قىرعىز رەسپۋبليكاسىنىڭ باس پروكۋراتۋراسى ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) بۇرىنعى باسشىسىنا قاتىستى ءىس بويىنشا ايىپتاۋ اكتىسىن بەكىتتى. بۇل تۋرالى Kaktus Media حابارلادى.

بۇل اقپاراتتى ادۆوكات يكراميدين ايتكۋلوۆ راستادى. ونىڭ ايتۋىنشا، قامشىبەك تاشيەۆكە «بيلىكتى كۇشپەن باسىپ الۋعا دايىندىق» جانە «لاۋازىمدىق وكىلەتتىگىن اسىرا پايدالانۋ» باپتارى بويىنشا ايىپ تاعىلىپ وتىر.

قازىرگى مالىمەتتەرگە قاراعاندا، تاشيەۆكە قاتىستى ماتەريالدار بىشكەك قالاسىنىڭ ءبىرىنشى ماي اۋداندىق سوتىنا وتكىزىلگەن. ارنايى قىزمەتتىڭ بۇرىنعى باسشىسىمەن بىرگە بۇل ءىس بويىنشا تاعى 7 ادام ايىپتالىپ جاتىر.

ادۆوكاتتىڭ ايتۋىنشا، ءىس قۇپيالانعان. بۇل سوت وتىرىستارىنىڭ جابىق رەجيمدە وتەتىنىن جانە تەرگەۋ مەن سوت ماتەريالدارىن جاريالاۋعا تىيىم سالىناتىنىن بىلدىرەدى.

ىقتيمال ايىپتاۋلار تۋرالى اقپارات پايدا بولعاننان كەيىن، تاشيەۆتىڭ ءوزى كىناسىز ەكەنىن جانە ەل زاڭناماسى اياسىندا قورعاناتىنىن مالىمدەدى.

بۇگىن تاڭەرتەڭ «Kaktus Media» باسىلىمى ۇقمك باسشىسىنىڭ بۇرىنعى ورىنباسارى تيمۋر شابدانبەكوۆتىڭ تەرگەۋ يزولياتورىنان ۇيقاماققا بوساتىلعانىن حابارلادى. ول دا وسى ءىس بويىنشا ايىپتالۋشىلاردىڭ ءبىرى.

Abai.kz