انە-مىنە، رەسەيدىڭ ۋكرايناعا قارسى سوعىسىنىڭ جالعاسىپ جاتقانىنا تولىق ءتورت جىلعا جۋىقتايدى.

جۋىردا امەريكالىق «CSIS» زەرتتەۋ ورتالىعى (Center for Strategic and International Studies): «رەسەي ۋكرايناداعى سوعىستا ولگەنى مەن جارالانعاندارىن قوسا ەسەپتەگەندە 1,2 ملن ادامىن جوعالتتى»، - دەپ جازدى. ال ۋكراينانىڭ ادام شىعىنى 600 مىڭنان اسادى.

«CSIS» زەرتتەۋشىلەرىنىڭ ايتۋىنشا، رەسەيدىڭ جالپى ادام شىعىنى 1,2 ميلليوننىڭ شەگىنەن اسقان. سونىڭ ىشىندە 325 مىڭى قازا تاپقاندار. قالعاندارى اۋىر جارالانعان، اياق-قولدارىنان ايىرىلعاندار، جانە قايتا سوعىسقا جارامسىزدار ساپىندا. ءىز-ءتۇسسىز جوعالعاندار دا وسى 1,2 ملن-نىڭ ەسەبىندە.

«CSIS» زەرتتەۋشىلەرى: «ەكىنشى دۇنيەجۇزىلىك سوعىستان بەرى الەمنىڭ بىردە-ءبىر ەلى سوعىستا مۇنشالىق ادامىن جوعالتقان جوق»، - دەيدى.

كەشە اقش پرەزيدەنتى ترامپ بۇگىن بۇيدەدى:

- مەن جەكە ءوزىم پۋتيننەن كيەۆ پەن باسقا قالالاردى ءبىر اپتا بويى ايازعا بايلانىستى اتقىلاماۋدى سۇرادىم. ول كەلىستى، - دەيدى.

پرەزيدەنت زەلەنسكي ۋكراينا مەن رەسەي اراسىنداعى ەنەرگەتيكالىق ءبىتىم كەشە تۇندە كۇشىنە ەنەتىنىن حابارلادى. ونىڭ ايتۋىنشا، بۇل كەلىسىمگە ابۋ-دابيدە قول جەتكىزىلگەن.

- ءبىز ءبىتىمنىڭ ورىندالۋىنا ۇمىتتەنەمىز. اقش ەنەرگەتيكالىق ءبىتىمدى قامتاماسىز ەتەدى دەپ سەنەمىز، - دەدى. ال الدىڭعى كۇنى كيەۆتەگى زەلەنسكي ماسكەۋدەگى ءپۋتيندى جۇزبە-ءجۇز كەلىسسوزگە شاقىرعان.

كەشە ماسكەۋ جەكپە-جەكتەن جالتاردى. «پۋتين زەلەنسكيمەن كەزدەسۋدەن باس تارتپايدى. بىراق، زەلەنسكي ماسكەۋگە كەلسىن»، - دەدى.

تاقىرىپقا تۇزدىق:

Wall Street Journal 2026 جىلعا ارنالعان 3 ءتۇرلى ەڭ ىقتيمال ستسەناريدى اتاپ جازادى:

ءبىرىنشى ستسەناري: تاراپتار مايدان دالاسى مەن ديپلوماتيا ۇستەلىندە ابدەن تىعىرىققا تىرەلەدى جانە ۇزاققا سوزىلعان كەلىسسوزدەر بولادى…

Wall Street Journal بۇل ستسەناريدى ەڭ ىقتيمال دەپ اتايدى. ترامپ اكىمشىلىگى ء“پۋتيننىڭ ۋكراينانى تولىق باقىلاۋ يدەياسىنان باس تارتاتىنىنا” جانە “ۋكراينانىڭ دونباسستىڭ قالعان بولىگىنەن باس تارتاتىنىنا”، جانە تاراپتار بەيبىتشىلىككە كەلىسەتىنىنە ءباس تىگۋدە.

قازىر ۋكراينا بۇل يدەياعا قارسى. ال رەسەي باتىس اسكەرلەرىنىڭ ۋكرايناعا ورنالاستىرىلۋىنا قارسى. ال بۇل - بەيبىتشىلىك جوسپارىنىڭ نەگىزگى بولىگى سانالادى.

ەكىنشى ستسەناري: ۋكراينا ادامي رەسۋرستىق داعدارىسقا تاپ كەلسە، كيەۆتىڭ پوزيتسياسى السىرەيدى…

ۋكراينا ءۇشىن قازىر نەگىزگى قاۋىپ - حالىق پەن ساربازداردىڭ سوعىس پەن ونىڭ اۋىر زارداپتارىنان قاجىپ، شارشاۋى. قازىر ۋكراينا ارمياسى جاياۋ اسكەردىڭ جەتىسپەۋشىلىگىن دروندارمەن وتەپ جاتىر، بىراق رەسەي جاقىندا وسى “تەحنولوگيا شايقاسىنا” قىزۋ ارالاسىپ كەتتى.

سونىمەن قاتار، ۋكراينادا قازىر شىعىستا دا، وڭتۇستىكتە دە ورىستاردى تولىق توقتاتا الاتىن كۇش جەتىسپەيدى. ەگەر اسكەردىڭ ءھام حالىقتىڭ توزىمدىلىگى تاۋسىلسا، كيەۆ اقش-تىڭ ءالسىز كەپىلدىكتەرى مەن ماسكەۋدىڭ قاتال شارتتارىن قابىلداۋعا ءماجبۇر بولادى.

ءۇشىنشى ستسەناري: رەسەيدى جان-جاقتى قالجىراتۋ…

رەسەي ەكونوميكاسى قازىر ايتارلىقتاي توقىراۋدا، جوعارى پايىزدىق مولشەرلەمەلەر بيزنەسكە سوققى بوپ تيۋدە، ال رەسەي مۇنايىنىڭ باعاسىنىڭ تومەندەۋى جانە ۋكراينانىڭ مۇناي وڭدەۋ زاۋىتتارىنا تولاسسىز شابۋىلدارى كرەملدىڭ كىرىستەرىن قىسقارتۋدا.

رەسەيدەگى بيزنەس ءھام اسكەري-ساياسي ەليتا ماسكەۋدىڭ قىتايعا تاۋەلدىلىگىنە جانە اسكەري-ونەركاسىپتىك كەشەنىڭ السىزدىگىنە وتە-موتە نارازى. كرەمل قازىر بەت باقتىرماي تۇرعانىمەن، رەسەي ماڭگىلىك سوعىسا المايدى. قاتاڭ سانكتسيالار سوعىسقا ءتۇبى تۇساۋ بولادى. ماسكەۋ مۇنى نەعۇرلىم ەرتە مويىنداسا، كەلىسسوزدەر دە سوعۇرلىم شىنايى ديسكۋسسياعا اينالىپ، بەيبىتشىلىكتىڭ سۇلباسى كورىنە باستاماق.

Abai.kz