استانادا «تازا قازاقستان – جاۋاپكەرشىلىك بەلەسى» ايلىعى اياسىندا 100-گە جۋىق سپورت سالاسىنىڭ وكىلى ەكولوگيالىق اكتسياعا قاتىستى.
ءىس-شاراعا تانىمال سپورتشىلار، جاتتىقتىرۋشىلار جانە قالالىق سپورت باسقارماسىنىڭ قىزمەتكەرلەرى قاتىستى، دەپ حابارلايدى قالا اكىمدىگىنىڭ رەسمي سايتى.

ولار پرەزيدەنتتىك پارك جاعالاۋىندا تازالىق جۇرگىزدى. اكتسيانىڭ ماقساتى – قالانىڭ سانيتارلىق جاعدايىن جاقسارتۋ جانە قوعامدا ەكولوگيالىق مادەنيەتتى قالىپتاستىرۋ.

سەنبىلىككە دجيۋ-دجيتسۋ جانە گرەپپلينگتەن الەم، ازيا چەمپيونى نۇرجان باتىربەكوۆ، مما-دان قازاقستان چەمپيونى نۇرلان قارابالين، گرەك-ريم كۇرەسىنەن ازيا چەمپيونى (U23) مەرەي ءماۋلىتحانوۆ، حالىقارالىق دارەجەدەگى سپورت شەبەرى ايبەك ايتبەكوۆ، شورت-ترەكتەن ازيا ويىندارىنىڭ چەمپيونى ايبەك ناسەن، سونداي-اق سانجار جانىسوۆ سەكىلدى سپورتشىلار قاتىستى.

«مۇنداي ەكولوگيالىق اكتسيالارعا قاتىسۋ – ازاماتتىق پارىزىمىز. سپورتشى تەك جارىستا ەمەس، ومىردە دە ۇلگى بولۋى كەرەك. ەلوردامىزدىڭ تازا، جايلى ءارى زاماناۋي بولعانىن قالايمىز جانە وعان ءوز ۇلەسىمىزدى قوسۋعا دايىنبىز»، – دەدى نۇرلان قارابالين.

قاتىسۋشىلار مۇنداي باستامالار ەكولوگيانى جاقسارتۋمەن قاتار، جاستار اراسىندا جاۋاپكەرشىلىك پەن بىرلىك مادەنيەتىن قالىپتاستىراتىنىن اتاپ ءوتتى.

«سپورت – تەك مەدال مەن جارىس ەمەس، ول ءتارتىپ پەن جاۋاپكەرشىلىك. وسىنداي شارالارعا قاتىسۋ ارقىلى جاستارعا ۇلگى كورسەتەمىز جانە قالانىڭ تازا بولاشاعىنا ۇلەس قوسامىز. مۇنداي باستامالار داستۇرگە اينالۋى كەرەك»، – دەدى ايبەك ناسەن.

Abai.kz