باياعىدا، سابەت زامانىندا، «قازاقفيلم» دۋبلياجى ۇزدىك بولدى.

ازەربايجاندار تۇسىرگەن «سونگەن وتتىڭ ساۋلەسى»، تاجىكتىڭ «سياۋىش تۋرالى اڭىزى» (فوتودا), «قولدى بولعان جەتى كۇيەۋى»، تۇرىكمەننىڭ «كەلىنى»، وزبەكتەردىڭ بيرۋني، حامزا تۋرالى فيلمدەرى، «قىرعىزفيلمنىڭ» مىقتى تۋىندىلارى قازاق تىلىنە كەرەمەت اۋدارىلدى.

بۇدان بولەك، «موسفيلم» مەن «لەنفيلم» ونىمدەرىن قازاقتىڭ ءوزى تۇسىرگەندەي ورنەكتى تىلمەن كەستەلەدى. قازاقتىڭ كينوسى ەكەن دەپ قالا جازدايتىنبىز.

ءبىر عانا نوۆوسەلتسەۆتىڭ («قىزمەتتەستەر حيكاياسى»): «ۆچەرا يا سلوۆنو س تسەپي سورۆالسيا» دەگەنىن «كەشە مەن اسىر caپ، ءتاۋىر جەلىگىپپىن» دەپ اۋدارۋ عاجاپ ەمەس پە؟ (قايبىر جىلى وسىنى ءبىر ارنا «مەن كەشە قارعىباۋدان بوسانىپ كەتىپپىن» دەپ اۋدارا سالعان).

نەمەسە «كاكايا مۋحا ۋكۋسيلا تەبيا؟» دەگەندى جاڭاعى ارنا («استانا» عوي دەيمىن) «سەنى قانداي شىبىن شاعىپ الدى؟» دەپ اۋدارعان.

ال «قازاقفيلمنىڭ» نۇسقاسى – «سەنى نە تۇلەن ءتۇرتتى-ەي؟» بولاتىن.

قازاق ءتىلىنىڭ مايەگىن بىلەتىن ادامدار ءسوز-سويلەمدى وسىلاي قازاقى قالىپتان اۋماي تارجىمەلەۋشى ەدى.

قازىر... وسى اۋدارىلعان فيلمدەردىڭ ءبارى ەفيردە جوق. «قازاقفيلمنىڭ» ارحيۆىندە بار ما، جوق پا، ونى دا ءبىر قۇداي بىلەدى. قايبىر جىلى يتتەي بوپ ىزدەپ تاپپاعام: ءبىرى بىرىنە سىلتەيدى. «قازاقستان» ۇلتتىق ارناسى، «حابار»، باسقا دا ارنالار بۇگىندە وسىلاردىڭ ءبىرىن كورسەتپەيدى. ەسكىرگەن، تۇككە جارامايتىن، كونە كون ەتىكتەي كورەتىن شىعار.

تەلەارنالار بۇگىندە باسقا... وتە ماڭىزدى شارۋالارمەن... تۇرىك سەريالدارىمەن اينالىسىپ جاتىر.

ىستەرىنە قۇداي بەرەكە بەرسىن، دەگەنمەن... جاڭاعى ەسكى اۋدارما-فيلمدەردى اپتاسىنا دەمەيىن، ايى دا قۇرىسىن، «بەۋ، قىزدار-اي» تەلەفيلمىندەگى سەركە (ەسبولعان جايساڭباەۆ) ايتپاقشى... «تىم بولماسا!»... ءۇش ايدا ءبىر بەرىپ قويۋعا بولماي ما ەكەن؟ ول فيلمدەردىڭ قازاقشاسىن شاشىنا اق تۇسكەن («اق تۇسكەن» دەپپىن-اۋ، ۆووبششە بار شاشى تۇسكەن) مەن سياقتىلار عانا ءبىلىپ، ەسكە الىپ وتىرۋى كەرەك پە؟

جاقسى اۋدارمانىڭ ۇزدىك ۇلگىلەرىن كەيىنگىلەر دە كورسە دەگەنىم عوي. بۇرىنعىلار دا ەسكە تۇسىرگىسى كەلەر. راس، عالامتوردا ورىسشالارى تۇر. بىراق ءبىز... ۇمىتىپ كەتپەسەك... قازاقپىز عوي! بار دۇنيەنى قازاقشا كورۋىمىز كەرەك ەمەس پە؟

ايتپەسە سول اۋدارمالارعا ءبىرى رەجيسسەر، ءبىرى رەداكتور، ءبىرى تارجىمەشى بولعان سەرىك جارمۇحامەدوۆ، ءساليحا سامبەتوۆا، اياعان ساعاەۆ، ءامىرتاي بوريەۆ، تۇرىسبەك ساۋكەتاەۆ، مايرا ابۋسەيىتوۆا، داريعا تنالينا، ت.ب. بەكەر جۇمىس ىستەگەن بولىپ شىقپاي ما؟

عاجاپ ارتيستەر – مۇحتار باقتىگەرەەۆ پەن التىنبەك كەنجەكوۆتىڭ، اتاگەلدى ىسمايىلوۆ پەن تاڭات جايلىبەكوۆتىڭ، فاريدا ءشارىپوۆا مەن راۋشان اۋەزباەۆانىڭ بۇكىل جان-جۇرەگىن بەرگەن ەڭبەكتەرى ەش كەتكەنى مە؟

بۇگىنگى اۋدارماشىلارعا ۇلگى بولاتىن ۇزدىك دۇنيەلەر ۇمىتىلماسا ەكەن دەيمىن.

ساكەن سىبانباي

Abai.kz