قازاقستاندىق مەكتەپ بىتىرۋشىلەر ءۇشىن ۇلتتىق بىرىڭعاي تەستىلەۋ (ۇبت) جۇيەسىندە ۇلكەن وزگەرىستەر كۇتىپ تۇر. ۇكىمەت گرانت يەگەرلەرىن ىرىكتەۋ ساپاسىن ارتتىرۋ ءۇشىن تەستىلەۋدى جىلىنا ءبىر-اق رەت تاپسىرۋ ەرەجەسىنە قايتا ورالۋدى جوسپارلاپ وتىر.

گرانت تاعدىرى ءبىر ەمتيحانعا بايلانباق

سوڭعى جىلدارى تالاپكەرلەرگە نەگىزگى ۇبت-نى ەكى رەت تاپسىرۋعا مۇمكىندىك بەرىلگەن بولاتىن. الايدا، قر پرەمەر-ءمينيسترىنىڭ ورىنباسارى ايدا بالاەۆانىڭ ايتۋىنشا، بۇل جۇيەگە ترانسفورماتسيا قاجەت. ۆيتسە-پرەمەر گرانتقا ۇمىتكەرلەردى ىرىكتەۋدە «ءبىر رەتتىك تاپسىرۋ» ەرەجەسىن بەكىتۋ — ءبىلىم دەڭگەيىن وبەكتيۆتى جانە ناقتى باعالاۋدىڭ تورەشىسى بولاتىنىن اتاپ ءوتتى.

«ءبىز جىبەرىلگەن كەمشىلىكتەردى تۇزەۋىمىز كەرەك. ۇبت-نى گرانت كونكۋرسىنا قاتىسۋدىڭ وبەكتيۆتى جانە تۇپكىلىكتى باعاسى رەتىندە ءبىر-اق رەت تاپسىرۋ ەرەجەسىن بەكىتۋ قاجەت. بۇل رەتتە وقۋشىنىڭ ءوز ءبىلىمىن تەكسەرىپ، دايىندىق ادىستەرىن تۇزەتۋى ءۇشىن بايقاۋ سىناقتارى ساقتالادى»، — دەدى ايدا بالاەۆا.

بولاشاق مۇعالىمدەرگە — ەرەكشە تالاپ

بيىلعى وزگەرىستەر تەك تەستىلەۋ فورماتىمەن شەكتەلمەيدى. اسىرەسە، پەداگوگيكالىق ماماندىقتارعا تۇسۋشىلەر ءۇشىن تالاپ كۇشەيمەك. كەلەسى جىلدان باستاپ بولاشاق مۇعالىمدەر ۇبت-دان بولەك، اۋىزشا ەمتيحاندار تاپسىراتىن بولادى.

ەمتيحان بارىسىندا ابيتۋريەنتتىڭ:

سىني ويلاۋ قابىلەتى;

كوممۋنيكاتيۆتىك داعدىلارى;

پەداگوگيكالىق جۇمىسقا پسيحولوگيالىق دايىندىعى تەكسەرىلەدى.

قازىرگى ۋاقىتتا حالىقارالىق ساراپشىلارمەن بىرلەسە وتىرىپ، مۇعالىم بولۋعا نيەتتى جاستاردىڭ الەۋەتىن انىقتايتىن ارنايى تەستىلەۋ جۇيەسى ازىرلەنۋدە.

بيىلعى فورمات: ازىرگە وزگەرىس جوق

جاڭاشىلدىقتار ايتىلعانىمەن، 2026 جىلعى تۇلەكتەر ءۇشىن تەستىلەۋ فورماتى ايتارلىقتاي وزگەرمەيدى. ۇلتتىق تەستىلەۋ ورتالىعىنىڭ مالىمەتىنشە، بيىلعى ەمتيحاننىڭ سيپاتى تومەندەگىدەي:

سۇراق سانى: 120 تاپسىرما;

ەڭ جوعارى بالل: 140;

ۋاقىت: 4 ساعات (240 مينۋت);

پاندەر: 3 مىندەتتى جانە 2 تاڭداۋ ءپانى.

ايتا كەتەرلىگى، ەلىمىزدە قۇنى 3 ميلليون دوللار بولاتىن جاڭا ۇلتتىق تەست ازىرلەنىپ جاتىر. بولاشاقتا بۇل تەست ۇبت-نىڭ بالاماسى بولىپ، حالىقارالىق دەڭگەيدە تانىلۋى مۇمكىن.

ەستە ساقتاڭىز!

11 ساۋىردەن باستاپ نەگىزگى ۇبت-عا ءوتىنىش قابىلداۋ باستالدى. تىركەلۋ 25 ساۋىرگە دەيىن جالعاسادى. تالاپكەرلەر ءوتىنىشتى ۇلتتىق تەستىلەۋ ورتالىعىنىڭ رەسمي سايتى (app.testcenter.kz) نەمەسە UTO ءموبيلدى قوسىمشاسى ارقىلى بەرە الادى.

مامانداردىڭ ايتۋىنشا، بارلىق وزگەرىستەر كەزەڭ-كەزەڭىمەن ەنگىزىلەدى. ماقسات — تالاپكەرلەرگە ارتىق جۇك سالماي، ولاردىڭ تەك جاتتاعان ءبىلىمىن ەمەس، سول ءبىلىمدى پراكتيكادا قولدانا الۋ قابىلەتىن تەكسەرۋ.

Abai.kz