يراننىڭ قازاقستانداعى ەلشىسى ءالي اكبار دجوۋكاردىڭ ءتىلشى سۇراعىنا بەرگەن جاۋابى ەلەڭ ەتكىزدى.

ءتىلشى قازاقستاننىڭ نەگە يرانعا كوڭىل ايتپاعانىن سۇراعان ەكەن. ەلشى بارىنشا جاۋاپ بەرۋگە تىرىسىپتى.

«قازاقستان – ءبىز ءۇشىن دوس ءارى باۋىرلاس ەل. مۇمكىن، دەمالىس كۇنى بولعاندىقتان قازاقستان بيلىگى حابارلاما جىبەرۋگە مۇمكىندىك تاپپاعان شىعار»،- دەپ قيالاپتى. «بۇل سۇراقتىڭ جاۋابىن ءداتىڭ شىداسا، قازاقستان باسشىلارىنىڭ وزىنەن سۇراپ الىڭىز. مەنىڭ ۋچاسكەم ەمەس»، - دەگەندى ايتا الماعان ەكەن.

ارتىنشا قازاقستان سىرتقى ىستەر مينيسترلىگى يران حالقىنا باعىتتاپ يران بيلىگىنىڭ ارەكەتىن ايىپتاعان مالىمدەمە جاسادى. كەرى ادرەسىندە باسشىنى ايتپاعاندا، ءمينيستردىڭ دە ەسىم-سويى اتالمادى. جاڭادان تاعايىندالعان رەسمي وكىلدىڭ اتىنان جاريالاندى. قازا تاپقان اياتوللانىڭ دا مانساپ، اتى-ءجونى كەلتىرىلمەدى. يرانداعى قاڭتار وقيعاسىنا دا مەڭزەۋ بار سياقتى.

«سوڭعى قايعىلى وقيعالار سالدارىنان بەيبىت تۇرعىنداردىڭ، ونىڭ ىشىندە بالالاردىڭ، سونداي-اق يسلام رەسپۋبليكاسىنىڭ جوعارى باسشىلىعى وكىلدەرىنىڭ قازا بولۋىنا بايلانىستى يران حالقىنا قايعىرىپ كوڭىل ايتامىز»، - دەپتى قازاقستان ۋازىرلىگى.

مالىمدەمەنىڭ ايىپتاۋى مىنا تۇسىنان بايقالادى: «قازاقستان دوستىق پەن جان-جاقتى ىنتىماقتاستىق قاتىناستارىن دايەكتى تۇردە دامىتىپ كەلە جاتقان جانە يرانعا قارسى سوعىسقا قاتىسپايتىن اراب مەملەكەتتەرىنىڭ ازاماتتىق نىساندارىنا جاسالعان سوققىلارعا بايلانىستى وكىنىش بىلدىرەدى».

ادەتتە، قازاقستان باسشىلىعى ءتۇرلى-ءتۇستى دەمالىستار مەن ساپارلاردا ءجۇرىپ، باسقا ەلدەردەگى وقيعالاردىڭ سيپاتىنا وراي قۇتتىقتاۋ، نە كوڭىل ايتۋ جەدەلحاتىن جولداپ جاتاتىن. بۇل جولعى ءلام باسقا. يرانداعى ساياسي جۇيەنىڭ مۇددەسىن ەلەمەگەن، ونىڭ قۇلاۋىنا سەنىمدى ارەكەت بولىپ شىعىپتى.

قۋانىشبەك قاري

Abai.kz