ءبىلىم مەن عىلىم، مادەنيەت پەن يننوۆاتسيا – جاڭا كونستيتۋتسيا جوباسىنىڭ وزەگىنە اينالا ما؟

الداعى ۋاقىتتا قوعام پىكىرى جيناقتالىپ، ودان كەيىن جالپىحالىقتىق رەفەرەندۋم وتەدى. سونىڭ ناتيجەسىندە زاماناۋي، جاڭا تالاپتارعا ساي اتا زاڭ قابىلدانادى. ول كۇن دە الىس ەمەس.

كونستيتۋتسيالىق كوميسسيا وتىرىستارىندا ەل دامۋىنىڭ قازىرگى كەزەڭىندە ءبىلىم مەن يننوۆاتسياعا نەگىزدەلگەن ەكونوميكا قالىپتاستىرۋدىڭ ماڭىزى ەرەكشە اتاپ ءوتىلدى. وسىعان بايلانىستى عىلىم مەن يننوۆاتسيا قاعيداتتارىن كونستيتۋتسيا دەڭگەيىندە بەكىتۋ ۇسىنىلدى. مۇنداي نورما عىلىمي قىزمەتتى تۇراقتى قارجىلاندىرۋعا بەرىك قۇقىقتىق نەگىز قالىپتاستىرىپ، زەرتتەۋ ورتالىقتارىنىڭ، ۋنيۆەرسيتەتتەردىڭ جانە تەحنولوگيالىق كومپانيالاردىڭ جۇيەلى ءارى تۇراقتى جۇمىس ىستەۋىنە مۇمكىندىك بەرۋى ءتيىس

جاڭا زاڭ جوباسىندا ءاربىر ازامات ءۇشىن اسا ماڭىزدى قۇندىلىقتار ايقىن كورىنىس تاپقان. اتاپ ايتقاندا، ازاماتتاردىڭ قۇقىقتارى مەن بوستاندىقتارى، بىرلىك پەن ىنتىماق، ەتنوسارالىق جانە كونفەسسياارالىق تاتۋلىق قاعيداتتارىمەن قاتار، بولاشاعىمىز ءۇشىن اسا قاجەت مادەنيەت پەن ءبىلىم، عىلىم مەن يننوۆاتسيا نەگىزگى باعدار رەتىندە الىنعان. بۇل – ەلدىڭ ۇزاق مەرزىمدى دامۋىنا باعىتتالعان سانالى تاڭداۋ.

شىنىندا دا، بۇگىندە عىلىمنىڭ ءرولى ايتارلىقتاي ارتتى. دەگەنمەن قازىرگى تاڭدا عىلىمي قىزمەت نەگىزىنەن سالالىق زاڭنامامەن عانا رەتتەلىپ كەلەدى. ال كونستيتۋتسيادا عىلىمعا قاتىستى ناقتى نورمالاردىڭ بولماۋى ونىڭ ەلدىڭ ورنىقتى دامۋىن قامتاماسىز ەتۋدەگى مارتەبەسى مەن ماڭىزىن السىرەتىپ وتىرعانى جاسىرىن ەمەس.

بولاشاق قارۋدىڭ ەمەس، عىلىم مەن تەحنولوگيانىڭ زامانى، سوندىقتان وسى قاعيداتتاردىڭ اتا زاڭنىڭ پرەامبۋلاسىنا بەكىتىلۋى كەلەشەك ۇرپاق ءۇشىن اسا ماڭىزدى.

توقتار جاقاش

Abai.kz