40 مىڭ شاقىرىمنان استام جول، 16 ءوڭىر جانە قارسىلاستارعا جاڭا ۇندەۋ – 15 جانە 16 تامىزداعى سايلاۋالدى ناۋقان وسىنداي كورسەتكىشتەرمەن ەستە قالدى. «ادىلەت» كەرۋەنى ەكۆاتور ۇزىندىعىنان دا كوپ جول ءجۇردى، جسدپ «اۋىل» پارتياسىنا تىكەلەي دەباتقا شىعۋدى ۇسىندى، ال باسقا پارتيالار زاۋىتتاردا، ەگىستىك القاپتارىندا، كلينيكالاردا، تابيعي پاركتەر مەن IT الاڭداردا سايلاۋشىلارمەن بايلانىس ورناتۋدى جالعاستىردى. سايلاۋعا ءبىر اپتا قالعاندا ناۋقان وڭىرلەردە عانا ەمەس، قوعامدىق-ساياسي كەڭىستىكتە دە ايقىن كورىنە باستادى.

«ادىلەت» پارتياسى الماتىدا قالانىڭ عىلىمي جانە شىعارماشىلىق زيالى قاۋىم وكىلدەرىمەن بىرقاتار كەزدەسۋ وتكىزدى. ۇلتتىق عىلىم اكادەمياسىندا عالىمدار، جازۋشىلار مەن مادەنيەت قايراتكەرلەرى عىلىمدى دامىتۋ جانە مادەني كودتى ساقتاۋ ماسەلەلەرىن تالقىلادى. Farabi IT Hub الاڭىندا IT قاۋىمداستىق وكىلدەرىمەن جەكە كەزدەسۋ ءوتىپ، وندا جاساندى ينتەللەكتىنى دامىتۋ، تەحنولوگيالىق ەكسپورت جانە وتاندىق ازىرلەۋشىلەردى قولداۋ ماسەلەلەرى ءسوز بولدى. سونداي-اق پارتيا قازاقستاندىق عالىمداردىڭ سيۆەرس الماسىنىڭ جاڭا سۇرىبىن شىعارۋ بويىنشا جۇمىس ىستەپ جاتقانىن جانە وعان «ادىلەت» اتاۋىن بەرۋ جوسپارلانعانىن حابارلادى.

«ادىلەتتى قازاقستان ءۇشىن» پارتياسىنىڭ ءموبيلدى كەرۋەنى ارالىق قورىتىندىسىن جاريالادى: 23 كۇن ىشىندە قاتىسۋشىلار 16 ءوڭىردى ارالاپ، 40 مىڭ شاقىرىمنان استام جول ءجۇردى. بۇل – ەكۆاتور ۇزىندىعىنان دا كوپ. كەستەگە سايكەس، قالعان كۇندەرى كەرۋەن قوستاناي، سولتۇستىك قازاقستان جانە پاۆلودار وبلىستارىنداعى باعىتىن اياقتاۋى ءتيىس.

جالپىۇلتتىق سوتسيال-دەموكراتيالىق پارتيا استانادا مۇلىك يەلەرى بىرلەستىكتەرىنىڭ (ميب) قىزمەتى جانە تۇرعىن ءۇي-كوممۋنالدىق شارۋاشىلىق (تكش) ماسەلەلەرى بويىنشا فورۋم وتكىزدى. ءىس-شارا بارىسىندا تۇرعىن ءۇي قورىن باسقارۋ جانە باسپانا يەلەرىنىڭ مۇددەلەرىن ءبىلدىرۋ ماسەلەلەرى تالقىلاندى. كانديدات تالعات تاتىكوۆ ۇلتتىق تكش پالاتاسىن قۇرۋ تۋرالى ۇسىنىس ايتتى. سونىمەن قاتار پارتيا «تازا جاعالاۋ – تازا سۋ ايدىنى» ەكولوگيالىق ءىس-شاراسىن وتكىزدى. وعان قاتىسۋشىلار سۋ ايدىندارىنىڭ ءبىرىنىڭ جاعالاۋىن قوقىستان تازارتىپ، اقپاراتتىق تاقتايشالار ورناتتى.

پارتيا توراعاسى اسحات راحىمجانوۆ «اۋىل» پارتياسىنىڭ توراعاسى قايرات ايتۋعانوۆقا وكىلدەر مەن دەلدالداردىڭ قاتىسۋىنسىز، بلوگەر دينارا ءساتجاننىڭ الاڭىندا تىكەلەي دەبات وتكىزۋدى اشىق ۇسىندى. بۇعان دەيىن اتالعان الاڭدا جسدپ مەن قازاقستان حالىق پارتياسىنىڭ كوشباسشىلارى اراسىندا پىكىرتالاس وتكەن بولاتىن.

«بايتاق» پارتياسى «تابيعات – ۇلتتىق مۇرا» اتتى ساراپتامالىق دوڭگەلەك ۇستەلدىڭ كەزەكتى كەزەڭىن وتكىزدى. بۇل جولى ءىس-شارا «شارىن» مەملەكەتتىك ۇلتتىق تابيعي پاركىنىڭ ۇجىمىمەن ۇيىمداستىرىلىپ، بيوالۋانتۇرلىلىكتى ساقتاۋ، براكونەرلىكپەن كۇرەس جانە ەكوتۋريزمدى دامىتۋ ماسەلەلەرى تالقىلاندى. كانديدات ۆلاديمير مارتەل ش. شوكين اتىنداعى قاپشاعاي گەس-ءىنىڭ ۇجىمىمەن كەزدەستى. شامامەن 60 ادام قاتىسقان جيىندا گيدروەنەرگەتيكانى دامىتۋ، سۋ رەسۋرستارىن ۇتىمدى پايدالانۋ جانە جاڭارتىلاتىن ەنەرگيا كوزدەرىنىڭ ءرولى ءسوز بولدى. كانديدات الما قاراش پلاستيك قالدىقتار ماسەلەسىن جۇيەلى تۇردە شەشۋ قاجەتتىگىن تالقىلادى. ونىڭ ايتۋىنشا، ميكرو جانە نانوپلاستيك ادام اعزاسىنىڭ تىندەرىنەن دە تابىلىپ جاتىر. ال مەملەكەت پەن بيزنەستىڭ مىندەتى – جەكەلەگەن وندىرۋشىلەر اراسىنان كىنالىلەردى ىزدەۋ ەمەس، قالدىقتاردى قايتا وڭدەۋ جۇيەسىن قالىپتاستىرۋ.

سونداي-اق پارتيا استانا مەن وسكەمەن قالالارىنداعى مەديتسينا جانە ءبىلىم بەرۋ سالالارىنىڭ ۇجىمدارىمەن كەزدەسۋ وتكىزدى. بۇدان بولەك، ماڭعىستاۋ، جامبىل جانە الماتى وبلىستارىنداعى اۋىل تۇرعىندارى اراسىندا ۇگىت-ناسيحات جۇمىستارىن جۇرگىزدى.

قازاقستان حالىق پارتياسى ءبىر كۇن بۇرىن جسدپ توراعاسىمەن وتكەن دەباتتىڭ قورىتىندىسىنا قاتىستى پىكىر ءبىلدىردى. قحپ توراعاسى نۇرسۇلتان شوقىنوۆ ەكى پارتيانىڭ جەكەلەگەن يدەولوگيالىق ۇستانىمدارىنىڭ ۇقساستىعىن اتاپ ءوتىپ، سونىمەن بىرگە ۇيىمداستىرۋشىلىق جۇمىس اۋقىمى مەن جاقتاستارىنىڭ سانى بويىنشا ايىرماشىلىقتارعا توقتالدى. ول جسدپ-نىڭ سايلاۋالدى باعدارلاماسىنا جەكە توقتالىپ، ونىڭ بىرقاتار تارماعىن ءىس جۇزىندە جۇزەگە اسىرۋ مۇمكىندىگىنە كۇمان كەلتىردى. سونداي-اق شوقىنوۆ ءماجىلىستىڭ وتكەن شاقىرىلىمىنداعى جسدپ فراكتسياسىنىڭ قىزمەتىنە توقتالىپ، ءوزىنىڭ مالىمەتىنشە، وسى كەزەڭدە فراكتسيا زاڭ قابىلداۋعا باستاماشى بولماعانىن ايتتى.

«اۋىل» پارتياسى شىمكەنتتە «قازىعۇرت – وڭتۇستىك» كاسىپورنىنىڭ ەڭبەك ۇجىمىمەن كەزدەستى. پارتيا توراعاسى قايرات ايتۋعانوۆ كانديداتتارمەن بىرگە مۇناي جانە لوگيستيكا سالالارىنىڭ وكىلدەرىمەن تەمىرجول تاسىمالىنىڭ تيىمدىلىگىن ارتتىرۋ جانە ينفراقۇرىلىمدى جاڭعىرتۋ ماسەلەلەرىن تالقىلادى. تۇركىستان وبلىسىندا ايتۋعانوۆ جەرگىلىكتى ديقاندارمەن بەيرەسمي جاعدايدا – ەگىستىك القابىنداعى تۇسكى اس ۇستىندە اڭگىمەلەسىپ، ولاردىڭ اگرارلىق سەكتوردى دامىتۋعا قاتىستى ماسەلەلەرىن تىڭدادى.

«اق جول» دەموكراتيالىق پارتياسى الماتى، قوستاناي، قاراعاندى، تۇركىستان جانە ماڭعىستاۋ وبلىستارىنداعى كەزدەسۋلەرىن جالعاستىردى. پارتيا توراعاسى دانيا ەسپاەۆا ەلىمىزدىڭ ءار وڭىرىنەن كەلگەن جەكەمەنشىك كلينيكالاردىڭ باسشىلارى جانە دارىگەرلەرمەن كەزدەستى. قاتىسۋشىلار ليتسەنزيالاۋ، قارجىلاندىرۋعا قول جەتكىزۋ جانە مەديتسينالىق ينفراقۇرىلىمدى دامىتۋ ماسەلەلەرىن تالقىلادى. كەزدەسۋ قورىتىندىسى بويىنشا پارتيا مەديتسينالىق ينۆەستيتسيالىق اليانسپەن جانە مەديتسينالىق ينۆەستيتسيالىق وداقپەن ىنتىماقتاستىق تۋرالى مەموراندۋمعا قول قويدى.

«Respublica» پارتياسى قوستاناي وبلىسىنداعى قالانى جانە 14 اۋداندى ەلەكتر ەنەرگياسىمەن قامتاماسىز ەتەتىن «ەپك-فورفايت» ەلەكتر جەلىلىك كومپانياسىنا باردى. ۇجىممەن كەزدەسۋ بارىسىندا وتاندىق ءوندىرىستى دامىتۋ، سونداي-اق وڭىرلەردەگى ءبىلىم بەرۋ جانە مەديتسينالىق قىزمەتتەردىڭ قولجەتىمدىلىگى ماسەلەلەرى تالقىلاندى. بۇدان بولەك، پارتيا وكىلدەرى 1974 جىلدان بەرى جۇمىس ىستەيتىن جانە ءونىمنىڭ 300-دەن استام ءتۇرىن شىعاراتىن «بايان سۇلۋ» كونديتەرلىك فابريكاسىنا باردى.

قوستانايدا جاستارمەن ReTalks فورماتىندا بەيرەسمي كەزدەسۋ جانە پارتيانىڭ ReWomen ايەلدەر قاۋىمداستىعىنىڭ مەرەيتويلىق 20-شى وڭىرلىك فورۋمى ءوتتى. «Respublica» پارتياسىنىڭ مالىمەتىنشە، اتالعان قاۋىمداستىق 22 مىڭعا جۋىق قاتىسۋشىنى بىرىكتىرەدى. سونىمەن قاتار پارتيا بۋراباي مەن كوكشەتاۋدىڭ تۋريستىك ورىندارىن ارالاۋدى قامتىعان ReBus ۇگىت-ناسيحات ءىس-شاراسىن وتكىزدى.

سايلاۋعا ءبىر اپتا قالعاندا پارتيالار ەڭبەك ۇجىمدارىمەن، بيزنەس جانە ساراپشىلار قاۋىمداستىعىنىڭ وكىلدەرىمەن كەزدەسۋلەر وتكىزۋدى، سونداي-اق قوعامدىق دەباتتارعا قاتىسۋدى جالعاستىرىپ جاتىر. سوڭعى كۇندەرى قحپ مەن جسدپ وكىلدەرى اراسىندا دەبات ءوتتى. بۇدان بولەك، «اۋىل» پارتياسى قوعامدىق پىكىرتالاس وتكىزۋدى ۇسىندى. سونىمەن قاتار پارتيالار وڭىرلەردەگى جۇمىسىنىڭ اۋقىمىن كورسەتۋدى جالعاستىرۋدا. «ادىلەت» كەرۋەنى ءوز باعىتىنىڭ ەكۆاتورىنان ءوتىپ ۇلگەرسە، باسقا پارتيالاردىڭ شتابتارى ەلىمىزدىڭ بارلىق دەرلىك وڭىرىندە كەزدەسۋلەر وتكىزىپ جاتىر. ناۋقاننىڭ قورىتىندى اپتاسى بۇدان دا بەلسەندى وتەتىن سىڭايلى.

Abai.kz