يراننىڭ مەملەكەتتىك تەلەديدارى بەيسەنبى كۇنى يراننىڭ جاڭا جوعارعى كوسەمى مودجتابا حامەنەيدىڭ العاشقى مالىمدەمەسىن تاراتتى. مالىمدەمەدە ول اكەسىنىڭ كەگىن قايتاراتىنىن ايتتى، بىراق باياندامانى ول ءوزى جاساعان جوق. 56 جاستاعى كىشى حامەنەي شابۋىلدا جاراقات العان، بىراق ونىڭ ناقتى قايدا ەكەنى جانە جاعدايىنىڭ قانداي ەكەنى بەلگىسىز.

ونىڭ دەنساۋلىعى ءالى كۇنگە دەيىن جۇمباق كۇيىندە قالىپ وتىر. يراندىق تەلەجۇرگىزۋشى حابار تاراتۋ كەزىندە: «بۇل يسلام رەۆوليۋتسياسىنىڭ جوعارعى كوسەمى، قۇرمەتتى اياتوللا سايد مودجتابا حوسسەين حامەنەيدىڭ العاشقى مالىمدەمەسى!» دەپ جاريالادى. سودان كەيىن ول ۇزاق مالىمدەمەنى وقىدى.

جاڭا اياتوللانىڭ مالىمدەمەنى وقىپ وتىرعان ۆيدەوسى دا، اۋديو نەمەسە سوڭعى فوتوسۋرەتتەرى دە بولعان جوق. كورەرمەندەر ونىڭ ەسكى فوتوسۋرەتى مەن جاڭاشا وڭدەلگەن يران يسلام رەسپۋبليكاسى تۋىنىڭ سۋرەتىن عانا كوردى.

كەك الۋعا ۇندەۋ

مالىمدەمەدە جوعارعى كوشباسشى يراننىڭ جاۋلارىمەن تاتۋلاسۋ نيەتى جوق ەكەنىن ءبىلدىرىپ، كەرىسىنشە كەك الۋ قاجەتتىلىگىن اتاپ ءوتتى. مالىمدەمەدە: «قازىرگى ۋاقىتتا كەك الۋ ارەكەتتەرى ءجۇرىپ جاتىر، بىراق بۇل تولىق ەمەس، ماقساتقا جەتۋدەگى قادام عانا»، - دەلىنگەن.

سونىمەن قاتار: «ءبىز جاۋلارىمىزدان وتەماقى تالاپ ەتەمىز; ەگەر ولار باس تارتسا، ءبىز ءوز شەشىمدەرىمىزگە سايكەس تەڭ قۇندى اكتيۆتەردى تاركىلەيمىز; ەگەر بۇل مۇمكىن بولماسا، ءبىز تەڭ مولشەردەگى مۇلىكىن جويامىز»، - دەپ مالىمدەدى.

ول سونداي-اق يراننىڭ وڭتۇستىگىندەگى مينابتاعى مەكتەپكە جاسالعان شابۋىل تۋرالى دا ايتتى. يران بيلىگى شابۋىلدى امەريكا قۇراما شتاتتارى جاساعانىن جانە 175 ادامنىڭ قازا تاپقانىن مالىمدەدى. ول بۇل وقيعانى «جاۋ جاساعان قاساقانا قىلمىس» دەپ سيپاتتادى. The New York Times گازەتى سارسەنبىدە اقش اسكەري تەرگەۋىنىڭ ناتيجەسىنە سىلتەپ اقش زىمىرانىنىڭ ول مەكتەپتى قاتەلەسىپ نىساناعا العانىن حابارلادى.

جاۋعا سەس كورسەتۋ

مودجتابا حامەنەي مارقۇم اكەسىنىڭ قاتال ريتوريكاسىن جالعاستىرىپ، يراننىڭ مۇناي قورىن ازايتۋ نەمەسە ايماقتىق وداقتاستارىن جۇمىلدىرۋ ارقىلى تاياۋ شىعىستا تۇراقسىزدىق تۋدىرۋ مۇمكىندىگىن اتاپ ءوتتى.

ول «ورمۋز بۇعازىن جاۋىپ تاستاۋ كوزىرىن» پايدالانۋعا شاقىردى. «حالىقتىڭ ەرىك-جىگەرى – ەڭ ءونىمدى ءارى ءتيىمدى قورعانىس، جاۋدى تىزەرلەتىپ ءوز ارەكەتتەرىنە وكىندىرەتىن كۇش»، - دەدى.

ول سونداي-اق يراننىڭ «جاۋ تاجىريبەسى از، ىرىقسىز وزگە دە مايدانداردى اشۋدى قاراستىرىپ جاتقانىن، سوعىس ۇزارا بەرسە، ول تەتىكتەردى دە ىسكە قوساتىنىن» ايتتى.

ايماق ەلدەرىنە ەسكەرتۋ

حامەنەي يراننىڭ شامامەن 15 ەلمەن قۇرلىق ءارى تەڭىز شەكاراسى بار ەكەنىن اتاپ ءوتتى. مالىمدەمەدە: «ءبىز بۇل ەلدەرمەن ارقاشان جىلى جانە سىندارلى قارىم-قاتىناس ورناتۋعا ۇمىتتەندىك»، - دەلىنگەن. ول ايماقتاعى ەلدەردى اقش اسكەري بازالارىن جابۋعا شاقىرىپ، «اقش-تىڭ اتالمىش قاۋىپسىزدىك پەن بەيبىتشىلىگى – وتىرىكتەن  باسقا ەشتەڭە ەمەس»،

«بۇل ەلدەر ءوز ۇستانىمىن ناقتىلاۋى كەرەك: ولار ءبىزدىڭ سۇيىكتى وتانىمىزعا باسىپ كىرىپ، حالقىمىزدى ولتىرگەندەرمەن ءبىر جاق بولا ما، الدە ولارعا قارسى تۇرا ما»، - دەگەن.

جاقىندارىن جوقتاۋ

ءوز مالىمدەمەسىندە اكەسىنە ەرەكشە قۇرمەت كورسەتىپ، ونى «جارقىراعان قازىنا» جانە «ەرەكشە تاريحي تۇلعا» دەپ اتادى. ول اكەسىنىڭ «شەيىت بولعاننان» كەيىن كورگەن دەنەسىن «قۇرىش تاۋ سياقتى» دەپ سيپاتتادى، جالعىز قولىىنىڭ جۇدىرىعى تاس تۇيىلگەنىن ايتتى.

مودجتابا حامەنەي جويقىن شابۋىلدا «سۇيىكتى جانە ادال ايەلىن»، اپكەسىن، جيەنىن جانە جەزدەسىن جوعالتقانىن ەسكە الدى.

ول اناسى مانسۋرە حودجاستەح باگەرزادە تۋرالى ايتقان جوق. بۇعان دەيىن بىرنەشە باق ونىڭ قايتىس بولعانىن حابارلاعان بولاتىن. دەگەنمەن، يراننىڭ «فارس» اقپارات اگەنتتىگى بەيسەنبى كۇنى بۇل شىندىققا جاناسپايتىنىن جانە ونىڭ ءالى ءتىرى ەكەنىن مالىمدەدى.

Abai.kz