اتىراۋ وبلىسىندا بۇرىنعى جۇبايىنىڭ ءتورت تۋىسىن ءولتىردى دەپ ايىپتالعان سۇلتان سارسەماليەۆكە قاتىستى قىلمىستىق ءىس سوتقا جولداندى.

ءىستى قاراۋ 18 مامىرعا بەلگىلەنگەن. بۇل پروتسەستى يانا لەگكوديموۆانىڭ ولىمىنە قاتىستى رەزونانستى ءىس بويىنشا ۇكىم كەسكەن مامانداندىرىلعان اۋدانارالىق قىلمىستىق سوتتىڭ سۋدياسى زارەما حاميدۋللينا جۇرگىزەدى. كۇدىكتى سارسەماليەۆكە كىسى ءولتىرىپ قانا قويماي، مارقۇمداردىڭ اتىنان تۋىستارىمەن حات جازىسىپ، مال-مۇلكىن ساۋدالادى دەگەن ايىپ تاعىلىپ وتىر.

تەرگەۋ مالىمەتتەرى بويىنشا، ايىپتالۋشى قىلمىس جاساعاننان كەيىن يندونەزياعا كەتىپ قالعان. ول جاقتا ءجۇرىپ، ءوزىن ولتىرىلگەن ادامدار رەتىندە تانىستىرىپ، ولاردىڭ جاقىندارىن اداستىرۋمەن اينالىسقان. سوت بارىسىندا وسى دەرەكتەر مەن وقيعانىڭ باسقا دا ءمان-جايلارى زەردەلەنەدى.

سۋديا زارەما حاميدۋللينا بۇعان دەيىنگى يانا لەگكوديموۆانى ولىمىنە قاتىستى سوت پروتسەسىندە قىلمىسكەرلەردىڭ ءىس-ارەكەتىنە قاتىستى بىلاي دەدى:

«ولار بۇل قادامعا سانالى تۇردە باردى. ادام ءومىرىن 500 مىڭ تەڭگەگە باعالادى. بىرنەشە كۇن قاتارىنان سىزدەر كىسى ءولتىرۋ ءتاسىلىن — قاتىگەزدىكپەن، كەلەكەمەن، كۇلە وتىرىپ تالقىلادىڭىزدار. سىزدەردى ونىڭ جاعدايى ەمەس، تەك ۇستالماي قالۋ جولى عانا الاڭداتتى. بارلىق پروتسەسس بويى مەن ولاردىڭ حات-حابارلارىنا قاتىستى تۇسىنىكتەمە كۇتتىم، بىراق ولار جاۋاپ بەرۋدەن باس تارتتى. بۇل — ولاردىڭ قۇقىعى. سىزدەردە مۇنشالىقتى قاتىگەزدىك پەن وشپەندىلىكتىڭ قايدان پايدا بولعانىن تۇسىنبەيمىن. وتىرىس كەزىندە جاقىندارىڭىز تۋرالى ءجيى ايتتىڭىزدار، بىراق بۇل تۋرالى قىلمىستان كەيىن ەمەس، وعان دەيىن ويلاۋ كەرەك ەدى».

دەرەككوزى: qaz365.kz

Abai.kz