Қазақстандық мектеп бітірушілер үшін Ұлттық бірыңғай тестілеу (ҰБТ) жүйесінде үлкен өзгерістер күтіп тұр. Үкімет грант иегерлерін іріктеу сапасын арттыру үшін тестілеуді жылына бір-ақ рет тапсыру ережесіне қайта оралуды жоспарлап отыр.

Грант тағдыры бір емтиханға байланбақ

Соңғы жылдары талапкерлерге негізгі ҰБТ-ны екі рет тапсыруға мүмкіндік берілген болатын. Алайда, ҚР Премьер-министрінің орынбасары Аида Балаеваның айтуынша, бұл жүйеге трансформация қажет. Вице-премьер грантқа үміткерлерді іріктеуде «бір реттік тапсыру» ережесін бекіту — білім деңгейін объективті және нақты бағалаудың төрешісі болатынын атап өтті.

«Біз жіберілген кемшіліктерді түзеуіміз керек. ҰБТ-ны грант конкурсына қатысудың объективті және түпкілікті бағасы ретінде бір-ақ рет тапсыру ережесін бекіту қажет. Бұл ретте оқушының өз білімін тексеріп, дайындық әдістерін түзетуі үшін байқау сынақтары сақталады», — деді Аида Балаева.

Болашақ мұғалімдерге — ерекше талап

Биылғы өзгерістер тек тестілеу форматымен шектелмейді. Әсіресе, педагогикалық мамандықтарға түсушілер үшін талап күшеймек. Келесі жылдан бастап болашақ мұғалімдер ҰБТ-дан бөлек, ауызша емтихандар тапсыратын болады.

Емтихан барысында абитуриенттің:

Сыни ойлау қабілеті;

Коммуникативтік дағдылары;

Педагогикалық жұмысқа психологиялық дайындығы тексеріледі.

Қазіргі уақытта халықаралық сарапшылармен бірлесе отырып, мұғалім болуға ниетті жастардың әлеуетін анықтайтын арнайы тестілеу жүйесі әзірленуде.

Биылғы формат: Әзірге өзгеріс жоқ

Жаңашылдықтар айтылғанымен, 2026 жылғы түлектер үшін тестілеу форматы айтарлықтай өзгермейді. Ұлттық тестілеу орталығының мәліметінше, биылғы емтиханның сипаты төмендегідей:

Сұрақ саны: 120 тапсырма;

Ең жоғары балл: 140;

Уақыт: 4 сағат (240 минут);

Пәндер: 3 міндетті және 2 таңдау пәні.

Айта кетерлігі, елімізде құны 3 миллион доллар болатын жаңа ұлттық тест әзірленіп жатыр. Болашақта бұл тест ҰБТ-ның баламасы болып, халықаралық деңгейде танылуы мүмкін.

Есте сақтаңыз!

11 сәуірден бастап негізгі ҰБТ-ға өтініш қабылдау басталды. Тіркелу 25 сәуірге дейін жалғасады. Талапкерлер өтінішті Ұлттық тестілеу орталығының ресми сайты (app.testcenter.kz) немесе UTO мобильді қосымшасы арқылы бере алады.

Мамандардың айтуынша, барлық өзгерістер кезең-кезеңімен енгізіледі. Мақсат — талапкерлерге артық жүк салмай, олардың тек жаттаған білімін емес, сол білімді практикада қолдана алу қабілетін тексеру.

Abai.kz