15 ناۋرىز قازاقستاننىڭ ساياسي ومىرىندەگى ماڭىزدى كۇندەردىڭ ءبىرى. پرەزيدەنت پارمەن بەرىپ، ءدال سول كۇنى ەلىمىزدە جاڭا كونستيتۋتسيا بويىنشا جالپىحالىقتىق رەفەرەندۋم وتەدى.

وسى ماڭىزدى ساياسي پروتسەسستىڭ قارساڭىندا ەلىمىزدە بىرنەشە باقىلاۋشىلار توپتارى قۇرىلىپ جاتىر. سولاردىڭ ءبىرى بەلگىلى ساياساتتانۋشى نۇربولات نىشانباي باستاعان «حالىق ءۇنى» باقىلاۋشىلار توبى.

ساياساتتانۋشى نۇربولات نىشانباي بۇگىن «حالىق ءۇنى» باقىلاۋشىلار توبىن قۇرعانىن مالىمدەدى. ول ەلىمىزدىڭ بىرنەشە قالاسىندا باقىلاۋشىلاردى وقىتىپ، الداعى رەفەرەندۋمدى باقىلاماق.

نۇربولات نىشانباي:

«ۇلكەن ساياسي ناۋقان كەلە جاتىر. رەفەرەندۋم. پوزيتسيا بىلدىرەر ءسات. كوزقاراس ايقىندالاتىن تۇس. بىزدە ءوز ۇستانىمىمىزدى ءبىلدىرۋدى ءجون كوردىك.  بىزدىڭ ۇستانىم – باقىلاۋشى بولۋ.

ساياسي ناۋقاندا، سايلاۋ ساتتەرىندە ءتۇرلى زاڭبۇزۋشىلىق بولىپ تۇرادى. ونى كوز كورىپ، قۇلاق ەستىگەن. كوميسسيا تاراپىنان حاتتاما كوشىرمەسىن بەرمەۋ، داۋىستى بۇرمالاۋ جانە باسقا دەگەندەي. داۋىس بەرۋشىلەر تاراپىنان دا ولقىلىقتار كەزدەسىپ جاتادى. ال باقىلاۋشى مىندەتى، سول سايلاۋ پروتسەسىنىڭ زاڭ تالاپتارىنا ساي ءوتۋىن باقىلاۋ، زاڭ بۇزىلعان ساتتە ونى تىركەۋ.

مىنە، وسى ميسسيانى الىپ ءجۇرۋدى ءجون كورۋدەمىز. «حالىق ءۇنى» دەگەن باقىلاۋشىلار توبىن قۇردىق. باقىلاۋشىلاردى دايىندايمىز، وقىتامىز، قىر-سىرىنا ۇيرەتەمىز. بايقاۋشىلاردى كاسىبي مامان، بەلگىلى ساياساتتانۋشى، قازاقستانعا باقىلاۋشىلىق ينستيتۋتتى العاش بولىپ اكەلگەن ازاماتتاردىڭ ءبىرى دوس كوشىم اعامىز وقىتادى. سونىمەن بىرگە بەكنۇر قيسىقوۆ اعامىز دا وقىتۋ پروتسەسىنە جەڭ ءتۇرىپ، كىرىسپەك. ساياسي ساراپشى نۇرگەلدى ابدىعاني، كاسىبي جۋرناليست يسلامبەك داستان دا ءوز قولداۋىن بىلدىرمەك. وقىتۋعا، باقىلاۋشىلاردى ۇيرەتۋگە قاتىسامىز دەپ وتىر. وزگە دە قولدايتىن، اقىل-كەڭەسىن ايتاتىن جاندار بار. ماقسات ايقىن، مىندەت انىق. ءوز باقىلاۋشىلارىمىز وتىرعان سايلاۋ ۋچاسكەلەرىندە داۋىس بەرۋدىڭ اشىق، ءادىل وتۋىنە ۇلەس قوسۋ»، - دەيدى.

Abai.kz