ونىڭ بورىشى 5 ميلليون تەڭگەدەن اسىپ كەتكەن.  

سەمەي قالاسىنىڭ تۇرعىنى ەكى بالاسىنا ۇزاق ۋاقىت اليمەنت تولەمەگەنى ءۇشىن جاۋاپقا تارتىلىپ، باس بوستاندىعىنان ايىرىلدى.

38 جاستاعى ەر ادام 7 جىلعا جۋىق ۋاقىت بويى ەكى كامەلەتكە تولماعان بالاسىنا اليمەنت تولەۋدەن جالتارىپ كەلگەن.

سوت شەشىمىمەن ول كىنالى دەپ تانىلىپ، ءبىر جىل مەرزىمگە باس بوستاندىعىن شەكتەۋ جازاسىنا كەسىلگەن. سونىمەن قاتار وعان الكوگولگە تاۋەلدىلىكتەن ءماجبۇرلى تۇردە امبۋلاتورلىق ەم قابىلداۋ مىندەتتەلگەن.

سوتتالعان ازامات سەمەي قالاسىنىڭ ورتالىق اۋدانىنىڭ پروباتسيا قىزمەتىنە ەسەپكە الىنعان. الايدا پروفيلاكتيكالىق جۇمىستار جۇرگىزىلگەنىنە قاراماستان، ول بەلگىلەنگەن تالاپتاردى بىرنەشە رەت بۇزعان. اتاپ ايتقاندا، پروباتسيا قىزمەتىنە تىركەلۋگە كەلمەي، تۇنگى ۋاقىتتا رۇقساتسىز تۇرعىلىقتى جەرىنەن كەتكەن.

وسىعان بايلانىستى سوت باس بوستاندىعىن شەكتەۋ جازاسىن 11 اي مەرزىمگە باس بوستاندىعىنان ايىرۋ جازاسىنا اۋىستىردى.

سوتتالعان ەر ادام ءوز سوزىندە وتكەن ومىرىنە وكىنىش ءبىلدىرىپ، وتباسى مەن بالالارىنىڭ سەنىمىنەن ايىرىلعانىن مويىندادى.

پروباتسيا قىزمەتىنىڭ مالىمەتىنشە، مۇنداي ەسەپتە تۇرعان ازاماتتارعا قوعامنان وقشاۋلاۋسىز تۇزەلۋگە مۇمكىندىك بەرىلەدى. الايدا جازانى وتەۋ تالاپتارى جۇيەلى تۇردە بۇزىلعان جاعدايدا، سوت جازانى قاتاڭداتۋ تۋرالى شەشىم قابىلدايدى.

Abai.kz