جولمەن جۇرگەندە اي سايىن كولىگىمىزدى جوندەتۋگە تۋرا كەلەتىن. قازىر جولىمىز جاقسى، اسىرەسە اينالما جول پايدالانۋعا بەرىلەتىنىنە قۋانىپ وتىرمىز، - دەيدى سارىبۇلاق اۋىلىنىڭ تۇرعىنى اسەت وزەنباەۆ.

اۋدانداعى قولعا الىنعان تاعى ءبىر ماڭىزدى ينفراقۇرىلىمدىق جوبا – ەلدى مەكەندەردى گازداندىرۋ. مەملەكەت باسشىسىنىڭ كەربۇلاق اۋدانىنان تالدىقورعانعا دەيىنگى ەلدى مەكەندەرگە گاز تارتۋ تۋرالى تاپسىرماسىنا سايكەس جەتىسۋ وبلىسىندا سوڭعى ءۇش جىلدا قابىلدانعان شارالاردىڭ ارقاسىندا كەربۇلاق اۋدانىندا 25 اۋىلعا گاز تارتىلدى، ياعني 33,3 مىڭ تۇرعىننىڭ كوگىلدىر وتىنعا قوسىلۋىنا مۇمكىندىك جاسالدى. وعان قوسا تاعى 6 ەلدى مەكەنگە گاز تارتۋدىڭ جوبالاۋ-سمەتالىق قۇجاتتاماسىن ازىرلەۋ تاپسىرىلدى. قۇرىلىس جۇمىستارىن 2026–2027 جىلدارى جۇرگىزۋ جوسپارلانىپ وتىر.

بۇل رەتتە اۋدانعا گاز تارتىلعانىنا جانە اۋىز سۋ ماسەلەسىنىڭ شەشىلگەنىنە تۇرعىندار قۋانىشتى. سولاردىڭ ءبىرى سارىوزەك اۋىلىنىڭ تۇرعىنى تۇرعان مايشىبەكوۆا ءوز پىكىرىن ءبىلدىردى:

- ۇيىمىزگە گاز كىرگىزدىك. ەندى قىستا وتىن-كومىر تاسىپ، وت جاعىپ اۋرە بولمايمىز. سول سياقتى ءبىز ۇزاق جىل سۋ تاپشىلىعىن كورىپ كەلدىك، اۋىز سۋدى قۇدىقتان تاسىپ ىشتىك. قازىر ورتالىق سۋ جۇيەسى ىسكە قوسىلعان، ۇيگە سۋ قۇبىرىن تارتتىق. الداعى ۋاقىتتا سۋدىڭ جاڭا جەلىسىن ىسكە قوسقالى جاتقانىن ەستىدىك. ەندى سۋ بەرۋ جاعدايى بۇدان دا جاقسارادى دەپ سەنەمىز. جالپى العاندا قازىر قالا مەن اۋىل تۇرمىسىنىڭ ەش ايىرماشىلىعى جوق، اۋىلدا دا جايلى ءومىر سۇرۋگە بارلىق جاعدايىمىز جاسالعان، - دەدى ول.

Abai.kz