بۇگىن ءماجىلىس وتىرىسىندا «AMANAT» پارتياسى فراكتسياسىنىڭ مۇشەسى تەمىر قىرىقباەۆ پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە اگروونەركاسىپتىك كەشەن سالاسىن بىلىكتى ماماندارمەن قامتاماسىز ەتۋ تۋرالى دەپۋتاتتىق ساۋال جولداپ، اۋىل شارۋاشىلىعى قىزمەتكەرلەرىنىڭ ەڭبەكاقىسىن ارتتىرۋ ماقساتىندا ۇكىمەت تاراپىنان قوسىمشا تولەمدەر قاراستىرىپ، جەرگىلىكتى بيۋدجەت ەسەبىنەن ارنايى سۋبسيديالاۋ باعدارلاماسىن ەنگىزۋدى ۇسىندى.

ءبىز اتالعان ساۋالدا Abai.kz وقىرماندارىنىڭ تالقىسىنا ۇسىنامىز...

دەپۋتاتتىق ساۋال

قر پرەمەر-ءمينيسترىنىڭ ورىنباسارى سەرىك ماقاشۇلى جۇمانعارينگە!

مەملەكەت باسشىسى قاسىم-جومارت توقاەۆتىڭ بىلتىرعى جولداۋىندا: «ەلدەگى ازىق-تۇلىك نارىعىنىڭ يمپورتقا تاۋەلدىلىگىن بارىنشا ازايتۋ – ۇكىمەتتىڭ ستراتەگيالىق مىندەتى دەپ اتاپ وتكەن بولاتىن. ازىق-تۇلىك قاۋىپسىزدىگىن قامتاماسىز ەتۋ – قازاقستاننىڭ ستراتەگيالىق مىندەتى، ول وتاندىق اۋىل شارۋاشىلىعىن دامىتۋ، ءونىمدى جەتكىزۋ لوگيستيكاسىن وڭتايلاندىرۋ جانە يمپورتقا تاۋەلدىلىكتى ازايتۋ ارقىلى شەشىلەدى. تۇراقتى ءوندىرىس پەن ساپالى ءونىم حالىقتىڭ ءال-اۋقاتىن ارتتىرۋدىڭ باستى كەپىلى بولۋدا. بۇگىنگى تاڭعا جاھاندىق ازىق-تۇلىك داعدارىسى مەن حالىق سانىنىڭ ءوسۋى جاعدايىندا ءوزىن-ءوزى قامتاماسىز ەتۋ تاۋەلسىزدىك پەن تۇراقتىلىقتىڭ ماڭىزدى فاكتورىنا اينالۋدا. بۇل باعىتتاعى جۇمىستار ەلىمىزدىڭ الەۋمەتتىك-ەكونوميكالىق دامۋىنىڭ نەگىزى بولىپ تابىلادى.

پارلامەنت ءماجىلىسىنىڭ دەپۋتاتى رەتىندە جىل باسىندا وڭىرلەرگە بارىپ سايلاۋشىلارمەن كەزدەسۋ وتكىزىپ، اۋىل-ايماقتارداعى وزەكتى ماسەلەلەرمەن تانىستىم.

اۋىلداعى شارۋالار اگروسەكتورداعى ەڭ وزەكتى ءارى كۇردەلى ماسەلەنىڭ ءبىرى رەتىندە – كادر تاپشىلىعىن اتاپ ءوتتى. اسىرەسە، مالشى، ساۋىنشى، مەحانيزاتور، ۆەتەرينار، اگرونوم، زووتەحنيك سەكىلدى مامانداردىڭ جەتىسپەۋشىلىگى  بار ەكەنىن جەتكىزدى. بۇل جاعداي اۋىلدىق جەرلەردەگى تۇرمىس دەڭگەيىنىڭ تومەندىگىمەن، ەڭبەكاقى مولشەرىنىڭ جەتكىلىكسىزدىگىمەن جانە الەۋمەتتىك قولداۋ تەتىگىنىڭ السىزدىگىمەن تىكەلەي بايلانىستى.

اتالعان جۇيەلى ماسەلەلەر جوعارى اۋديتورلىق پالاتا ەسەبىندە دە ايقىن كورىنىس تاپقان. اتاپ ايتقاندا، زەينەتاقى جارنالارى اۋدارىلماعان ازاماتتاردىڭ سانىنىڭ ايتارلىقتاي كوپ بولۋى نازار اۋدارتادى. بۇل جاعداي ەڭبەك زاڭناماسىنىڭ ساقتالۋ دەڭگەيىندە ەلەۋلى ولقىلىقتار بار ەكەنىن كورسەتەدى. مۇنداي ءۇردىس جۇمىس بەرۋشىلەر تاراپىنان مىندەتتەمەلەردىڭ تولىق ورىندالماۋى نەمەسە باقىلاۋ تەتىكتەرىنىڭ السىزدىگىمەن بايلانىستى بولۋى مۇمكىن.

كادر تاپشىلىعىنىڭ ورىن الۋى اگروونەركاسىپتىك كەشەننىڭ تۇراقتى دامۋىنا، ەڭبەك ونىمدىلىگىنىڭ ارتۋىنا جانە ەلدىڭ ازىق-تۇلىك قاۋىپسىزدىگىنە تىكەلەي قاۋىپ توندىرەدى.

وسىعان بايلانىستى، اۋىل شارۋاشىلىعى سالاسىنا مامانداردى تارتۋ جانە ولاردى تۇراقتاندىرۋ ماقساتىندا كەشەندى ءارى جۇيەلى وزگەرىستەر ەنگىزۋ قاجەت دەپ ەسەپتەيمىن.

بۇگىنگى تاڭعا، ۇكىمەت  قازاقستان نەگىزگى ازىق-تۇلىك ونىمدەرى بويىنشا تولىق ءوزىن-ءوزى قامتاماسىز ەتۋگە كوشۋدى 2028 جىلعا دەيىن جوسپارلاپ وتىر. مەنىڭ ەسەبىم بويىنشا اۋىلداعى شارۋالاردىڭ تاراپىنان  كوتەرىپ وتىرعان كادرلىق ماسەلەسىن تولىققاندى شەشپەي ەلىمىزدى ازىق-تۇلىك ونىمدەرىمەن 2028 جىلعا دەيىن ءوزىن-ءوزى تولىق قامتاماسىز ەتۋگە مۇمكىن ەمەس دەپ سانايمىن.

وسىعان وراي كەلەسى ماسەلەلەردى شەشۋدى سۇرايمىن:

1. اۋىل شارۋاشىلىعى قىزمەتكەرلەرىنىڭ ەڭبەكاقىسىن ارتتىرۋ ماقساتىندا ۇكىمەت تاراپىنان قوسىمشا تولەمدەر قاراستىرىپ، جەرگىلىكتى بيۋدجەت ەسەبىنەن ارنايى سۋبسيديالاۋ باعدارلاماسىن ەنگىزۋدى;

2. اۋىل شارۋاشىلىعى سالاسىندا ەڭبەك ەتەتىن ازاماتتار ءۇشىن جەكە تابىس سالىعىنىڭ تومەندەتىلگەن مولشەرلەمەسىن بەلگىلەۋدى;

3. اگرارلىق كوللەدجدەر مەن جوعارى وقۋ ورىندارىندا ماقساتتى گرانتتار سانىن ۇلعايتىپ، شاكىرتاقى كولەمىن ارتتىرۋدى ۇسىنامىن.

ت. قىرىقباەۆ، دەپۋتات – «AMANAT» پارتياسى فراكتسياسىنىڭ مۇشەسى

Abai.kz