مەملەكەت باسشىسىنىڭ جارلىعىمەن جاريالانعان «تسيفرلاندىرۋ جانە جاساندى ينتەللەكت جىلى» اياسىندا، تالدىقورعاندا بيكەن ريموۆا اتىنداعى اكادەميالىق دراما تەاترىنىڭ ساحناسىندا 16 مامىر كۇنى  «ترانسفورمەرلەر: جەر ميسسياسى» اتتى جاڭا تەاترلاندىرىلعان قويىلىم ساحنالاندى. 

بۇل تۋىندى كىشى جانە ورتا جاستاعى بالالارعا ارنالعان زاماناۋي مادەني تۋىندى.

شىعارما كلاسسيكالىق تەاتر مەن زاماناۋي ينتەراكتيۆتى شوۋدىڭ سينتەزىنەن تۇرادى. سيۋجەت جەلىسى بويىنشا، قاتىگەز كۇشتەر «ۋاقىت كۋبىن» پايدالانىپ، جەر پلانەتاسىن جويۋدى كوزدەيدى. الايدا، وقيعا ورتاسىنداعى ايدار، سوفيا، ءاليا جانە تيمۋر ەسىمدى باتىل بالالار ترانسفورمەرلەرمەن يىق تىرەسە وتىرىپ، الەمدى قۇتقارۋ ميسسياسىنا اتتانادى.

ب. ريموۆا اتىنداعى اكادەميالىق دراما تەاترىنىڭ ديرەكتورى ەرلىك جۋاسبەك: «2026 جىلدىڭ «جاساندى ينتەللەكت جىلى» بولىپ جاريالانۋى بىزگە ەرەكشە سەرپىن بەردى. ايتا كەتەتىن جايت، بۇل – قازاقستان بويىنشا كلاسسيكالىق تەاتر ونەرىن يننوۆاتسيالىق ينتەراكتيۆتى تەحنولوگيالارمەن وسىنداي دەڭگەيدە ۇشتاستىرعان العاشقى بىرەگەي جوبا. ءبىز قويىلىم ارقىلى ەلىمىزدە بالالار دراماتۋرگياسىنىڭ مۇلدەم جاڭا فورماتىنا جول اشتىق. بۇل بولاشاق ۇرپاقتىڭ تەحنولوگيالىق پروگرەسس پەن ادامگەرشىلىك قۇندىلىقتاردى قاتار مەڭگەرۋىنە جاسالعان باتىل قادام»، – دەپ اتاپ ءوتتى تەاتر ديرەكتورى

شىعارمانىڭ ەرەكشەلىكتەرى مەن جاڭالىعى:

• ينتەراكتيۆتى فورمات: كورەرمەندەر تەك باقىلاۋشى ەمەس، وقيعانىڭ بەلسەندى قاتىسۋشىسىنا اينالادى. فينالدىق جەڭىس تىكەلەي كورەرمەن زالىنىڭ قولداۋى مەن بىرلىگىنە بايلانىستى ءوربيدى.
• تاربيەلىك ءمانى: فانتاستيكالىق سيۋجەت ارقىلى بالالاردىڭ بويىنا دوستىق، جاۋاپكەرشىلىك، ءوزارا كومەك جانە باتىلدىق سياقتى ماڭىزدى قۇندىلىقتار ەگىلەدى.
• مۋلتيتىلدىلىك: ستسەناري ورىس جانە قازاق تىلدەرىندە دايىندالعان، بۇل ونى قازاقستاننىڭ كەز كەلگەن تەاترلىق جانە مادەني ورتاسىندا پايدالانۋعا مۇمكىندىك بەرەدى.

Abai.kz