الماتىدا اباي اتىنداعى قازاق ۇلتتىق وپەرا جانە بالەت تەاترىندا حالىق جازۋشىسى، قازاقستاننىڭ ەڭبەك ەرى، كورنەكتى اقىن جانە قوعام قايراتكەرى مۇحتار شاحانوۆپەن قوشتاسۋ ءراسىمى ءوتتى.

سۋرەت: ماقسات قۇسايىن.

ۇلت رۋحىنىڭ جىرشىسىن اقتىق ساپارعا شىعارىپ سالۋعا مەملەكەت جانە قوعام قايراتكەرلەرى، زيالى قاۋىم وكىلدەرى، زامانداستارى مەن اقىن شىعارماشىلىعىنىڭ قالىڭ تابىنۋشىلارى كەلدى. بۇعان قوسا، اقىنمەن قوشتاسۋعا قازاقستان پارلامەنتى سەناتىنىڭ توراعاسى ماۋلەن اشىمباەۆ، پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا، الماتى اكىمى دارحان ساتىبالدى جانە باسقا دا مەملەكەت قايراتكەرلەرى كەلدى.

سۋرەت: ماقسات قۇسايىن.

مەملەكەت باسشىسىنىڭ كوڭىل ايتۋ جەدەلحاتىن وقىعان قازاقستان پارلامەنتى سەناتىنىڭ توراعاسى ماۋلەن اشىمباەۆ بۇل قازا قالىڭ وقىرماننىڭ قابىرعاسىن قايىستىرعان اۋىر قازا بولعانىن اتاپ ءوتتى.

سونداي-اق اقىنمەن قىرعىزستاندىق جازۋشى شولپونبەك ابىكەەۆ قوشتاسىپ، قىرعىزستان پرەزيدەنتى سادىر جاپاروۆتىڭ كوڭىل ايتۋ ءسوزىن جەتكىزدى.

سۋرەت: ماقسات قۇسايىن.

قارالى جيىندى جۇرگىزگەن قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ مۇحتار شاحانوۆتىڭ قازاققا قالتقىسىز قىزمەت ەتكەن، رۋحانياتقا ولشەۋسىز ەڭبەك سىڭىرگەن سيرەك تۇلعالاردىڭ ءبىرى ەكەنىن اتاپ ءوتتى.

سۋرەت: ماقسات قۇسايىن.

– ول وتكەن عاسىردىڭ سەكسەنىنشى جىلدارى وقىرمان قاۋىمعا «تاناكوز» پوەماسىمەن تانىلىپ، ادەبيەتكە ءا دەگەننەن-اق ەرەكشە قۇبىلىس بولىپ ەندى. بۇل شىعارما سول كەزدەگى «لەنينشىل جاس» گازەتىندە ەكى نومىرگە تولىق جاريالانىپ، وقىرمانعا ۇلكەن سەرپىلىس اكەلدى. سودان بەرى شاحانوۆ قازاق پوەزياسىنىڭ بيىك ءبىر بەلەسىنە اينالدى. 1986 جىلعى جەلتوقسان وقيعاسى تۇسىندا، قازاق جاستارىنىڭ تاعدىرى قىل ۇستىندە تۇرعان شاقتا، شاحانوۆ ماسكەۋدە ۇلكەن پوەزيالىق كەش بەردى. بۇل – سول كەزدەگى توتاليتارلىق جۇيەگە قارسى جاسالعان باتىل رۋحاني قادام ەدى. اقىننىڭ بۇل كەشى بىرنەشە ساعاتقا سوزىلىپ، ول جەردە ۇلت، ەل، جەر تۋرالى ءورشىل جىرلارىن وقىدى. بۇل – جامبىل جاباەۆتىڭ كرەملدە قازاقشا جىر وقىعان تاريحي ساتىنەن كەيىنگى ءىرى پوەزيالىق وقيعا رەتىندە باعالاندى.

سۋرەت: ماقسات قۇسايىن.

مۇحتار شاحانوۆ – ماحامبەت وتەمىسۇلىنان كەيىن شىندىقتى تايسالماي ايتقان، ەشكىمنەن قايمىقپاعان سيرەك اقىنداردىڭ ءبىرى. ونىڭ ازاماتتىق ءۇنى ءاردايىم حالىق جاعىندا بولدى. تايسالمادى، تارتىنىپ قالمادى. ەگەمەندىككە دەيىن دە، ەگەمەندىك جىلدارى دا انا ءتىلىنىڭ ايبىنىن كوتەرىپ، ابىرويى ءۇشىن از كۇرەس جۇرگىزبەدى. مۇنىسىنا مۇقىم قازاق كۋا. سويتە-سويتە ۇلتىنىڭ اسىل پەرزەنتىنە اينالىپ كەتتى. مارقۇمنىڭ جانى ءجانناتتىڭ تورىندە شالقىسىن!، - دەدى مەرەكە ابدەشۇلى.

Abai.kz