قازاقستان رەسپۋبليكاسى ۇلتتىق بانكى بازالىق مولشەرلەمەنى جىلدىق 18% دەڭگەيىندە ±1 پايىزدىق تارماق دالىزىمەن ساقتاۋ تۋرالى شەشىم قابىلدادى، دەپ حابارلايدى BAQ.KZ تىلشىسى.

ۇلتتىق بانكتىڭ اقشا-كرەديت ساياساتى كوميتەتىنىڭ شەشىمىنە سايكەس، بازالىق مولشەرلەمە وزگەرىسسىز قالدى. بۇل شەشىم ينفلياتسيالىق قىسىمنىڭ ءالى دە جوعارى بولۋىمەن ءتۇسىندىرىلدى.

2026 جىلعى ناۋرىزدا جىلدىق ينفلياتسيا 11%-عا دەيىن باياۋلادى (اقپاندا – 11,7%). ازىق-تۇلىك ينفلياتسياسى 11,7%-عا، ازىق-تۇلىككە جاتپايتىن تاۋارلار – 11,3%-عا، ال قىزمەتتەر ينفلياتسياسى 10,0%-عا دەيىن تومەندەگەن.

ينفلياتسيانىڭ باياۋلاۋىنا قاتاڭ اقشا-كرەديت ساياساتى، تەڭگە باعامىنىڭ تۇراقتىلىعى، تۇتىنۋشىلىق سۇرانىستىڭ بىرقالىپتانۋى جانە ۇكىمەتتىڭ ينفلياتسياعا قارسى شارالارى اسەر ەتتى. سونىمەن قاتار، كوممۋنالدىق قىزمەتتەر مەن جانار-جاعارماي باعاسىنا ەنگىزىلگەن موراتوري دە ىقپال ەتتى.

ايلىق ينفلياتسيا دا تومەندەپ، ناۋرىزدا 0,6%-دى قۇرادى (اقپاندا – 1,1%). دەگەنمەن، بازالىق ينفلياتسيا دەڭگەيى ءالى دە 5% ماقساتتى كورسەتكىشتەن جوعارى قالىپ وتىر.

حالىقتىڭ ينفلياتسيالىق كۇتۋلەرى جوعارى دەڭگەيدە ساقتالعان – 14,6%. ال نارىق قاتىسۋشىلارى 2026 جىلى ينفلياتسيانى 10% دەڭگەيىندە بولجايدى.

سىرتقى فاكتورلار دا قىسىم جاساپ وتىر. تاياۋ شىعىستاعى گەوساياسي جاعدايدىڭ شيەلەنىسۋى ەنەرگيا، ازىق-تۇلىك جانە تىڭايتقىش باعاسىنىڭ وسۋىنە اسەر ەتىپ، يمپورتتىق ينفلياتسيا تاۋەكەلدەرىن ارتتىردى.

سونىمەن قاتار، رەتتەلەتىن تاريفتەردىڭ ءوسۋى، سالىق وزگەرىستەرى جانە كۆازيفيسكالدىق ساياسات ينفلياتسياعا قوسىمشا قىسىم ءتۇسىرۋى مۇمكىن.

الدىن الا دەرەكتەر بويىنشا، 2026 جىلدىڭ العاشقى توقسانىندا قازاقستان ەكونوميكاسى 3,0%-عا ءوستى. ءوسىم نەگىزىنەن قۇرىلىس، كولىك، وڭدەۋ ونەركاسىبى جانە ساۋدا سالالارىنداعى بەلسەندىلىك ەسەبىنەن قامتاماسىز ەتىلگەن.

ۇلتتىق بانك قازىرگى دەزينفلياتسيالىق ءۇردىستى ساقتاۋ ءۇشىن قاتاڭ اقشا-كرەديت شارتتارىن جالعاستىراتىنىن مالىمدەدى. سونىمەن بىرگە، ەگەر ينفلياتسيا باياۋلاۋ ءۇردىسى ساقتالسا، الداعى ۋاقىتتا بازالىق مولشەرلەمەنى تومەندەتۋ مۇمكىندىگى قاراستىرىلۋى مۇمكىن.

كەلەسى شەشىم 2026 جىلعى 5 ماۋسىمدا جاريالانادى.