قازاقستان اۋماعىندا نيپاح ۆيرۋسىن جۇقتىرۋ دەرەكتەرى دە، ونى ەلگە سىرتتان اكەلۋ فاكتىلەرى دە انىقتالعان جوق.

دەنساۋلىق ساقتاۋ مينيسترلىگىنىڭ مالىمەتىنشە، قازىر رەسپۋبليكاداعى ەپيدەميولوگيالىق احۋال قالىپتى، جاعداي ءتيىستى ورگانداردىڭ باقىلاۋىندا.

سونىمەن بىرگە الدىن الۋ شارالارى كۇشەيتىلدى. ءۇندىستاندا نيپاح ۆيرۋسىنا قاتىستى ەپيدەميولوگيالىق جاعدايدىڭ ۋشىعۋىنا بايلانىستى، دەنساۋلىق ساقتاۋ مينيسترلىگى مەملەكەتتىك شەكارا ارقىلى وتەتىن بارلىق وتكىزۋ پۋنكتتەرىندە سانيتاريالىق-كارانتيندىك باقىلاۋدى كۇشەيتۋ تۋرالى شەشىم قابىلدادى.

وسى رەتتە ءۇندىستاننان، سونداي-اق نيپاح ينفەكتسياسى تىركەلگەن وڭتۇستىك-شىعىس ازيا ەلدەرىنەن كەلەتىن جولاۋشىلارعا ەرەكشە كوڭىل بولىنۋدە. اتالعان ينفەكتسيا بويىنشا قولايسىز سانالاتىن ەلدەر ءتىزىمى تۇراقتى تۇردە قايتا قارالىپ، قاجەت بولعان جاعدايدا جاڭارتىلىپ وتىرادى.

مەديتسينالىق ۇيىمدار ينفەكتسيانىڭ اكەلىنۋ قاۋپى تۋىنداعان جاعدايدا دايىندىق رەجيمىنە كەلتىرىلدى. شۇعىل مەديتسينالىق كومەك كورسەتەتىن بريگادالاردىڭ جانە ينفەكتسيالىق ستاتسيونارلاردىڭ ازىرلىگى قامتاماسىز ەتىلدى.

سونىمەن قاتار دارىلىك پرەپاراتتار، جەكە قورعانۋ قۇرالدارى، سونداي-اق دەزينفەكتسيالاۋ زاتتارى بويىنشا ازايتىلمايتىن قور قالىپتاستىرىلدى.

ينفەكتسيانىڭ تارالۋىنىڭ الدىن الۋ ماقساتىندا ەندەميالىق ەلدەرگە ساپار جوسپارلاپ وتىرعان ازاماتتارعا جەكە پروفيلاكتيكا شارالارىن قاتاڭ ساقتاۋ ۇسىنىلادى. ال ەلگە ورالعاننان كەيىن اۋرۋ بەلگىلەرى بايقالسا، بولعان مەملەكەتى تۋرالى اقپاراتتى مىندەتتى تۇردە ايتا وتىرىپ، دەرەۋ مەديتسينالىق كومەككە جۇگىنۋ قاجەت.

نيپاح ۆيرۋسى زوونوزدىق ينفەكتسيالار قاتارىنا جاتادى. ول ادامعا جانۋارلاردان جۇعۋى مۇمكىن: جارقاناتتاردان، شوشقالاردان، سونداي-اق ينفەكتسيا جۇقتىرعان اداممەن جاقىن ءارى تىعىز بايلانىس كەزىندە بەرىلۋ قاۋپى بار. بۇدان بولەك، ۆيرۋس لاستانعان تاعام نەمەسە سۋسىن ارقىلى دا جۇعۋى ىقتيمال.

اۋرۋ ادەتتە دەنە قىزۋىنىڭ كوتەرىلۋىمەن، باس اۋرۋىمەن، جالپى السىزدىكپەن كورىنىس بەرەدى. ال اۋىر جاعدايلاردا ورتالىق جۇيكە جۇيەسى زاقىمدانىپ، سونداي-اق پنەۆمونيا دامۋى مۇمكىن.

قازىرگى ۋاقىتتا نيپاح ۆيرۋسىنا قارسى ارنايى ەمدەۋ ءتاسىلى دە، رەسمي ماقۇلدانعان ۆاكتسينا دا جوق. كورسەتىلەتىن مەديتسينالىق كومەك سيمپتومدارعا بايلانىستى جۇرگىزىلەدى.

ءۇندىستاندا ولىمگە اكەلەتىن نيپاح ۆيرۋسى تارالىپ جاتقانىن ايتا كەتەيىك.

Abai.kz