دەنساۋلىق ساقتاۋ مينيسترلىگى 2028 جىلعا دەيىن قان دونورلىعىن دامىتۋ جونىندەگى ءىس-شارالار جوسپارىن ازىرلەپ جاتىر. بۇل تۋرالى پرەمەر-مينيستر ولجاس بەكتەنوۆ دەپۋتاتتىق ساۋالعا بەرگەن جاۋابىندا مالىمدەدى.

ونىڭ ايتۋىنشا، جوسپار مەديتسينالىق قىزمەتتەر تىزبەسىن كەڭەيتۋدى، ونىڭ ىشىندە گەموپوەتيكالىق ءدىڭ جاسۋشالارىن ترانسپلانتاتسيالاۋدى ەسكەرە وتىرىپ، مەملەكەتتىك ساياساتتى جەتىلدىرۋدى كوزدەيدى.

– قان كومپونەنتتەرىن ساپالى ءارى قاۋىپسىز قولدانۋدى قامتاماسىز ەتۋ ءۇشىن دونورلىق قانعا ەكى كەزەڭدى سكرينينگ ەنگىزىلدى. سونىمەن قاتار ونىڭ كومپونەنتتەرىن وڭدەۋدىڭ زاماناۋي ادىستەرى قولدانىلادى، وعان قوسا ينفەكتسيالىق جانە يممۋنولوگيالىق قاۋىپسىزدىككە باقىلاۋ كۇشەيتىلدى، – دەلىنگەن قۇجاتتا.

بۇدان بولەك، ۇكىمەت باسشىسى ەلىمىزدە بۇگىنگى كۇنى قاۋىپسىزدىك پەن ساپانىڭ زاماناۋي تالاپتارىنا سايكەس كەلەتىن قان قىزمەتىنىڭ ورتالىقتاندىرىلعان جانە ستاندارتتالعان مودەلى قالىپتاسقانىن اتاپ ءوتتى.

– قازىرگى ۋاقىتتا رەسپۋبليكا بويىنشا قان قىزمەتىنىڭ 19 ۇيىمى جۇمىس ىستەيدى. ونىڭ ىشىندە 2 رەسپۋبليكالىق، 15 وبلىستىق جانە 2 قالالىق ۇيىم بار، – دەپ تولىقتىردى ولجاس بەكتەنوۆ.

Abai.kz